女生被Dior門市職員冷眼對待 著運動衫等於冇消費力？
入名店購物，對於部分人而言需要過一個很大的心理關口，除了「預咗被Sales吊尾」外，更要有心理準備被職員無視。早前有女生在Facebook「爆怨公社」發文，指自己到台灣一商場的Dior分店行街時，主動問及職員最近週年慶有什麼禮盒，豈料職員冷淡指著桌上稱「上面已經有寫禮盒資訊」，之後直接招待另一名中年女人。
DIOR職員質素差天共地
事主指可能因自己外表打扮長得像學生，加上身穿運動衫，所以店員根本「睇唔起自己」，一點兒招待她的打算也沒有，且態度太差於是直接離開。隨後事主再到Dior另一間分店光顧，兩間店的職員完全差天共地！她指 「相比之下，另一分店的職員已很親切地問我要找什麼，每種香水也介紹得非常認真，每問一個口紅問色號也會細心的試在她的手上給我看」。
最後事主在Dior購買兩支唇膏，她表示這間分店的職員相當親切，「兩家態度相比，真的差很多，寧可多花幾百元，也不想買去南X店的Dior週年慶」。
網民：講真，啲Sales憑咩睇唔起人？
不少網民紛紛留言分享經驗，指「Dior d sales 真係好西，陪朋友去買野，睇中左隻戒指佢話冇晒我嘅size，叫佢睇下邊間有貨都唔理我，問多佢一次都係唔理，朋友有買嘢，佢啲態度都唔係好」、「講真，有啲店員好睇唔起人，憑咩？」、「好多著得隨便先係大金主，睇穿著揀客眼光都太短淺」、「有次我跟我媽站在旁邊，雖然我當天沒上妝，但店員們忙著招待一些看起來是學生年紀大概都25以下的，完全不理我們」、「啲名店sales唔知咩出身，大部分住公屋都狗眼看人低，以為自己高人一等」。
港女力數3大最串品牌Sales Bobbi Brown公認第一！
帖文一出，有港女即表示自己經驗多到可填滿一本簿，表示「試過因為著運動衫，喺times square Lane crawford 被 bobbi brown & bare minerals 白鴿眼。 但係其他品牌唔會咁唔專業，所以我最後轉咗用其他品牌嘅產品」、「 bobbi brown間間都串的」、「我幾年前普通衫去朗豪坊Bobbi brown 睇嘢，因為無化開粧唔熟化妝品所以有問多兩吓，全程唔夠20分鐘，咪又係粗聲粗氣，但我俾咗千六蚊買嘢囉！」
2.朗豪坊M.A.C出名臭串
有網民亦反映有時明明有消費但感覺成為出氣包，但又不敢大呻，指「朗豪坊 M.A.C 都好串…我買完嘢，都唔知自己做錯啲乜，要受到惡言相向態度，咁樣對客」。
3.銅鑼灣SOGO Gucci 見錢先笑
亦有網民指「我著拖鞋入銅鑼灣sogo Gucci 買銀包，我問佢6千幾個隻仲有無貨，串串貢唔想理我咁，到我埋單過陣笑笑口咁」。
