香港迪士尼率先推出5款2023年新年限定商品
聖誕節都未到，就要準備新年啦！香港迪士尼樂園在昨日（12月14日）率先在官方網站公開5款2023年新年限定商品，包括2款迪士尼朋友利是封、Chip ‘n’ Dale及唐老鴨與Daisy揮春套裝、蝴蝶酥禮盒及爆竹朱古力爆炸糖禮盒，價錢由$49 – 159不等，相信不少迪士尼粉絲都會入手新年限定商品。
但在新年限定商品中，卻有一件商品卻引起一眾迪士尼fans的熱議，正是以米奇與好友為主題、爆竹造型的「米奇與好友爆竹朱古力爆炸糖禮盒」！爆竹造型的禮盒上有米奇、米妮、唐老鴨等迪士尼朋友在上面，為了配合2023年的生肖「兔」，亦加入了兔子元素，在上方更有「兔」字揮春。
兔年「應節」出售「兔屎朱古力」：港迪創意世界第一！
造型無問題，但問題就出自於入面的商品！禮盒內的朱古力爆炸糖是以銀色三角包裝，不過包裝內朱古力爆炸糖的造型可謂非常切合主題，極為「應節」！一袋幾十粒的細粒圓形朱古力爆炸糖與兔屎相似度極高，有迪士尼fans在Facebook群組「我真係好鍾意迪士尼資訊分享群」分享時也表示：
今年兔年啫…唔使餵賓客食屎嘅…
CLS到底係邊個咗唔用腦設計兔年整波波朱古力😢
#港迪創意世界第一
一眾迪士尼fans：羊年應該整大粒少少就OK！
一眾迪士尼fans一看到圖片都忍不住爆笑，並表示「回不去了！」，更有人笑言香港迪士尼真是神級marketing，「夠哂應節！咁先似兔…年」。同時亦因為近年迪士尼經常被港人投訴存在各種問題，有人爆笑稱「迪士尼可能積咗啲怒氣好耐，依家用行動叫你哋食屎！」同時亦有人搞笑地建議下次羊年時也可以重推同一件產品：「羊年應該整大粒少少就OK！」
