仍然覺得坐郵輪是老一輩的旅遊方式的話,只能說眼光太狹窄了!時下的郵輪不止有無限食的餐廳跟賭場,還有數之不盡的玩樂設施,心血少啲都未必玩到!皇家加勒比推出全世界最大(暫時)的郵輪 Symphony of the Seas(海洋交響號),18層樓高,4月起在巴塞隆拿啟航。作為世界最大郵輪,一定有不少過人之處,記者有幸率先登船一睹至新體驗,未上過郵輪的旅人看畢整篇介紹,一定會讓你對郵輪的老派形象徹底改觀。

撰文:Kassidy|圖片:Man

海洋交響號 世界最大郵輪 4月啟航

一般香港的郵輪旺季都是介乎於6-8月,趁著暑假可以一家大細上船玩,坐郵輪去其他國家觀光。4月起海洋交響號就會由西班牙巴塞隆拿出發,途經地中海國家,最後回程至巴塞隆拿落船,玩足7晚,11月開始就會行駛美洲,到4月才會重回歐洲。要計算郵輪是否最大,主要看其排水量,這次海洋交響號比起之前皇家加勒比的另一艘船 Harmony of the Seas 多28,000噸的排水量,榮登世界最大郵輪的地位!

遠睇隻船真係非常巨型,海上巨無霸絕非浪得虛名。
遠睇隻船真係非常巨型,海上巨無霸絕非浪得虛名。

碼頭入口的轉角位就有 SYMPHONY 字眼,做打卡位冇問題!
碼頭入口的轉角位就有 SYMPHONY 字眼,做打卡位冇問題!

全面解構 食、玩、住!

海洋交響號過人之處除了是世界最大郵輪以外,更像是一座巨型複合式酒店兼 shopping mall,食玩住通通都有,由朝早9點玩到夜晚12點都冇問題(只要有過人的體力)。心思思想上郵輪玩但又怕悶得滯中伏,今次編輯部一次過公開郵輪各.種.設.施,等未去的旅客有定心理準備有咩好玩,也不怕上到郵輪會錯過好玩設施!

上船前就會經過多面鏡的隧道。
上船前就會經過多面鏡的隧道。

玩足全日!超強玩樂設施

如果以為郵輪只有賭場、自助餐餐廳就太看小時下的郵輪了。作為 Oasis 級的海洋交響號,有齊皇家加勒比最強的玩樂設施,以玩盡「海、陸、空」來稱呼所有玩樂設施都不為過,有刺激、有動腦筋,也有要花力氣,連大人都可以放足電!

16 樓放眼過去,大部分都係玩水設施,正面就是三條滑水梯 The Perfect Storm。
16 樓放眼過去,大部分都係玩水設施,正面就是三條滑水梯 The Perfect Storm。

玩樂01|玩到頭暈!10層樓高郵輪滑梯 Ultimate Abyss

位於 16/F 的 Ultimate Abyss 是海洋交響號的賣點,由 16 樓一直瀡到 6 樓,不費 10 秒就落到 6 樓!除了瀡落去第一下有些少離心力以外,全程都沒有太大刺激感,小朋友玩都冇問題。但因為滑梯以大量彎位設計,轉到記者頭暈暈之餘,一不小心仲撞親頭,而且滑梯墊非常防滑,去到6樓滑梯口就立刻停低,是絕對不會有衝出梯口的感覺。要注意!滑梯只限著褲或長裙的旅客玩。

向後拗腰睇,刺激的 Ultimate Abyss 竟像個大心形。
向後拗腰睇,刺激的 Ultimate Abyss 竟像個大心形。

入口就是一條可怕的食人魚。
入口就是一條可怕的食人魚。

【#GOtrip大激玩】 有冇諗過在大海中心玩滑梯?仲要10層樓咁高!皇家加勒比海洋和悅號就有得玩,這條海上滑梯Ultimate Abyss,全程迷彩管道,仲會經歷2個360度急彎,好想玩啊😍上cruise注意事項: www.gotrip.hk/?p=132765▼申請DBS Black Card享低至1蚊1里,輕鬆賺里數!p.nmg.com.hk/bfjz78▼Jet lag 怕什麼 | 3 招教你適應時差問題www.gotrip.hk/?p=125481▼飛機上最Dirty的地方,竟然不是洗手間?www.gotrip.hk/?p=127455▼搭飛機 6 招健康秘訣www.gotrip.hk/?p=125586

