一個人入迪士尼樂園好奇怪？網民大撐：不知幾正！
喺「迪士尼 買賣 交換 分享 Disney’s Sharing Platform」群組入面，有人問「一個人去迪士尼會唔會好奇怪？」，點知網民一致認為自己一個入去玩其實仲好玩，特別係已經買咗年票嘅朋友，除咗唔使左夾右夾同人約時間之外，入到去都可以隨心所欲自己鍾意玩乜就玩乜，同邊個影相就影，自由自在，就算玩同一個機動遊戲10次都唔會有人詐型咁話。
有網民就話，一開始真係好唔鍾意自己一個去玩，但鼓起勇氣試過一次之後就發覺其實真係自己亂諗，冇人會理你，而家仲愛上咗自己一個去旅行。亦有一家大細嘅網民仲表示羨慕，講話如果自己可以賣甩班馬騮，自己一個去慢慢享受佢都會好想咁樣做 ，咁佢就可以去玩小朋友唔夠高玩嘅設施！
網民揭一大隱藏好處及不便之處
自己一個人去主題樂園都有一啲唔方便嘅地方，就係坐低食飯，冇人幫你霸住個位嘅情況下，就要買咗個餐之後慢慢搵位，所以網民都建議樓主早少少去食飯。但一個人入去玩嘅好處就係好多遊樂設施其實有單人隊可以排，平時受歡迎嘅設施可能要排2個鐘，但係你自己一個排單人隊可能5至10分鐘就可以輪到你玩，連拎快證都慳返！其實總結一句，who cares？只要你唔尷尬，尷尬嘅就係其他人，只要快快脆衝破呢個心理關口，話唔定你會愛上呢個體驗！
