「搭飛機遇上惡童」向來是旅遊人噩夢,英國訂票網站曾有調查顯示「43%乘客討厭搭飛機時遇到吵鬧的嬰兒」!早前更有印度廉航推出「機艙兒童安靜區」,將個別座位劃分成「兒童止步」,給願意多付些錢的乘客不同選擇,噱頭十足的決定,引來全球網友讚好,但同時亦有身為父母的搭客表示不公平,覺得小朋友附加費實在太唔公平。作為現役是父母,黃心遊世界其實也做過好多年背包客,家中女兒小玥剛滿一歲,好想分享一下「湊B搭飛機」心得!

以前冇BB時,每次飛,多多少少都會諗下附近會坐咩「短暫朋友」,你知啦!有時長途飛十幾個鐘話長唔長,話短唔短,「枕邊人」好重要㗎!

kids_flight001

比起嘈吵失控B 我更怕遇上的是:

  • 超大體形漢子,筆者自己都肥,不過真係有些面積係座位雙倍嘅朋友會照坐經濟。
  • 好興奮嘅媽咪,可能仔女第一次帶佢旅行,又可能幾十年姊妹一齊出國,全程興奮又緊張,講唔停,聲量你哋都估到啦!
  • 超級煙民,上機前煲定幾支煙先,食少幾個鐘好大件事,但我聞幾個鐘就冇得出聲。
  • 超級串友,基本上我平時坐飛機實會微笑點下頭,但佢就黑面,好多時全程黑面嗰隻,唔知以為一開始得罪咗佢。

所以說我哋對BB真係冇驚過,以自身過百次飛行經驗,遇到BB哭鬧不停,5隻手指數得晒,但碰到上述人士嘅機會一定多好多。再者,BB好似喊極最多一個鐘,雖然可能隔一陣又會嘈過,但佢哋瞓覺時間比例一定多,可能多過大人。kids_flight003

作為父母 準備最重要

好喇,到而家做咗人父母,有咗玥小姐喇,小姐而家剛剛一歲,既然阿爸阿媽旅行經驗唔少,咁我哋都好知普遍大家會在意咩或唔like咩嘅。

所以我都有好好準備,講少少準備咗咩啦!

  • 自己,飛機起飛同降落時都會餵媽媽奶,咁BB有吞嚥動作,對耳仔就唔會痛,如果冇餵母乳,咪飲奶粉,大啲可以飲水、飲果汁。
  • 玥小姐至愛嘅玩具,咬膠,不過小朋友咩都可以玩一餐。
  • 零食一定要有。
  • 一張被仔,做媽媽就懂的。
    kids_flight002
  • 最後是揹帶或hip seat (可以揹佢瞓覺覺豬或者行來行去)。

玥小姐第一次飛係半歲,我哋揀咗去日本東京,貪育兒設備完善,環境乾淨企理。
到玥小姐第二次飛就十一個月,因為爸爸比賽,都係飛日本東京,冇得揀。
今年玥小姐一歲兩星期就飛澳洲,今次挑戰夜機,8.5小時,我哋就來變湊B坐飛機達人,之後再分享啦!

半歲克服廉航飛東京

第一次我哋坐廉航,4個半鐘,瞓多過咩,醒時食下奶,畀個遙控佢玩下,都算好快到埗。不過一上機時,隔籬位姨姨一見我哋同BB一齊,即刻同空姐要求調去坐前面第一行,話就話畀多啲空間我哋一家三口,實情佢係咪真係咁諗就佢自己先知,咁嗰位空姐都冇say no,肯幫佢調位,嘩!廉航喎,第一行平時要畀多少少揀位費,帶BB坐飛機都益到人嘅。

第二次我哋就坐埃航,來回程,航空公司主動offer我哋去坐最前排,又提供BB睡眠籃,玥小姐上機係咁食食食,中段都有扭計,我就揹佢行下,有人都會眼望望,好彩玥小姐好鍾意撩人,非洲人、歐洲人、黑人、白人都撩,時間過得快啲。其實BB扭計時,要睇父母點處理,人哋見你又行又企,出盡法寶都唔得嘅話,可能或者條氣都順啲吖!如果你都冇預過點處理,手忙腳亂咁,或者愛理不理,其他乘客又真係會幾躁嘅。

兩次經驗之後,自己覺得帶BB坐飛機係就係唔容易,但只要準備好,其實又使咩驚喎,而廉航定普通airlines都冇所謂,總之,唔止飛機,坐咩公共交通工具,去咩公共空間,照顧好自己小朋友都係本分、係需要嘅,而人家不是故意讓BB扭計的話,又不能嫌棄太多嘅。

一句,互相尊重同包容啦!

kids_flight004

廉航推出「 兒童靜音區 」 | 你支唔支持?