港男買麥當勞「無餡包」一開即嬲 網民爆笑：同忌廉檳差唔多啦！
麥當勞以往都以「平、靚、正、快」打響名號，不過近年來其質素備受網民批評，不但味道每間分店都有所不同，Size更出現形狀大縮水的狀況，更何況餡料！不少食客早已在網上公審質量，時不時都有「獨家創新產品」出現，而近日一名港男的分享更惹來網民「恥笑」。事源最近有港男圖文並茂地出Post鬧爆麥當勞，指自己「幸運地買到新包」，而這個新包並非官方真正的餐點，而是港男原本買了一個麥芝蛋包外賣，但取走後發現「有餡包」變成「無餡包」，既沒有芝士、亦沒有雞蛋和醬汁，剩下的只有兩塊麵包，猶如走醬忌廉檳。
網民齊分享「新款包」：縮水都唔係第一次啦！
帖文發出後隨即惹來不少網民熱議，有網民笑指「呢個簡直係國王的新包啦 」、「呢個咪嘉頓忌廉檳，不過幫你走咗醬啫」，亦有人質疑「呢個包根本都未開封，咁都畀錯到個包都幾搞笑」、「個包望落都係凍冰冰，經過咁多人手都無人發覺，你就知M記做嘢幾好」。網民亦有繼續大鬧麥當勞，指「發水麵包聽得多，但縮水麵包第一次見！」、 「縮水太明顯當香港人傻」、「越來越細！一口飽」、「遲啲出個馬卡龍版包，咁就可以光明正大咁縮水都無人鬧」、「從前一星期食兩至三次，但呢幾年無再食，原因係貴夾唔值，我去餐廳食個五十幾蚊嘅餐，明顯勝過食M記幾十蚊個爛餐」。
不過除了個包自動走料外，有網民亦分享自己買中了一個「肉酸包」的經驗，指單看賣相都令食慾大減，「唔明點解一個正正常常嘅包都可以整到咁」、「整呢個包嘅人，當時個腦諗緊咩呢？」。亦有人指縮水包即離譜的是巨無霸 ，指「而家不如直頭改名做巨毛霸算啦」。
網民為餐廳美言：代言人食太多，想佢瘦返先咁啫！
雖然大伙兒都偏向鬧爆餐廳縮水慳皮，但有網民則在事件中「包尾」，指「代言人食太多都漲晒，想趁呢個機會畀佢瘦返啫」、「你睇吓姜B食呢個包會唔會瘦得快D，如果見效又係一個宣傳效果」。