Posted by GOtrip 旅遊看世界 on Wednesday, April 4, 2018

玩樂02|超新奇!郵輪上的 Zipline

海洋交響號上同樣配備 Zipline,一樣位於 16 樓,Zipline 的長度目測不過 30 米,望落去就是 6 樓的平台,心血少啲都腳震震,而且要全程捉實繩上扶手,少啲臂力都搞唔掂!玩之前需要除晒身上所有飾物兼簽張生死狀,輪候時間都比其他設施長,落地一刻比起一般叢林 Zipline 來得快。

Zipline 長度雖然短,但保護裝備一樣要著足。
Zipline 長度雖然短,但保護裝備一樣要著足。

終點會有教練接住,但衝力也是不小的!
終點會有教練接住,但衝力也是不小的!

玩樂03|背住蔚藍地中海玩……攀石!

攀石牆位於 6 樓 Aqua Theater 旁邊,上一層樓梯就會見到!有4種難度選擇,最矮紅色石,最難頂必是黃色石牆,一共有兩名教練駐守,上去前要著好裝備兼換鞋。未玩到攀石的記者上到一半已經筋疲力盡,而且背對住地中海玩攀石,感覺過癮之餘,亦增加刺激感。

記者從未玩過攀石,攀咗十米已經腳震震,現場仲要非常大風。
記者從未玩過攀石,攀咗十米已經腳震震,現場仲要非常大風。

兩名教練會在旁指導,體育系出身的他們勁專業。
兩名教練會在旁指導,體育系出身的他們勁專業。

玩樂04|刺激好玩!3條濕身滑梯 The Perfect Storm

天氣凍,記者就冇親身上去試玩,但見其他人玩完都會跑上去玩多次!總共有三條滑梯,其中兩條就冇咁刺激,另外一條就有埋大喇叭轉筒,衝擊力極大,玩時要小心會衝甩 bikini。

要玩 The Perfect Storm,都係著番件連身泳衣好啲。
要玩 The Perfect Storm,都係著番件連身泳衣好啲。

玩樂05|型仔教練埋身教.船上沖浪 FlowRider

沖浪就唔一定喺沙灘先玩到,船上都有,仲有型仔教練一對一指導(只要你不怕途人的目光)。兩名教練會先教左右移動,控制到後,就可以自己嚟。當然,未玩過沖浪絕對不容易,個個都會跌到一仆一碌。唔想做眾人的注目點,可以欣賞型仔教練表演花式沖浪。

教練們一冇遊客,就會自己表演。
教練們一冇遊客,就會自己表演。

只要不怕途人目光,大肚腩都可以輕鬆上陣。
只要不怕途人目光,大肚腩都可以輕鬆上陣。

玩樂06|周街 Jacuzzi

上郵輪唔想日日都咁刺激,就梗係要梳乎下曬太陽之餘,去浸下遍布 15 樓的 Jacuzzi!不是開玩笑,15 樓有一半的船艙都是周圍 Jacuzzi,而且旁邊大多附帶酒吧,可以攞杯飲品邊享受地中海的陽光,邊嘆 Jacuzzi,只係幻想都覺得是人生一大樂事啊!

Jacuzzi 的景觀開揚,而且陽光充沛,度假 feel 出晒嚟!
Jacuzzi 的景觀開揚,而且陽光充沛,度假 feel 出晒嚟!

