首爾天氣熱辣辣，不過街上情侶個個都無懼交換汗水，黐到實過糖黐豆，真係閃到我眼都盲！而我……係咁浪漫（誤？）的環境下，竟然只可以日日對住男攝影師啞口無言互隊啤酒，除咗沮喪，我真係諗唔到有咩其他字可以形容我果一刻的心情！所以係首爾旅程我最後一晚，我終於要爆啦！俾我上網睇到有間「單身酒攤」，決定趁機會一個人離隊去窺探吓呢個搭訕新興蒲點！
入到去果然名不虛傳，真係有大量單身男女等你搭訕，不過咪心急住，坐低視察吓環境先，原來牆上有「搭訕守則」喎！內容大致上係叫男士要主動出擊，記得要送小食給心儀女士，然後有禮貌去問問可否搭枱傾兩句，過程非常簡單，就睇你夠唔夠膽！
難得一場嚟到當然要試試！睇準目標立即送上小食，然後膽粗粗行埋去問可否一齊Selfie兼吹吹水，憑我青靚白淨的外形當然一擊即中啦，就算全程用英文吹水都無問題，傾到好開心，本身仲諗住再去下一間酒吧再飲過，可惜第二朝仲要趕飛機，所以唯有忍痛分別，不過有交換Contact，宜家仲係好朋友，出trip去首爾做野都會約食飯！所以就算無下文，當係一個文化體驗都唔錯嫁！
成功搭訕 4 個Tips:
- 如果你夠膽一個人去，當然係搵一個人齋坐的朋友仔做目標吧！記得問吓人鍾意食咩，咁樣搭枱機會大大提升！
- 成班朋友仔去，記得唔好一齊出動去搵目標，在場觀察10次有9次失敗，事關韓妹會嚇親！派最靚仔的朋友出動，一個人走去問可否一齊坐，成功後先成班過去吧！
- 膽細細的朋友仔，其實可以搵店員幫手，同佢講聲想搵人搭枱，佢地就會做媒人幫你搵目標，所以怕羞仔都可以挑戰嫁！
- 女士們！簡簡單單扮靚就得嫁啦，自然有人搵你吹水搭枱的！
홍대 쏠로포차
地址：麻浦區西橋洞363-2
電話：+82-(0)2-325-5959