飛行常客喜訊!亞洲萬里通 Asia Miles 宣布6月22日起更改新制,新計劃下,大部分航班可賺里數會增加,兌換機票亦變得更有彈性,尤其換領單程機票,不少地點都抵玩咗,以下是飛行里數達人小斯對新制的詳盡分析。

撰文:小斯|圖片:Asia Miles、新傳媒資料室|編輯:f(原文刊自《Flyformiles》

01|換日韓機票30,000里變20,000

今次改制可謂普天同慶,最熱門嘅日本、韓國來回機票由30,000里減到20,000里,足足減咗成10,000里!無論是去東京、大阪、首爾甚至北海道,新制下通通只要20,000里,以前換到2人變成3人,減幅最勁!

去年港人最愛去的大阪,來回機票現只要20,000里就可兌換。

02|20,000里可以飛新加坡、布吉仲有峇里

在新制下,除了日韓之外,原本要30,000里兌換變成20,000里的航點增加不少,港人旅遊熱點如布吉、新加坡、吉隆坡、峇里、檳城、加德滿都、仰光等東南亞城市,都減足10,000里!

布吉機票本身已難兌換,減價後可能更困難。

另外澳洲、以色列亦由45,000里減到44,000里,叫做減咗1,000里;歐洲同美加西岸不變,但東岸就由90,000里減到84,000里,減咗6,000里咁多!

換澳洲來回機票由45,000里減到44,000里。

紐約由90,000里減到84,000里,足足減咗6,000里!

03|換單程機票 里數改為來回一半

以前冇人會用Asia Miles 換單程機票,因為所需里數係換來回里數嘅三分之二!如舊制下,來回台北所需里數係20,000,但單程機票所需里數就要15,000;於新制下,單程機票減至10,000里,假如買到平嘅廉航出發,回程換單程機票就抵好多!

台北、上海、曼谷的來回econ機票雖然沒有減里數,但單程則減了不少,相對換單程更有彈性。

假如只買到平的單程廉航去曼谷,可以考慮用里數換回程,包30kg行李,狂掃貨都唔怕。

04|換單程商務艙 更有彈性

另外,單程獎勵機票所需里數改為來回機票嘅一半亦有另一個好處,就係喺舊制下,如果你想換一套來回商務機票,你想要嘅日子有一程係冇business而你又迫住坐econ的話,你都係要畀來回business嘅里數。但依家就唔係,因為你可以分開兩個單程換,一程換econ一程換business,咁就唔使畀咁貴里數啦!

舊制的話,就算一程坐econ一程坐business,都要畀足80,000里!

05|搭CX 或 KA 賺里數大增

由6月22日起,透過乘搭國泰及國泰港龍航空可賺取嘅里數,將由實際飛行距離改為以飛行距離區域計算!

例子:即係話原本坐econ香港單程去台北,舊制下,根據實際飛行距離可以攞到501里,但由於新制係以飛行距離區域計算,故此於新制下,可以攞到650里,比舊制更多!

 

無論長短途,大部分賺取的里數都有所增加。

於新制下,透過乘搭國泰 / 國泰港龍航空賺取里數嘅計算方法取決於3樣嘢,第一係客艙級別 (cabin class),第二係「子艙位」(fare class),第三係飛行距離區域,並唔再係以前嘅實際飛行距離區域。

例如原本坐經濟艙Y class嘅香港單程去台北,舊制下,根據實際飛行距離可以攞到501里,但由於新制係以飛行距離區域計算,故此於新制下可以攞到650里,比舊制更多!就算係經濟艙Q class平飛,舊制下,只能儲到25%,即係125里,但於新制下,就儲到330里,比舊制多一倍有多!

台北

如果去台中的話就更誇張,例如Y class嘅香港單程去台中,舊制下,根據實際飛行距離只可以攞到447里,但於新制下嘅飛行距離區域計算,就可以攞到650里,比舊制多接近50%!

新制下賺取里數,將根據艙等及飛行距離區域。

06|可換機位加20%

不少人投訴用里數換機票勁困難,數量很有限。有見及此,Asia Miles稱將國泰與國泰港龍可供兌換的獎勵機位增加20%,希望大家可以更容易換到心儀機票出發。

新增機位屬於甚麼艙等,亞洲萬里通則沒有指明。

07|轉機/停留限制 更有彈性

獎勵機票轉機/停留規則,來回機票由2個停留+2個轉機+1個終斷行程(最多6程機),改為1個終斷行程及停留/轉機數次不限(最多4程機),即是說:

單程機票(新制)
– 最多2個航段 (sectors)
– 容許最多1個stopover 或 1個轉機

例子:香港-大阪單程

來回機票(新制)
– 最多4個航段 (sectors)
– 容許最多1次於起點或轉乘點(turnaround point)作終斷行程 (openjaw) (如在起點作終斷行程,必須屬於同一國家不同城市,例如起點係東京,回程點係大阪)

– 停留 (stopover) 或 轉機 (transit)數目不限
– 如行程中途已返回出發點,行程則即時結束!故此舊制嘅同一里數換兩個旅行呢招已經係用唔到

新制表面上可以換到嘅航班數目少咗2程,但實際分別不大,因為你都唔會想轉2程機吧?同埋由於依家停留及轉機數目不限嘅關係,大家就唔使好似以前咁,想玩3個地方的話,就迫住有一程要openjaw,依家反而可以3個地方都停留晒,彈性更大!