唔少型男都會 show 晒肌浸浴,大飽眼福。
唔少型男都會 show 晒肌浸浴,大飽眼福。

玩樂07|最新設施!Laser Tag

Laser Tag 設於溜冰場內,鋪上一塊地墊就由溜冰場變成遊玩設施!Laser Tag 名副其實用激光進行遊戲,分成 2 teams,用激光玩 war game,直至對方隊員全部被消滅!場內比較暗,所以進行遊戲時都要戴上裝備,每次遊戲約 20 分鐘。

Laser Tag 全場螢光色,著白色衫一流。
Laser Tag 全場螢光色,著白色衫一流。

玩樂08|考考智慧.密室解謎 Puzzle Break

Puzzle Break 的設定是在海洋裡的潛艇,只有一個小時利用房內提示逃出密室,房間超細,同香港一般的密室逃脫差不了多少,不要有太大期望。

記者當日雖然冇得試玩,但密室設計非常精緻。
記者當日雖然冇得試玩,但密室設計非常精緻。

話明潛艇,當然就有潛望鏡。
話明潛艇,當然就有潛望鏡。

玩樂09|放電一流!超多 game room

15 樓同 6 樓都各自有 game room,15樓的 game room 面積更大,有不同的賽車跟射擊遊戲,氣墊球都有兩大部,大人細路都玩得,絕對是個海上版機舖。但要注意,並不是所有遊戲都是免費,所有夾公仔機都需要收費。

最大 game room 有兩台氣墊球。
最大 game room 有兩台氣墊球。

玩樂10|少之又少.海中心的旋轉木馬

旋轉木馬出名是港女打卡熱點,在船上海中心的旋轉木馬更吸引不少人的目光!雖然木馬座位只有20個左右,但也有不少人特地去坐一轉,畢竟香港只有兩大樂園有旋轉木馬,上到郵輪坐一次,可重新感受那種歡樂。

旋轉木馬大人細路都啱玩。
旋轉木馬大人細路都啱玩。

玩樂11|百老匯傳奇 show.《Hairspray》

來自百老匯的 《Hairspray》 進駐海洋交響號,贏過各個大獎,集合音樂加話劇,歡樂的氣氛讓人不自覺跟著一齊搖擺。 《Hairspray》 在最大的 theatre 演出,可以容納非常多的觀眾,絕對不怕會冇位坐!

《Hairspray》 演員一出場就會同觀眾有互動。
《Hairspray》 演員一出場就會同觀眾有互動。

能在郵輪上睇到高質素百老匯歌舞劇,超值!
能在郵輪上睇到高質素百老匯歌舞劇,超值!

玩樂12|雲集最出色跳水選手.Aqua Show

踏入4月,巴塞隆拿仍然是涼風陣陣,夜媽媽 11 點要我去 Aqua Theatre食風 睇水表演,我本來是拒絕的。Aqua Show 表演唔止是有大隻型男跳水,仲有各種水上表演,睇到個個目瞪口呆,都忘記了一直在平台吹風!

表演者超輕鬆在繩上彈來彈去,睇得全場都拍爛手掌啊!
表演者超輕鬆在繩上彈來彈去,睇得全場都拍爛手掌啊!

3米彈板的跳水同樣精彩。
3米彈板的跳水同樣精彩。

【海洋交響號】全球最大郵輪!記者直擊 食、玩、住:10層樓滑梯、Zipline

玩樂13|最強花式溜冰.1977 Ice Show

雖然是花式溜冰,但絕對不會有羽生結弦的出現(笑)。《1977》集合多位花式溜冰的好手,表演各類型的花式表演,正正是一套冰上的舞台劇,雖然沒有一句對白,但也看得觀眾拍爛手掌。

滑冰表演者會以不同造型現身。
滑冰表演者會以不同造型現身。

高難度動作多多都有!
高難度動作多多都有!

玩樂14|曬太陽一流.Solarium

Solarium 只限成年人進入,可以讓一眾旅客避免聽到小朋友尖叫的聲音,也不怕到處跑的他們!裡面有不下4個Jacuzzi,超多曬太陽的梳化,一旁就是落地大玻璃對住地中海,而且有個酒吧,可以攞杯酒對住個海成日都得!

冇小朋友入嚟大吵大鬧,嘆酒曬太陽一流!
冇小朋友入嚟大吵大鬧,嘆酒曬太陽一流!

