去旅行前,一定要準備以下三寶:機票,有!酒店,有!外幣,未暢?作為旅記,每次出發都頭痕去邊度兌同點兌先至最抵。等我一次過詳盡解答所有疑問,教大家用最筍價及最方便方法 暢錢 ,仲有近年大熱的專人送外幣服務,以後唔好再咁傻,親身排隊喇!

01 | 香港兌定當地兌好?


除了日圓及歐美貨幣,泰國、台灣及韓國都係去到當地先兌換,匯率會較高,而去冷門地方,就建議先兌定美金傍身。直接去銀行分行兌換,成日遇上冇現貨、兌率唔靚等罪名,我寧願去找換公司。港島首選上環牛記,九龍就係尖沙咀重慶堅成或深水埗發達鳥,打死都唔會專登去百年,又要排隊又多規矩仲要受氣同搭佢部跳樓機!

牛記找換
地址:上環急庇利街1號長達大廈地下

堅成找換
地址:尖沙咀彌敦道36-44號重慶大廈地下87號舖

發達鳥找換店
地址:深水埗長沙灣道226-242號深之都商場2樓129號舖

faq_02

02 | 去到海外先兌錢得唔得?

當然得,最方便首選自動櫃員機,以當天匯率計算,最方便快捷!記得出發前要在香港開通海外提款服務,設定一日最高提款額。現時大多提款卡屬於銀聯,每次收取$15-$25手續費,PLUS/Cirrus等收費$20-$50,只有Citibank費用全免。每日提款上限根據不同發卡公司而定,以恒生為例,每日最高提款額可自選$10,000或$20,000。不過我都試過原因不明而無法提款,非常狼狽!

faq_03

03 | 有咩方法兌換最方便快捷?

在香港兌外幣,仲有以下 4 種方法:

預訂機場取
在通濟隆(Travelex)網上預約,再在機場領取,比即場兌換平,而且有 42 種貨幣,冷門的斐濟元都有!
缺點:匯率未算最抵,冷門貨幣要早 3 日前預訂。

ATM即撳
滙豐銀行在全港九新界有 6 部自動櫃員機,可以24小時直接提取外幣,包括日圓、美元、歐元及人民幣。
缺點:每日有限額,選擇不多而且匯率偏高。

外幣戶口電匯
開設外幣戶口,再透過網上eBanking,以電匯價(T/T Rate)兌換後,再在銀行提取。匯率最靚,可參考TTrate.com。

缺點:提取貨幣設限額,如滙豐每日只可提取¥75,000,要分幾日攞,而且不是有齊所有貨幣,須1至2天前預訂。

WhatsApp 柯打
豐盛外幣找換(fb: Chui Tai Tai),經 WhatsApp 報價確認,由專人送貨到港島區寫字樓以現金交易,金額過$5,000可免交通費,真心方便!
缺點:須3至4日前預約,只有口頭報價而沒有單據。

faq_05

04 | 使唔晒!用剩外幣點算好?

換回港紙預咗蝕錢!如是常用貨幣,建議留待下次再用(除非預計匯率暴趺)。如果堅持要換回,可以在任何一間 Travelex 兌換額外付$40,回港即可享有優惠回購匯率!日本成田機場設有 TravelersBox,可以將餘款轉成 PayPal、iTunes、Starbucks 等面值卡。香港機場都好快會有!(詳情:散紙神沙變港幣 | 直接入落你戶口)試過用剩冰島克朗,返到香港冇人收!冷門貨幣最好返港前先兌回歐元、美元或其他貨幣,否則血本無歸!