새해복많이받으세요!有冇朋友仔農曆新年假會去首爾?韓國人習慣穿上韓服回鄉跟喜迎親友,市面上好多舖頭都會關門,所以呢段時間去首爾,shopping掃貨真係有啲困難,倒不如入鄉隨俗,穿韓服去觀光啦!不過有網絡潮文叫大家千祈唔好帶女朋友去首爾著韓服,事關除咗會被私有化做奴隸攝影師用盡每一分鐘狂影,為咗件傳說中粉紅色款更要捱更抵夜去排隊,情況仲慘過留喺香港OT!作為韓國線記者當然試過,今次綜合中伏經驗,同大家講講租 借韓服 的5大貼士!

01 | 想揀心水款?記得早30分鐘到場!

韓服設計華麗,款式真係超級多,不過真係有好多遊客去租借,試過星期二去依然全場爆滿,勁誇張!記得當日為了租借港女最愛的粉紅色款,全世界早15分鐘到達韓服店,點知竟然開咗門,舖內仲要勁多人,人潮誇張過名牌店1折開倉!惟有快手衝入去搵搵粉紅色款,可惜已經全部租出,任務失敗!問過店員,原來好多客人都早30分鐘到店外排隊,為的就是搶頭位揀選心水款,尤其粉紅色真係最搶手,所以各位男朋友唔想女朋友唔開心,記得要早啲去排隊!

02 | 完全唔識穿著?叫韓妹幫手!

講真,韓服設計勁闊又多層次,所以第一次著真係完全搞唔掂!場中見到好多遊客都好怕醜,唔敢出聲問人,而店員又超忙,最後只能馬虎穿著!其實綁腰帶、紮胸口蝴蝶結等都非常考工夫,試過出聲問韓妹客人想叫佢哋幫幫手,佢哋知我哋係遊客竟然立即應承,仲幫手set頭,簡直係救星!所以自己搞唔掂而店員又忙緊時,試下叫在場的韓妹客人幫手吧!

03 | 冬天著韓服 記得要保暖!

1、2月出發首爾,天氣多數接近零度,韓服布料勁薄,當然唔夠保暖吧!咁究竟要點穿著呢?韓服裙襬超級闊,完全睇唔到你在裙襬內穿了甚麼,所以盡情著吧!建議著leggings+絲襪要多加一條牛仔褲,咁就唔怕裙襬入風會好凍,一定夠暖!反而韓服上衣超貼身,好難著太多層,有人建議至少要穿2-3件heat-tech及冷衫先夠,咁樣當然夠保暖,但入室內一定超級熱!個人建議長袖heat-tech+衛衣已經夠,反而穿好韓服後再穿上防風羽絨外套,去到景點影相先除衫,雖然較麻煩,但室外夠暖,入室內又唔怕太熱!

04 | 咪貪靚著高踭!波鞋先夠舒服!

剛剛講過韓服裙襬又長又闊,令不少女士為了令雙腳更顯長,勁貪靚會著高踭。同model為影相都試過一次,事後model勁抱怨:「真係超級辛苦!」因為搵靚景點行路行勁耐,又要行沙地、泥路等,真係好麻煩,而且綁鞋帶要遞高隻腳,絕對係攞苦嚟辛,所以大家咪挑戰,著波鞋一定最穩陣,想雙腳更顯長?揀厚底platform款吧!

05 | 著韓服行街好尷尬?完全冇問題!

著韓服行街以為會有好多人投以奇怪目光,結果係完全冇人理!其實韓國人非常習慣旅客著韓服周圍去,所以唔好再驚尷尬,剩係去景福宮、北村等景點,著住去弘大行街都唔怕!試搭地鐵時model大膽嘗試以騎呢pose挑逗阿叔,可惜阿叔見怪不怪,毫無反應,勁好笑!入去化妝店問韓仔化妝師著韓服行化妝品店係咪好怪,佢都話好普遍,仲即場教路如何令妝容更襯韓服!

最新的韓國入境要求詳情?

韓國宣布即日起至2月底,所有來自香港及澳門航班必須使用仁川國際機場降落, 即睇:韓國入境最新要求限制。在入境日本前,建議也可買定韓國電話卡,部分更有通話功能,以及選定心儀酒店

韓國首爾有什麼好玩推薦?

首爾美食多籮籮,即睇美食推介,而醬油蟹絕對是其中一樣必食美食;一人旅遊到首爾不知到哪覓食?大可到訪首爾可以一個人用餐的人氣獨食餐廳。玩樂方面,滑雪是不可錯過的活動,5大滑雪場適合新手一日遊,亦可到樂天世界大玩遊樂設施及韓服體驗。另外,也可用幾日時間到釜山玩返轉,即睇首爾去釜山交通懶人包。準備到首爾賞櫻花的大家,可預先一看首爾櫻花預測及賞櫻地點推介