近日有化妝師在社交網站出文,指為新娘完成十多個小時工作後,對方拒絕繳付尾數及超時工作費用,引起網民討論。其實最易被搵笨行業,又點止化妝師,好似之前有單hit爆的「港媽向攝影師搲sponsor」事件,請1個freelance攝影師到1個party,幫45個家庭影相,酬勞就係幫佢like同share作品。

問心講,香港唔少人鍾意貪小便宜,呢啲人本身唔係冇錢,但下下都要攞着數。小編自問面皮唔夠厚,真係好難做出呢啲要求。

其實有幾個行業,成日都被人搵着數,一知你做呢啲職業,就扮晒老友話:「幫幫手啦,唔係唔俾面啩?」推又推唔到,做又得雞碎咁多錢,甚至冇錢收,所以最好方法就係避開唔好做呢啲職業。究竟邊啲行業最易被搵老襯呢?小編閒閒哋都數到以下6個:

01|攝影師

呢個行業真係十分高危,單睇樓上的例子都知啦。更多時候係,好多人結婚,都係拍下膊頭,叫朋友幫手影婚紗相,最後係咁易封番一百幾十蚊利是作報酬,但就搞足你成日,呢啲老友真係要認清楚喇。

老老實實,攝影師唔係剩係按個快門就搞掂;先唔講技術,攝影器材全部私伙,又鬼死咁重,出去外影孭住喺身,好多時都搞到腰骨痛,仲有執相嘅時間同心力呢?攝影師絕對唔係個輕鬆嘅行業。影video的攝影師,仲要講求sense,剪片要的時間更多,收你嗰幾千蚊真係唔係白收。

 

jobs_0324_07

02|I.T. 人

作為I.T.人,最怕被親戚知你識電腦,大至砌機、寫program,小至賣電腦、安裝寬頻等等。因為當佢部電腦一有少少問題,就會即刻搵你幫佢修理。 無論係上唔到網、中咗毒、run得慢定係條線鬆咗,全部都關你事。

你唔好以為唔聽佢哋電話就得,因為佢哋轉個頭就會WhatsApp send張圖俾你,話你知有乜問題。已讀不回?哈,藍tick後10分鐘你就會收到你阿媽電話,問你做乜唔應阿姨媽,再加多句:「親戚一場,放工得閒咪去幫下手囉!我會留飯俾你喇!」

收工冇嘢做就要幫你整機?仲要整完一句唔該都冇,加多句你整得咁慢,咁唔pro呀!除咗爆粗之外,實在俾唔到其他任何反應……人哋外面整機佬上門檢查發現冇乜問題都收你幾舊啦,更何況I.T.人唔係整機佬。

你識寫網頁就仲大鑊,得閒就會有朋友懶friend咁,問你可唔可以幫佢哋手平平哋整個公司網頁。簡單整當然冇問題,不過做落就多多意見,又話張圖唔夠靚,仲話要加購物車等特別function。最後計完,朋友價8折咗都要幾萬元,但最後有人夠膽講,佢「畢直」其實預2、3千元,當堂O嘴。

圖:pmaconsulting
圖:pmaconsulting

03|化妝師

化妝師同攝影師一樣咁高危,而且一樣係親戚結婚最易出事。首先話呢啲喜事,一世人1次叫你「收順啲」,跟手多多要求,要你半夜三更到達新娘屋企唔在講,仲要1日換5、6個妝,唔難嘅妝都唔叫你化。

jobs_0324_02

但化妝品又唔自己出,話自己嗰啲唔啱化新娘妝,最後仲要加多句俾個機會你練習下咋!真係正式使人唔使本呀!

jobs_0324_03

 

04|空姐

大家講起空姐,可能只會諗起佢哋可以周圍飛周圍玩好開心,但其實有苦自己知。近排歐元、日yen、澳紙都跌到好鬼平,突然就好多三姑六婆、唔熟的朋友會打電話,叫你幫個手買名牌袋、化妝品、生果、蜜糖……乜乜物物,應有盡有。

空姐喺飛機企咗成十幾個鐘,都攰都爆,想返酒店休息下都唔得,仲要幫人做埋代購走水貨。仲要回程時一抽二抽,搬啲唔係屬於自己嘅嘢返屋企,有時太攰截的士,真係連的士錢都蝕埋呀!最慘仲係返到屋企要逐個打電話,三催四請問佢哋幾時要番啲物品,有時仲要送貨上門俾佢哋,最後只係換來一句唔該。淘寶用順豐速遞由深圳嚟香港都要加幾廿蚊啦,依家老遠由歐洲、日本、澳洲運嘢返來,但就連餐飯仔都冇,都咪話唔陰功。

jobs_0324_09

05|司機(的士/小巴/貨van)

如果你做司機,最怕啲住附近嘅親戚。平日返工放工會WhatsApp問你開工未,會唔會有時間「順路」兜一兜佢返工放工。而「順路」嘅範圍又好闊,只要唔過海就係順路。有時shopping買嘢買多咗,又會問你有冇時間車佢返屋企,當然啦,到埗之後,又要你幫手擔擔抬抬,搬啲嘢返屋企。而小編聽過最過分嘅係叫個揸小巴嘅親戚,車成家人去沙灘BBQ,而一家人係包埋狗仔!

其實喺香港做司機真係好慘,養架車連油錢、停車場都好貴,尤其是貨van司機,睇GO GO VAN的收費,由觀塘入元朗都係150蚊左右,扣埋油錢真係唔賺得幾多,仲要得閒兜埋你啲親戚朋友,搵返來的錢隨時白做。

{"IPTC-DATA":"NMG","data":{"photoID":2397110}}

06|Sales

Sales同空姐都有同樣的煩惱,小編有個朋友喺某C字頭賣袋嘅名牌店做sales,佢同小編呻每年一到清倉減價,啲三姑六婆就會叫佢買袋,用盡佢個員工quota。仲要唔會去舖頭攞,係都要揀啲佢哋自己方便嘅時間叫你做埋阿四攞俾佢。最嬲嘅喺佢哋啲袋唔係全部自用,有幾個係幫朋友買,真係1打膠唔使找。

jobs_0324_04