【海洋交響號】全球最大郵輪!記者直擊 食、玩、住:10層樓滑梯、Zipline

飲飽食醉冇問題!20間餐廳食到飽

上郵輪的目的除了停 port 之外,就係唔使多花額外的錢都可以飲飽食醉!海洋交響號有多達20間餐廳,當中也有不下6間的餐廳提供免費餐飲,任食任飲冇問題。但要注意,郵輪上只限18歲或以上的旅客可享用酒精飲品(美國出發的話21歲),所以點酒之前,定必要留意。

5 樓有超多餐廳任食。
5 樓有超多餐廳任食。

必食01|第一間英式海鮮餐廳.Hooked Seafood

第一次有英式海鮮餐廳進駐皇家加勒比的郵輪,而且提供任食套餐,雖然未包括在郵輪的膳食套餐內,要額外畀錢,但可以食到最新鮮的龍蝦、生蠔等!Hooked 為 casual dining 餐廳,唔使驚要著到非常整齊先可以進餐!

記者試食當日就只得龍蝦包。
記者試食當日就只得龍蝦包。

相信正式開業後,會有更多選擇。
相信正式開業後,會有更多選擇。

必食02|全新小食店!墨西哥小食.El Loco Fresh

位於 15 樓的 El Loco Fresh 也是第一次進駐皇家加勒比,包含在膳食套餐內,可以食盡各式各樣的墨西哥小食!剩係墨西哥玉米片都可以揀芝士或者肉醬,taco 同 burrito嘅餡料都可以自己選擇,餐廳對住大海景,在一旁玩完水就可以過嚟開餐!

El Loco Fresh 裝潢色彩繽紛。
El Loco Fresh 裝潢色彩繽紛。

水果同墨西哥餡餅都係任食!
水果同墨西哥餡餅都係任食!

同朋友一齊望住海景食墨西哥小食,寫意~
同朋友一齊望住海景食墨西哥小食,寫意~

必食03|最新進駐糖果店.Sugar Beach

Sugar Beach 位於郵輪 6 樓,旋轉木馬旁邊,主打糖果跟雪糕,但全部自費。雪糕並非 gelato,一般雪糕跟雪葩都有提供;而糖果就逐克計算,除非當下好想食糖或者雪糕,否則不光顧都不會後悔。

Sugar Beach 也是另一個打卡好地方,有七彩糖果可以慢慢影。
Sugar Beach 也是另一個打卡好地方,有七彩糖果可以慢慢影。

雪糕就非免費了,兩球盛惠HK 。
雪糕就非免費了,兩球盛惠HK$47 。

必食04|機械人調酒師.Bionic Bar

(同樣是自費)之前的 Harmony of the Seas 都有的 Bionic Bar,全部飲品都由機械人調製。首先利用平板電腦點飲品,可以揀已經由程式編好的飲品或自己選擇分量,之後就等機械人為你特別調配。機械人調酒師絕不是有姿勢冇實際,平均分半鐘就會調製好一杯飲品。但缺點是全部都是由程式編好的飲品,就不會有調酒師的個人特色了。

各種酒品倒吊在天花板,機械人手臂就會在 order 後自動去取。
各種酒品倒吊在天花板,機械人手臂就會在 order 後自動去取。

Bionic Bar 沖出來的飲品也是有板有眼,盛惠US 。
Bionic Bar 沖出來的飲品也是有板有眼,盛惠US$12 。

必食05|浮動酒吧.Rising Tide Bar

Rising Tide Bar 在皇家加勒比的郵輪不是新鮮事,但對於不少人來說,一定非常少見!這間酒吧的特別之處是會上下浮動,會從5樓升上8樓中央花園,再由花園降落至5樓!只有約20個位置,可以跟朋友們飯後在這邊聊聊天、喝一兩杯,盡享在郵輪上的閒情逸致。

Rising Tide Bar 就像一隻巨型太空船從天而降。
Rising Tide Bar 就像一隻巨型太空船從天而降。

想入去飲嘢就要把握機會,因為兩層停留的時間都不太長。
想入去飲嘢就要把握機會,因為兩層停留的時間都不太長。

必食06|自助早餐.Windjammer Marketplace

一般郵輪會包埋 room service 早餐,但記者試搭當日因為乘客太多,所以未能預先準備!惟有上 16 樓的 Windjammer Marketplace 食自助早餐。餐廳環境寬敞,自己搵位自己攞餐具自己攞食物,全部都係自己嚟。餐廳食物款式眾多,飲品都有10款以上,絕對可以食飽先落 port 大玩特玩!

