打工仔發現同事請病假竟去茶餐廳食早餐 IG貼相惹不滿
有網民於LIHKG發文稱，今早留意到公司其中一位後生同事沒有上班，於是問老闆同事去向，發現對方原來因天氣凍作感冒而請病假。本身得知消息後都無特別感覺，「但係頭先睇手機嗰陣見到佢story去咗茶餐廳食沙嗲牛麵早餐，唔似有病」，這位網民更立即把後生同事的Instagram分享給其他同事看，「我哋成班人都睇到呆咗⋯⋯」，並問其他人「覺得我應該點同公司老闆講好？開會嗰陣講定係CC email比全公司人好」，質疑後生仔分明因天氣凍而扮病缺席。而該名網民再補充一句：「佢仲喺WhatsApp group錄音扮喉嚨痛扮咳，而家啲00後演技真係好好」。
網民：病唔使食早餐？
問題一出，網民旋即開火，指「病咗唔使食早餐？」、「病係咪代表唔使食嘢」、「食早餐又真係唔夠證據，你話去行山同迪士尼先再講啦，就算佢成日喺度打機online你都吹佢唔漲」、「成個八婆喺度搬弄是非，人哋有醫生紙咪得，食個早餐都畀你X」、「感冒唔係危殆喎，病仲要唔畀人食嘢，好彩你唔係老闆啫」。
事主再反駁：深層次睇佢係對公司唔夠忠誠
而事主眼見網民唔撐，再繼續解釋，指「你咁睇嘢唔夠全面，表面睇佢係詐病，深層次睇佢係對公司唔夠忠誠，會欺騙公司同損害公司利益，呢啲人養唔熟唔留得」、「病咗應該留屋企休息，而唔係行出街，行到出街即係無咩事啦」。結果，網民再度出擊，指「睇醫生唔使出門口啊？係咪你畀錢Call個醫生上門睇先」、「啲Old Seafood真係有病，打工打上腦」、「點解要忠誠，又點解要養得熟，啲人做幾年咩都走啦，養咁熟做咩？拎來食啊？你唔問吓你老闆公司環境唔好，會唔會一定永遠唔炒你？咁忠誠做咩？畀人拎來食啊」、「係咪活在咸豐年代？病咗就唔可以食早餐？咩道理？佢跟足規矩交埋醫生紙的話，有何問題？」
