無錯,係!60分鐘,一小時,不過單車環島個個島喺台灣嘅離島  -小琉球!

小琉球,喺離台灣本島最近嘅小島,位於台灣西南面,亦喺台灣唯一嘅珊瑚島,全球僅有七個珊瑚島之一。一個只有6.8平方公里嘅小島,海岸線就有12公里咁長。

豐富海洋生物 與大海龜同游

小琉球之所以喺台灣咁受歡迎,成為台灣當地人嘅渡假勝地,小小嘅地方,因為海裡面住咗一群海龜大哥,潮間帶住咗藍指海星、海膽、海蔘、海兔、海葵蝦而爆紅全台灣。台灣中央山脈整年保護住小琉球,阻擋東北風,所以小琉球四季溫暖宜人,一年365日都可以喺海岸邊近距離同大海龜游水,換對膠鞋喺潮間帶嚟個生態遊,了解一下海洋小生物,或者踩下單車環島吹海風睇日落。Taiwan_Cycling_1

18公里環島公路 貫穿多個景點

小琉球環島公路全長18公里,公路沿著小琉球嘅外圍而建,沿途都喺一望無際嘅藍天同望到見底嘅大海。車唔多,指示牌亦唔多,全島無紅綠燈,但喺小琉球基本上唔洗怕蕩失路,呢條「藍色公路」兩旁差唔多貫穿晒島上主要景點,由北面近觀光碼頭嘅花瓶石、東面嘅厚石群礁,仲有西面嘅落日前亭、烏鬼洞、美人洞、蛤板灣沙灘。


Taiwan_Cycling_2

公路有上落路段 可租單車或電動單車

環島公路大致平坦,柏油路面,非常適合踩單車。雖然話環島公路平坦,某D路段都有上落斜,台灣屏東騎步行網將小琉球同其他屏東單車路線相比,小琉球嘅單車路只喺屬於2星級路線(最高喺3星級),代表間中有坡度起伏。如果唔想夏日炎炎30幾度個陣上斜踩到要生要死,建議租用裝咗摩打嘅電動單車。

Taiwan_Cycling_3

島上有唔少車行出租普通單車或者電動單車,2日1晚租金大約台幣300元左右,唔洗駕駛牌照都可以租用,岩晒香港人。電動單車操作非常簡單,基本上同普通單車一樣,平地可以照平時咁踩,遇到上斜唔想咁辛苦就可以扭一扭手制,摩打就會開動,單車自動加速,慳返唔少腳力,不過都要一邊踩返幾腳用黎輔助一下上斜衝力。電動單車車速一般最高每個鐘只有40公里,建議放慢車速,十幾廿公里左右慢慢行慢慢踩,一邊欣賞風景一邊吹著帶著鹹味嘅空氣。

要注意上落坡最斜應該喺觀光碼頭去美人洞個段,環島要減少上斜位,技巧是順時針由觀光碼頭出發,去小琉球最著名嘅珊瑚大石「花瓶石」先影個到此一遊,跟住踩去厚石群礁,再去西面嘅落日亭、烏鬼洞、美人洞,最後返觀光碼頭,大約1個鐘頭就可以輕鬆環島。

厚石群礁「秘密沙灘」 水清見底

經過厚石群礁記得留意有一個無名嘅「秘密沙灘」,好耐之前當地居民用挖咗一條大水溝方便漁民拖小舢舨上岸,荒廢之後形成依家呢個秘密沙灘,小琉球嘅沙灘多數都喺珊瑚石灘,所以沙灘算不上沙幼,不過一定水清,仲要喺李斯德林嘅透明藍。

Taiwan_Cycling_4

仲有另一個「秘密泳池」,喺小琉球唯一嘅中油加油站附近,當地人都當成私人秘密泳池,部份體驗潛水都揀呢個「秘密泳池」作為出海嘅港口,可想而知呢帶嘅海有幾清澈。

Taiwan_Cycling_5

備註:一般租電動單車都會俾埋充電插頭,民宿一般電器插座就可以沖電。踩完一日返民宿沖一晚電,基本踩足一日都無問題。

小琉球旅遊資訊網

liuqiu.pthg.gov.tw

梅桂機車出租

地址:小琉球民生路88-1號
電話:+886(0)88613980/(0)912780218

延伸閱讀:教你 48 小時快閃台灣【小琉球篇】

延伸閱讀:去台灣小琉球考潛水牌 + 5個Q&A

相關文章