早上 9 點的 Windjammer Marketplace 非常多人,全部乘客都把握最後早餐機會。
早上 9 點的 Windjammer Marketplace 非常多人,全部乘客都把握最後早餐機會。

連麵包都有8款選擇。
連麵包都有8款選擇。

必食07|任點 Casual Dining.Main Dining Room

Main dining room 位於 4 樓,名副其實乜都可以點,是所有旅客可以進餐的地方,一日三餐都可以在這邊搞掂!每日餐牌都有些少不同,但基於免費任點,記者強烈推薦可以多點一兩個甜品試試,當中最推薦一定是士多啤梨芝士蛋糕,用料超足,有鋪滿成隻碟的士多啤梨跟士多啤梨醬!

5 成熟的牛扒剛剛好,食落不會太乾,配埋超大個焗薯。
5 成熟的牛扒剛剛好,食落不會太乾,配埋超大個焗薯。

焦糖布甸仲可以跟多個雪糕,絕對可以食到肥肥白白啊!
焦糖布甸仲可以跟多個雪糕,絕對可以食到肥肥白白啊!

必食08|老竇帶埋囝囝去都得!Playmakers

有時候帶住小朋友又想去飲番杯,冇理由留低小朋友一個喺房。而第一次進駐郵輪的 Playmakers 就迎合晒爸爸同囝囝的需要,一邊是運動酒吧,睇波之餘,可以飲埋酒,另一邊就是 game room,有 Mario Kart 又有夾公仔機,也有籃球機,小朋友可以在這邊瘋狂放電!

Playmakers 晚上更有氣氛。
Playmakers 晚上更有氣氛。

同其他朋友在郵輪上睇波,人生一大樂事。
同其他朋友在郵輪上睇波,人生一大樂事。

【海洋交響號】全球最大郵輪!記者直擊 食、玩、住:10層樓滑梯、Zipline

必食09|仲有Jamie’s Italian

其實郵輪上仲有非常多的餐廳選擇,當中已包膳食套餐的餐廳也有不少,例如快餐店 Johnny Rockets 等。但如果想食正式少少的 fine dining,大部分都位於中央公園,有 Jamie’s Italian、Wonderland Imaginative Cuisine等較高級的選擇,不過當然要自費啦!

Jamie's Italian 在海洋和諧號時已有進駐。
Jamie’s Italian 在海洋和諧號時已有進駐。

Johnny Rockets 可以滿足你想食美式漢堡的心願。
Johnny Rockets 可以滿足你想食美式漢堡的心願。

士多啤梨奶昔用原個雲呢拿雪糕打勻而成。
士多啤梨奶昔用原個雲呢拿雪糕打勻而成。

SORRENTO'S 是專門食pizza的餐廳。
SORRENTO’S 是專門食pizza的餐廳。

豪住郵輪!最平一萬蚊一間房

郵輪有各式各樣的房間,冇窗房、露台房,及豪華至有專屬管家的套房都有,記者官網所見,由巴塞隆拿出發玩足7晚,最平的內艙房都要 1 萬蚊港紙!中途會停各國 port,抵唔抵住就見仁見智了。

普通一間房每人都要過萬蚊(非圖片所示房間)。
普通一間房每人都要過萬蚊(非圖片所示房間)。

豪住01|間房大到有滑梯!Ultimate Family Suite

海洋交響號最特別的房型定必是這間有滑梯的家庭套房!樓高2層,無論是大人還是小朋友都可以從滑梯瀡落嚟,出面 Ultimate Abyss 玩唔夠可以返房繼續玩。房間設有小朋友專用的廁所、兩張小朋友的雙層床(下層是梳化);房間面向 Zipline 部分,露台也有 Jacuzzi,可以自己一家盡嘆私人 Jacuzzi!

