明白大家都愛掃韓國護膚妝物,仲要未必係揀人人都知的大牌去追捧,反而好相信韓妹嘅真實用家反應。編輯部在弘大攔途截擊20歲以下嘅學生妹sss,睇睇佢哋最近又用緊咩人氣夏日 韓國 美妝品 。

text:CKL | photo:Woody

01 | 預防黑頭必備:COSRX白頭水

熱到死嘅夏天又係面油白頭黑頭蒲頭嘅季節,對女仔嚟講,有黑頭簡直肉酸過生暗瘡。所以喺黑頭未成形前,已經用定預防去白頭嘅專用護膚品。韓妹界最近大熱推介COSRX AHA7白頭水,只要敷喺鼻頭上,約5分鐘洗走即可,一星期兩次,就可擁有白滑鼻頭。品牌強調成分係75%蘋果水、7%果酸成分Glycolic Acid,算係mild唔怕太刺激,但店員都建議不宜用得太密。

大型Aland專賣護膚品的counter都會見到。

View this post on Instagram

TGIF💆🏻

A post shared by COSRX Official (@cosrx) on

「關於鼻嘅保養,我哋全部女同學都會用COSRX AHA7;味道唔係太好聞,但勝在works,用完後好少會生白頭黑頭。」

大學生양현진(21歲)

02 | 唔做「狐Seoul妹」:Labiotte香體膏

好少女仔有狐味,但如果出汗太勁都會無可避免有少少汗味。要keep住香的話,香水係大家的好朋友,但香水始終揮發性太強,噴唔夠一個鐘已經冇晒香味,所以韓妹好鍾意用香體膏。

碌碌碌的香體膏揮發性低,碌兩碌可以香半日。近日大熱嘅有TonyMoly年輕副線Labiotte(話說我覺得TonyMoly已經感覺好年輕),之前推出嘅酒樽形唇彩瘋魔韓國全城,新出嘅隨身小香膏都係用酒樽形,瘦瘦長長大過潤唇膏少少,放入袋易收藏。

雖然韓國香體膏有好多種,韓妹話揀Labiotte係因為佢強調冇任何酒精成分,只用成分天然的基底油,敏感肌也一定用到。

購自弘大Labiotte專門店。

總共有4種味,韓妹推介呢款橙色Fine Fever係用柑橘油做基底;香氣好清新亦好突出,唔會俗氣。

Labiotte柑橘味香體膏

「一系列香體膏香味都好清新,而且唔係用酒精成分,香氣可以keep好持久。搽喺手臂內側或者手腕部位,每個動作都會聞到香氣,好醒神。」

大學生박샘이 (20歲)

03 | 金所炫代言勁斷貨唇妝:Peripera

Peripera系列唇妝,價錢平又多色揀,一直都係韓妹的心水,加上仲有10代人氣女星金所炫代言,更加受歡迎。Peri’s Ink Velvet今年S/S全新5色一出即賣斷巿,我走咗幾間Olive Young先買到一支#15色Girlish Red。

金所炫代言以來,Peripera唇妝都勁斷貨,尤其桃紅色最難搶!
金所炫代言以來,Peripera唇妝都勁斷貨,尤其桃紅色最難搶!

搽嘅時候質感好水潤,但係得出嘅唇色係霧面感,最重要係持久6個鐘都唔甩色。

Peri’s Ink Velvet #15色Girlish Red唇妝(購自Olive Young)

「Peripera肯定係我哋嘅心水唇妝品牌,每次出新色都會一窩蜂衝去買。顏色靚選擇多而且好顯色,最近嘅Ink Velvet,身邊個個朋友都搶#13色Charming Coral,但好難買,成日斷貨。」

高中生김정은(18歲)

04 | 擁有韓式空氣劉海:Staroll USB髮圈

韓式空氣劉海仲流行?係,熱潮係稍退咗,但係依然熾熱,人氣女團Blackpink的Rose全新MV〈As If It’s Your Last〉裏面首次嘗試空氣劉海造型,立即被人狂讚可愛,而且望落更年輕。

Blackpink MV YouTube截圖

要keep住空氣劉海,一定要用髮圈,仲要係無時無刻得閒就用一用。韓國坊間有好多款USB髮圈,但據聞連EXID嘅Hani都用嘅Staroll最受歡迎。

Staroll 髮圈購自Olive Young

髮圈有38mm同埋50mm大細圈選擇,只要捲住1分鐘已經有理想/你想嘅鬈度。

「身邊個個朋友都係用呢個牌子,叉電時間只需要2-3分鐘,好方便。最重要係有50mm大圈選擇,令空氣劉海造型更加自然。」

大學生김이주(20歲)

05 | 穴位按摩Mask:Mediheal面膜

Mediheal嘅mask款式多又夠搞鬼夠噱頭,一直好受超級熱愛自拍嘅韓妹歡迎,老實講,除咗噱頭其實佢哋嘅mask又係幾works所以先受歡迎嘅。強調所有產品都係經皮膚科醫生測試,咁就可以保證安全啦。

http://instagram.com/p/BV4tfwBDX-A

近排最人氣一定係呢款布滿晒穴位按摩位置嘅mask啦。一攞上手就見到好多點點,放上面後,就跟住點點去按壓下當按摩紓緩下囉。怕位置唔啱,最好係對好兩邊眉頭嗰兩點位置先放上面。

Mediheal穴位按摩mask

參考下網友點放張面膜,記住金屬點點向外。

http://instagram.com/p/BU-3v7BD2iZ

「Mediheal的mask好多花款,高中時的同學仔個個都會買來用,自拍夠噱頭嘛。呢款可以配合按摩穴位好好玩呀,有種一物二用感覺,係價錢貴少少,不過都接受到。」

大學生이주연、임수빈、강세희(全部19歲)

相關文章