自從烽火大地之後，好耐未試過單騎上陣拍旅遊節目的Tony，早前去到印度直擊今年3月彩色節，成個人生猛晒，今次拍攝亦好有心機，多部action cam捕捉顏料跟粉末傾瀉如雨的動態，氣氛十足！
拍攝地點位於印度Jaisalmer（齋沙默爾）：「Holi Festival色彩節係當地一個重大嘅節日，每年大概喺3月份，大家走喺街上同識或唔識嘅人潑色彩繽紛嘅顏料或粉末，代表送上祝福，用色彩迎接歡樂。」
開戰前，依然可以扮做文青旅人，古蹟前Chok一下甫士….
跟當哋人Selfie，幾咁融洽。
話說出發前，Tony特別袋定了一執二撇雞貼紙。平平哋，喺文具店都買到嗰隻，加上頭巾，化身半個印度人：「當地人最鐘意針對外國人送上『祝福』突襲，特別用力特別狠！我諗住扮作當地人，大家會輕手少少嘛！」
結果，仍然難逃細蚊圍攻！
攬住細路做掩護，好絕！
大戰連場，場面打到五顏六色。
看畫面就好開心，不過鏡頭背後Tony確實『掛彩』受傷，一到達就中招，唔小心被人用含大麻成分嘅粉末潑入眼，搞到隻眼紅晒，又痛又睇唔清楚！
瘋狂的七彩絢麗，人群跟街道都染上鮮艷紅黃粉末，好似中晒咖哩粉！人人互相擁抱、跳舞慶祝並高喊：「Happy Holi！」
印度傳統音樂伴奏下，大人細路走上街頭，直接抓起粉末就互相噴灑攻擊，從頭到腳都變成成為「彩人」才罷休！