有人話香港人特別崇洋,咩都覺得外國嘅特別好,但其實如果親身經歷過外國 打工仔 的生活,又真係會好明白點解咁多香港人都話唔想留喺香港。

澳洲工作文化 未夠鐘已收工


記得我喺澳洲時曾經去一間辦公室做過清潔散工,每日五點左右等啲人收工後就開始我嘅工作。我第一日返工就當然會早少少去到,一來想畀人一個好印象,二來都想睇下外國辦公室嘅辦公模式係點。不過當我滿心期待四點四十五分就去到office嗰陣,我望到的情景真係嚇我一跳!成個office都冇晒人,就連最後一個鬼佬執完嘢準備走嗰陣,都只係微笑咁同我講咗句thank you!

圖片來源: jllrealviews
圖片來源: jllrealviews

8 小時工作機制 OT 時薪超高

事後問番先知,原來澳洲大部分公司嘅機制都係 8 個鐘 working hours。之後如果冇特別需要就必須讓員工收工,如果真係需要 OT,頭兩個鐘 OT, 老闆要向員工支付多 50% 時薪,而兩個鐘後老闆就要畀雙倍時薪。我聽到眼都凸埋,唔怪得澳洲 啲 高層成日都未夠鐘就準備叫大家收工啦!

雖然唔使 OT,但佢哋又真係可以完成工作。諗番香港嘅辦公室機制,好多人因為唔敢太早收工而特登拖慢嚟做,又或者驚做得太快,老細又會畀多啲嘢自己做,諗住既然點都要OT,不如做慢啲,成個生態真係好唔健康。唔怪得人哋成日都話香港嘅打工仔真係一啲人權都冇啦!

喂,話時話,大家收咗工未?