有網民於「親子王國」討論區發文，她表示日前中午到荃灣一間連鎖壽司店用膳時，叫了一份青口，豈料用筷子夾起青口的時候，發現青口內有一堆類似寄生蟲卵的物體，令他大驚失色：「好彩未放入口。」
同行的老公就叫來餐廳經理，並向女經理指出餐廳所出品的青口中，有一堆類似寄生蟲的物體。但經理望了一眼只表示：「係咁㗎，隻隻都係，咁掹咗舊嘢就可以食㗎啦。」聞言兩公婆「即時O晒嘴」。然而過了10分鐘，兩人見到該碟青口仍然覺得十分不開胃。
後來事主越想越生氣，便再次叫來經理：「唔該，你可唔可以幫我換咗呢份嘢呀？」但經理依然維持說法：「係咁㗎，隻隻都係咁」拒絕為他們換新一碟。氣憤的事主破口大罵：「寄生蟲嚟㗎，點食呀！」最後經理表示可以為他們換一隻青口，但事主則稱不需要再換一碟，經理就將整碟青口收走。事後她表示，自己不是特意找經理麻煩，而是她發現了餐廳處理食物不乾淨：「仲要我夾硬食咗佢，點食呀！講真，你好聲好氣，同我收咗碟嘢走咪得囉！」
青口「寄生蟲卵」的真正身份竟是…
起初有不少網民為事主感到不值，同情她並表示：「好核突」、「唔好再幫襯啦」、「報食環啦離晒譜」。但後來就有醒目網民看到事主所上載的相片後指出她誤會了餐廳與經理了，那堆物體既不是毛，也不是水草和寄生蟲卵，其實是青口的身體一部分，名為「足絲」！
青口的足絲，是青口分泌出來用以抓住如礁石、水管、船舶、麻繩等堅硬物，但足絲口感超硬而且韌如鋼線，所以不宜食用。而未煮熟的青口足絲除了比較難去除之餘，更容易會因為強行拔走，弄爛青口肉，破壞口感，所以一般都是煮熟後才去除。
部分網民看到解釋後，也紛紛取笑事主因為無知而大鬧餐廳：「最好笑係兩夫婦都唔知，一齊去嘈人！」、「就算真係未見過，都冇理由覺得寄生蟲有咁大抽掛？」、「你以前未食過青口？」但亦有網民指如果平日沒有煮開青口，不知道也是正常事，也指出餐廳在事件中有一定責任：「青口係有呢啲嘢㗎啦，經理冇錯喎，抆走就食得，不過餐廳就應該要處理得好啲」、「當然餐廳冇處理好就比客佢都有責任」、「話就話呢堆嘢好多青口都有，但餐廳都應該清走先俾客人食㗎」。
