見到啲朋友,放假仲好似忙過返到咁,睇見都覺得陰公!

去到當地機場,第一件事唔係check-out拎行李,而係要開通咗個wifi先。

「我個老細好恐怖架!你遲啲覆佢會炸爆你個mailbox!」

呢句係成個旅程我對佢印象最深刻既一句話。

腦細大概就係現行世界的卡比獸,平時佢最多係嘈啲都唔會影響到你啲咩,但一到你想放下假去下旅行呢啲重要時候,佢就會阻頭阻勢唔俾你得逞!

「咁你快啲覆晒佢啲 message咪得囉!」

「少年你真係太天真啦!你估老細啲 message,啲 email係覆得晒?我諗除非你而家即刻返香港幫我扑暈佢之外,我諗唔到仲有咩辦法令到佢唔好騷擾我。」

「咁你熄咗部電話囉,扮收唔到!」

「你係咪以為自己好醒呀?你知唔知我地放假既時候,公司既email已經幫我地pre-set定個autoreply就係”我可能聽唔到你電話,但email我一定會覆。”」

朋友話,佢試過有一次臨返香港,嗰日個電話壞咗,諗住唔理佢返香港先整,點知返嚟之後第一日返公司就出事,俾老細訓話咗成粒鐘,自此之後佢去旅行再冇miss過老細嘅一個call、一個message⋯⋯

最近法國政府商討緊訂立「離線權」條例,即係話員工係辦公時間外有權唔覆老細嘅電話、message同埋email,而公司亦唔能夠責罰佢哋。我諗如果呢條法例嚟咗香港,到底有冇可能被通過?算啦,呢個都係留返發夢個時先諗啦!

相關文章