Carousell賣家被西客投訴唔專業　「我會敏感呀」圍爐失敗被嘲：報東張呀笨

敏感肌西客上Carousell買精華　賣家勸先試用反被鬧

日前有網民分享自己在二手買賣App Carousell內的不快經歷，事主向賣家表示自己是敏感肌膚，不確定會否因為使用Clinique淡斑雙效精華而引發敏感，所以先行查詢，而賣家亦回覆到如果擔心會敏感可以先買sameple試用。

但沒想到如此平淡的一句說話卻惹怒了事主，「我擔心敏感，你仲叫我買？」，賣家無奈地表示「你未試過點知敏唔敏感呀？如果咁擔心就唔好買啦」。但事主就開始跳針式爆seed反駁賣家：「所以我咪問你，我敏感肌用唔用得囉，點知你冇答我用唔用得之餘仲叫我買嚟試，你可能覺得如果我敏感最多咪搽返藥膏啫！」

西客爆seed長文反駁：你唔係應該知嘅咩？

眼見對方如此激動回應，賣家再次語帶無奈地回應「小姐我又唔識你，我點知你嘅皮膚係點㗎？未見過有人問埋啲咁嘅問題。」氣在頭上的事主再次用長文「講道理」反駁：

小姐，呢個世界好多人都有皮膚敏感同濕疹，而我又唔知道你產品適合咩皮膚，而你又係賣家，咁你係賣緊呢樣嘢㗎嗎，你唔係應該知嘅咩？

好似你開鋪頭做生意咁，你做老闆，你知嘅嘢係咪應該要比個客人知道嘅嘢更加多先？而你嘅回應都要俾個客人感到安心，人哋先會繼續做你嘅生意，人哋仲要俾錢你入袋呀小姐，要人哋俾錢買難受呀，同埋如果你繼續keep住咁嘅態度去賣嘢，無人會買你嘅嘢，講完！

Cap圖上Facebook欲圍爐

事後她將對話上載到Facebook群組「Carousell 黑店大全及投訴個案/冇良心黑店/黑名單全紀錄」，企圖圍爐取暖 ，她表示：

你唔知個產品用完會唔會敏感
你唔係答我唔知
而係仲叫我買sample嚟試用…😪
如果我用完皮膚有事
的確係我俾錢買難受
係唔關你事嘅
但想搵錢都唔係咁搵啦！
你仲要咁串咁答我唔識我唔知我皮膚點+未見過有人問呢啲問題
我問得你，我都係肯定我有敏感皮膚先會問㗎啦
我以前就係用過啲唔啱用嘅護膚品先搞到敏感
要搽幾日藥膏先好返
我咁樣問吓都好正常呀！係咪呀？
呢個世界唔單止有人皮膚敏感
濕疹都有啦，你以為得你店主皮膚正常咩？

圍爐取暖失敗　網民反嘲：想免費咪講囉！多舊魚！

想在Facebook圍爐取暖的她卻被網民群起嘲笑，大批網民都直指賣家的回覆與做法完全沒有問題，更直指她是西客，「買12蚊嘢想有專櫃服務」，簡直是異想天開！

【敏感每個人都不同】「放多餘嘢上Carousell賣要了解埋產品敏唔敏感？你話問過期日就識答啫。敏唔敏感呢啲好個人㗎喎，點知你敏感咩成份？」

【睇嚟Carousell賣家要識埋通靈】「每個人致敏源都唔一樣，就算係醫生都要做點對點測試先會知你對咩敏感，你竟然期望店主可以隔住電話就答到你？」

【敏感肌適用非100%唔敏感】「就算話敏感肌適用，都未必100%唔敏感，我覺得賣家完全無問題，買家問嚟真係多舊魚！」

【上Carousell賣嘢要完全瞭解產品？】「照你咁講，咁有人賣公仔係咪要清楚知道埋咩物料做，係用咩棉花，咩產地？」

【$12要專櫃服務？】「呢度唔係專門店，$12咁煩，有病睇醫生啦！真係當自己客人？」

【依家興乜都搵《東張西望》】「你onX應該唔係扮嘅，樓主你應該報埋東張！」