八、九十年代既ETV 英文科片頭大家應該好記得,入面D 細路好似撞邪咁係咁講Hello Hello Hello Hello好鬼洗腦架!嚟到英國,發覺現實生活中,英國人係唔會狂Hello,而係講一句起初令我覺得怪怪的問候:”You alright?”

仲記得剛剛搬嚟嘅時候,喺宿舍嘅共用廚房識到我後來既好朋友阿Jo,佢由第一次見我到後來每次見我,都會問我“You alright? ”起初真係覺得勁怪,因為我既認知中,問人“You alright? ”通常都係有D 咩怪事發生,或者有人唔舒服,氣氛怪異嘅時候先會咁問,所以第一次聽到阿Jo 問我“You alright? ”,我一臉困惑地:”YEAH?!”

後來發現“You alright? ”係英國人嘅”Hello.How it’s going.” 佢哋唔係真係expect 你會答,我由起初會一輪嘴答阿Jo我果日做咗D 咩,有時真係諗到頭爆,到到後來慣咗,就學精了,就係回佢一句:Good,You alright. 到到依家直情學曬英國人D 嘢,就係一見面,同時講”You alright. ” 咁就省卻咗回答,有時要鬥快o架!哈哈

以上都係講笑姐,其實我好欣賞每次見面都互相問候一輪呢個文化,無論喺學校、工作環境或者宿舍,只要肯花些少時間chitchat 問候下人,就永遠都唔會出現尷尷尬尬嘅deadair 場面啦,其實就好似上一代D 廣東人鍾意問人「食咗飯未」咁樣,唔係真係想知、但又可以向對方表現友善,Why not ~~~~ You alright ?

相關文章