玩唔夠 Ultimate Abyss,可以在房內瘋狂瀡滑梯。
玩唔夠 Ultimate Abyss,可以在房內瘋狂瀡滑梯。

而且有小朋友專屬的打機區!
而且有小朋友專屬的打機區!

小朋友的洗手間有埋電視播卡通片。
小朋友的洗手間有埋電視播卡通片。

豪住02|超巨型套房.Royal Loft Suite

Royal Loft Suite 最大賣點就是剩係一間房,都有過千呎的面積,喺香港住慣蝸居,可以畀錢在這邊豪嘆最巨型套房!而且最大型套房都會有 royal genie -專屬管家,可以預訂船上所有設施。但當然所費不菲,如果玩足7晚就要 18,500 蚊……美金,即係要 10 萬以上港幣,以上價錢是每位乘客的價錢,真係超豪華!

Royal Loft Suite 除了主人房,下層仲有客房。
Royal Loft Suite 除了主人房,下層仲有客房。

剩係浸浴位都值回票價。
剩係浸浴位都值回票價。

豪住03|海景露台客房.Ocean View Balcony

一般的海景露台客房有齊最基本設備,一張雙人床、露台等,但洗手間就只具備企缸。房間有全身鏡,而且房間夠打開兩、三個 29″ 行李,有埋 2 個 USB 插頭,絕對不怕唔夠空間!

普通露台房空間都足夠。
普通露台房空間都足夠。

但站在露台的話,非常容易望到隔籬房。
但站在露台的話,非常容易望到隔籬房。

一般房就只有企缸。
一般房就只有企缸。

影相位:半空玻璃觀景台

記者周圍行,尋尋覓覓竟然在14樓的船頭見到個半空玻璃觀景台!底下就是汪洋大海,站在玻璃上面膽細啲都嚇餐飽!但這個位置極級大風,想影張靚相可以選擇坐低,不然頭髮定必會亂了。因為觀景台太隱蔽,基本上旅客難以發現,嚟緊會上船的記住去打卡!

船頭附近有個玻璃觀景台。
船頭附近有個玻璃觀景台。

貼心服務!每日一張郵輪指南

每一日都會有一張郵輪指南寫上當日天氣、早餐時間、各種設施的開放時間跟表演時間,旅客可以跟著指南去編排行程!每間房都會有一張,靠著呢張 Cruise Compass 就可以玩勻成隻船,減少摸門釘的機會。

慢速 Wi-Fi 天價收費!

上得郵輪,不少人都擔心 Wi-Fi 問題,冇錯!郵輪上的 Wi-Fi 是要收費,還要非常貴,想上網兼睇片的話,每部機每日要HK$160,去足7日的話,就要用上過千蚊上網。而速度就只有泊岸的時候比較流暢,在海中心的一段長時間都無法好好接收,連 load facebook 都有難度,但冇計,郵輪只能接收衛星信號,倒不如放下手頭上工作盡情玩好過。

Wi-Fi 可以上船先申請!
Wi-Fi 可以上船先申請!

過萬蚊一位!包來回機票

記者粗略地搜索了郵輪的套票,在巴塞隆拿出發玩7晚連機票,最平一位盛惠 HK$10,099!而且一定是兩位乘客才是這個價錢,仲要加稅、各種雜項,如果成家一齊去3-4萬少不了。郵輪會中途停法國、意大利跟西班牙,屆時可以上岸玩,抵唔抵都係嗰句,見仁見智。

但如果有少少閒錢,帶屋企人去玩是不錯的選擇。
但如果有少少閒錢,帶屋企人去玩是不錯的選擇。

下一頁:坐郵輪前一定要睇! | 注意 5 大安全問題

【海洋交響號】全球最大郵輪!記者直擊 食、玩、住:10層樓滑梯、Zipline

相關文章