迪士尼與海洋公園兩大主題公園走不同風格路線,海洋公園主打動物生態及機動遊戲,每逢夏天都推出夏水禮等水上活動;而迪士尼樂園則主打歡樂夢幻氣氛,卡通人物為重點,兩大樂園各有粉絲,近日更於網上掀起爭論。有網民發文指「唔明點解啲人40度都要衝住去迪士尼,仲要一星期去5次,返屋企又睇佢嘅卡通,又買玩具又著佢啲衫」,更指海洋公園「好佢10倍就咁少人去」。此文一出掀起兩派陣容激辯,互數樂園是非。

迪士尼VS海洋公園!網民不解「點解咁鐘意去迪士尼」:夏天去等於懲罰自己

放假到主題樂園玩樂是不少家庭的選擇,即是近月酷熱天熱連續發出多日亦無阻出門玩樂的心情,有網民正因此而以「香港人前世係咪欠咗迪士尼樂園」為題,指不解為何40度依舊多人特意前往,「一星期去5次,返屋企又要睇Disney卡通,跟著又買玩具同衫」,完全不明白其吸引力,更指海洋公園完勝10倍。有網民表示同感,指「已經同成家講明夏天一定唔去主題公園,去就等於懲罰自己。」不過此言論一出,迪士尼樂園的支持者即時出來激辯。

迪士尼 海洋公園 OP VS 網民指不明白香港人為何喜歡到迪士尼樂園玩
網民指不明白香港人為何喜歡到迪士尼樂園玩(圖片來源:Facebook@香港迪士尼樂園)

1.「迪士尼大人小朋友都鐘意嘅地方」VS 「海洋公園小朋友唔識玩」

網民指「40幾度都要入去玩扮開心,扮有童真,熱到癲行步路都流汗,睇見都覺辛苦。」不過大部份人都認為「放假係陪小朋友或者拍拖,帶小朋友去迪士尼容易湊佢哋」、「睇住啲仔女玩得開心咩都抵」、「女朋友就咁買個頭飾幫佢影吓相已經覺得開心,唔使特登做嘢去氹佢開心」。

迪士尼 海洋公園 OP VS Aimee亦試過「1拖3」到樂園玩
Aimee亦試過「1拖3」到樂園玩(圖片來源:Instagram@aimeechan_official)

相反,網民指海洋公園「又殘、又舊、又無嘢睇」、「入親去啲機動遊戲都係封住咗無得玩,得個行字」、「入去好似畀幾百蚊行山咁」、「之前帶個囡去玩,笑都唔識笑,咩反應都無。相反去迪士尼就會開心到哇哇聲」、「無遮無擋,上斜落斜都唔講啦,入面一半係維修」、「細個去海洋公園確實係好開心嘅,大個就覺得悶」。

迪士尼 海洋公園 OP VS 網民指近年海洋公園的機動遊戲常暫停
網民指近年海洋公園的機動遊戲常暫停(圖片來源:Facebook@香港海洋公園)

2.「迪士尼氣氛好」VS「海洋公園冷氣勁」

有網民反而大讚海洋公園動物館更為優勝,指「去海洋公園其實最主要係睇動物,好多種類都只係去佢到先有得睇」、「夏天一定去海洋公園,啲冷氣勁好多,企鵝館個到最爽,有得睇有得歎」、「搭纜車開行個窗可以感受到林超英講嘅溫柔嘅風,起碼多啲大自然先啦」。

迪士尼 海洋公園 OP VS 網民指海洋公園主要觀賞動物,且冷氣夠涼快
網民指海洋公園主要觀賞動物,且冷氣夠涼快(圖片來源:Facebook@香港海洋公園)

不過網民此時對於冷氣的需求似是降低,指樂園最重要是氣氛,「海洋公園最多就係學校團體去同埋老人家,反而真係少咗後生個一代」、「迪士尼無論音樂、巡遊定煙花,一行入去就覺得開心啦,爭好遠」、「一入場就有波波,又有卡通人物影相,個氣氛真係令人忘記現實,輕鬆吓。」

3.「迪士尼地方細」VS「海洋公園地方大」

網民指,迪士尼勝在地方細,要行的距離相對地少很多,即使夏天前往都不會感到辛苦,加上現時沒有遊客「攻陷」,排機動遊戲或看表演的時間大為縮短,最耐也只需半小時,最快5分鐘已可入場。相反,海洋公園要「上山落山」,「行嘅路仲多過你玩同睇嘢,無體力真係唔會想去」、「海洋公園太大,想玩一樣嘢都要行好遠先到,小朋友唔想行就要家長抱,諗起都辛苦」。

迪士尼 海洋公園 OP VS 海洋公園面積較迪士尼大
海洋公園面積較迪士尼大(圖片來源:GoogleMap)

不過有網民反嘲,「樂園細竟然可以變成優點,樂園大反而被人話,真係改變晒我嘅認知。」

4.「迪士尼樂園買紀念品可賺錢」

網民指,很多人入園區除了玩樂之外,更是「賺錢」招數,指園區內的紀念品店間中會進行折扣優惠,「指金卡買嘢又會再平D,好多人成日去係入貨,放返出去可以賺返筆,買年飛無限次入真係幾抵」。不過無論是迪士尼樂園或是海洋公園,網民稱總好過在旺角「同人逼」,亦有人強調不認為海洋公園失禮,是許多人的童年回憶。

迪士尼 海洋公園 OP VS 網上有不用群組放售或交換迪士尼樂園商品
網上有不用群組放售或交換迪士尼樂園商品(圖片來源:Facebook@迪士尼 買賣 交換 分享 Disney’s Sharing Platform)

事主的帖文為何惹起激辯?

有網民以「香港人前世係咪欠咗迪士尼樂園」為題,指不解為何40度依舊多人特意前往,表示一星期去5次,返屋企又要睇Disney卡通,跟著又…詳情請看

網民認為迪士尼樂園有什麼優勝之處?

網民指,很多人迪士尼樂園除了玩樂之外,更是…詳情請看

圖片來源:Facebook@香港迪士尼樂園、Facebook@迪士尼 買賣 交換 分享 Disney’s Sharing Platform、GoogleMap、Facebook@香港海洋公園、Instagram@aimeechan_official