冇趕及早前深圳 teamLab 唔使灰心,因為澳門 teamLab 今日正式開鑼!門票定價MOP150,足足比起深圳版平咗$120,打卡位當然同樣有,記者率先去體驗 澳門 teamLab ,記低以下5個入場影相攻略。

文:Kassidy|圖:Day

澳門 teamLab 影相位逐個數

雖然澳門 teamLab 主打親子互動體驗,一眾去到想打卡的港女們絕對唔使灰心。在記者精挑細選下,4個園區裡面都可以找到最少5個影相位,記住著定套淺色衫去瘋狂影相!

澳門 teamLab
澳門 teamLab 佔地不算大,但開放式空間,影唔夠喉可以返轉頭繼續影。

01|山脈與山谷:彩色投影

呢部分定必是澳門 teamLab 最矚目的影相位,有不同動物的投影會在山谷出現,入到去可以同投影動物互動兼同佢哋合照,但係要預咗呢個區域非常多人,所以入到場館後,第一時間記住即刻去呢個位!

澳門 teamLab
山脈與山谷的位置係凹落去,行落去要小心!

02|巨型投影鯨魚

呢隻鯨魚會喺山脈與山谷之間到處遊走,唔使迫入山谷位都有機會影到呢隻鯨魚,彩色燈光打落塊臉度再影相會非常好睇!

澳門 teamLab
隻鯨魚會周圍遊走,想捕捉到佢都唔容易⋯⋯

03|聖誕倒影彩繪

啲人成日講嘅「天空之鏡」同樣可以喺度搵到,以為呢一部分螢幕剩係用嚟做互動同投影就太浪費,細心一看地板非常反光(也要小心裙底走光),走到螢幕前面,除了有投影打落件衫度,仲可以影埋地板上的倒影。

澳門 teamLab
呢幅投影牆也不能錯過,加埋塊反光地板「天空之鏡」。

澳門 teamLab
坐在地上盤腿影也不錯,但開幕時分應該會比較多人,要把握好時機。

04|彩色光球

呢個位睇落只有玩嘅元素,但其實影相都一流!因為天花同地下都會充滿彩色光球,只要一觸碰佢就會轉色同發聲,港女們都可以攞住個彩色波嚟影相。但要記住!千祈千祈千祈唔可以拋起個波,用推同碌嘅方式就最好。

澳門 teamLab
成張相都會充滿彩色光球,但記住要揀啱顏色先好按快門。

嗱⋯⋯綠色燈就會變成青BB嘅樣,有撞鬼感覺。

05|最後一站:霓虹光管

以為玩晒成個場就可以收埋相機就大錯特錯,離開之前仲有一個打卡位,用霓虹光管寫成的「Bring Art to Life」,絕對不能錯過這個位置。

霓虹光管的「 Bring Art to Life」 是出口前最後一個影相位。

如果幫女朋友影相不妨用直度,橫度就會變得非常矮(如圖)。

記者教路 入teamLab前必讀!

每個時段只限150人進場,記者去的當日有30、40人已經要等位影相,仲要場地暗,唔容易影得好,即刻睇記者去完澳門teamLab後最齊全的入場攻略,幫女朋友/閨密好好影相!

入到去影靚相其實唔簡單。

入場攻略01|手機影都得,相機更佳

總有一啲人去到以為 iPhone 可以走天下,但teamLab燈光都比較暗,用電話影感光度不足,好容易影到非常多雜訊,放上Ig一點點都唔好睇,所以唔想女友失望,請準備一部相機去。

雖然用手機影都有1MB照片,但放落電腦一睇,全部都係一點點。

入場攻略02|著淺色衫更好睇

入到 澳門 teamLab 咁黑嘅環境,著深色衫只會令自己完美地融入背景,倒不如著淺色衫凸顯自己,燈光投射落去淺色衫也會更好睇。

著黑色衫就可以完美同周圍環境融為一體。

入場攻略03|周末6:00pm人流最少

teamLab嗰邊就講到,因為暫時已經賣出超過一半的門票,想少人啲入到去影相,當然揀最好的入場時間。暫時來說一定是平日最佳,如果一定要周末進場,揀6:00pm時段會比較少人,捱一陣餓,影完出嚟再去食!

唔想去到等入場,一定要上網買定飛啊!

入場攻略04|著平底鞋

場內有兩個位置都禁止著高跟鞋入去,一是光球影相位(怕整爛光球),第二個就是山脈與山谷(一大個凹位),唔想入到去要除鞋咁麻煩,都是乖乖的著平底鞋入場吧!

呢個位置有一個凹位,行落去要小心。

唔單止著平底鞋,著膠底鞋會更好⋯⋯

入場攻略05|禁止自拍棍、腳架、閃光燈

入到去是絕對嚴禁使用自拍棍、腳架同閃光燈,因為非常騷擾其他遊客,而且會有小朋友走嚟走去,所以去teamLab想影相,記住帶多個伴去幫手揸機!

唔想特登攞嚟抽,都係唔好帶腳架入去喇!

澳門teamLab未來遊樂園
日期:2017年12月1日至2018年2月28日
地點:澳門美高梅展藝空間
時間:1:00pm-10:00pm(一至五),10:30am-10:00pm(周末及公眾假期)
門票價錢: 普通票價MOP150,澳門居民票價MOP120
網址:澳門teamLab

相關閱讀:蠟筆小新登陸澳門!澳門蠟筆小新特展春日部大冒險

相關閱讀:靚景自助餐+豪華纜車 | 澳門行程 2日1夜 勁食懶人包

相關文章