– 雖然新制下,當行程中途已返回出發點,就唔可以再出發,變相同一個里數真係剩係可以換一個旅行,但我又覺得唔係真係差好遠啫!因為舊制下嘅30,000里係可以換到來回日本 + 來回台灣兩個trips,但其實一嘢要你換晒兩個trips係好辛苦,一來定唔到時間,二來有少少好似覺得唔換埋會蝕咁!依家就唔同,真真正正減價減到20,000里係來回日本機票,想玩長啲嘅,仲可以停埋台灣玩!變咗彈性更大!唔會有種迫你去旅行嘅感覺!

08|兌換機票日期 由360日前改為353日

新制下,將透過優先預訂機票嘅提前日子,大大提升舊制嘅優越機票地位!新制下,亞洲萬里通 Asia Miles 獎勵機票將分為以下三個類別:

1. 標準賞

獎賞機票最少,優先預訂機票只限於353日前,比起以前360日前後咗7日,而且優先座位選擇只適用於特選經濟客艙以上,即係換econ冇status就唔畀揀位。

2. 靈活賞

所需里數較標準賞多,但獎賞機票亦較多,優先預訂機票可於360日前,比標準賞早7日,但優先座位選擇一樣只適用於特選經濟客艙以上,即係換econ冇status就唔畀揀位。

3. 隨心賞

所需里數最多,但獎賞機票亦最多,優先預訂機票可於360日前,比標準賞早7日,優先座位選擇亦適用於所有客艙,即係換econ都可以揀位坐。

小斯按:新制下,用標準賞只能夠於353日前換機票,故此用靈活賞及隨心賞換到機票嘅機會會大增,尤其係旺季,例如聖誕農曆新年呢啲旺季特別有用!特別值得留意嘅係來回日本嘅靈活賞機票,都只係同以前一樣30,000里,所以呢個幾抵換呀!

09|兌換特選經濟/商務/頭等請及早行動!

新制下,經濟艙大部分都有得減,但特選經濟(PEY)、商務或頭等艙,都會輕微至大幅度加價,尤其是長途高等艙位加幅最多!里數富戶如果要換機票的話,6月22日是死線!

新制下,各航點來回所需里數表,紅色為需要少咗里數換嘅機票,但綠色就是貴咗嘅重災區。(圖:小斯)

重災區1:特選經濟艙

貴艙等加價都係意料之內,但Asia Miles都好佛心,日韓個tier居然完全冇加!不過我估大家換得PEY嘅,都會係換去歐洲,原本72,000里加到80,000里,我認為又唔係話真係加好多,都只係8,000里!但美加西岸嗰邊真心加得犀利,加咗成18,000里!只能說想長途機坐得舒服啲,係要付出代價!

國泰特選經濟艙。

重災區2:商務艙

商務艙加幅同特選經濟艙差唔多,都係10,000至20,000里,Asia Miles一樣非常佛心日韓個tier,都係冇加價!但值得留意,其實一旦換長途嘅business機,如飛歐洲的長度,大約行程要13,000至14,000距離左右,都已經要130,000里!再誇張啲去美加東岸的話,就要170,000里,相對換「寰宇一家」聯盟成員獎勵機票 Oneworld Multi-carrier Award 會抵一點。

國泰商務艙。

重災區3:頭等艙

頭等艙可謂今次重災區,加幅非常大!但我諗換得頭等艙嘅都係富戶,唔爭在嗰幾萬啦!同埋重點係你換得頭等都係換遠程,同商務艙道理一樣,點都係用「寰宇一家」聯盟成員獎勵機票 Oneworld Multi-carrier Award比較抵!

國泰頭等艙。

10|新制是計出發還是出機票日期?

根據國泰網站,新計劃將於2018年6月22日(香港時間00:00) 起生效,所有於此日期或以後簽發的機票,將以新換算表計算可賺取里數。

  • 若機票簽發及出發日期皆為2018年6月22日前:跟舊制!
  • 如所持的機票於2018年6月22日或之前簽發,並於此日期或之後出發,若因計劃更新後所賺取的里數有任何差異,乘客將獲相對較高的里數。
  • 至於2018年6月22日或之後簽發及出發的機票:跟新制!

Asia Miles兌換國泰機票,新制下主要得益者是短途econ乘客。(圖:Gettyimage)

相關文章