人夫「開地圖炮」轟港人冷漠：點解唔主動讓座俾大肚婆！
近日有一名人夫於Facebook群組「全港九巴(意見、投訴…)巴士分享」發文，指他的老婆已懷孕9個月，「個肚大到成個籃球咁款」，每日都需要搭巴士，但每日在搭巴士時卻無位坐，「好多都唔會主動讓座俾大肚婆」，怒斥港人不會主動讓座。同時他也指出不止乘客可以幫忙，更表示司機也應幫手，「司機可唔可以幫下口，幫助吓有需要人士」，更爆seed「開地圖炮」炮轟「依家個社會好冷漠」。
網民：你老婆個肚我搞大嘅？
人夫的帖文一出後，即時被網民截圖並轉載至其他群組，但大部分網民並不同意人夫的觀點，反指「點解一定要讓座」：
【你大肚係你事】「我有份搞大你老婆個肚？」
【讓座係個人意願】「讓座屬於個人意願，無話你係大肚婆就一定要讓座俾你。」
【車長仲包幫你搵位？】「仲要個車長做埋分配坐位，加幾錢人工先？」
【最冷漠嘅係你喎】「個老公太冷漠啦，老婆有咗9個月，個肚大到成個籃球咁都唔俾錢佢搭的士」
【好多人老馮要人讓座】「成日講要人讓坐，有意思嗎？我都試過雙腳受傷，企得好辛苦都唔會怪人唔讓座，使唔使叫住過千尺住戶讓俾你住？見人多冇位唔上囉，搭下一架，趕時間咪搭的士，唔好當讓座係必然」
【鬼叫自己窮咩】「個男人咁大驚小怪，我大肚九個月坐巴士，架車滿到我直頭要企喺車頭，咁冇辦法啦，自己窮要搭巴士，自己捉實扶手囉。但係我又冇怨過人點解唔讓座俾我喎」
同時也有曾懷孕的網民分享大肚搭巴士時，巴士司機出聲要求其他乘客讓座的經歷：
其實我都經歷過一次，個時搭巴士出街，點知我一上車之後司機仲要講到明話唔讓座唔開車，搞到我超尷尬，最後係一個婆婆讓俾我，之後又有個女人讓俾婆婆。
九巴：讓座屬乘客自發行為，但車長可呼籲乘客讓座
而根據九巴官方網站的乘客須知中，第16條有提到「請讓座予有需要人士，例如長者、殘疾人士、孕婦或帶同嬰幼兒的乘客」，不過讓座屬乘客自發行為。但九巴亦曾在Facebook上載影片指，如果有孕婦乘搭巴士，車長是有權呼籲乘客讓座，如「有大肚婆呀，有冇乘客可讓座位」以提醒乘客有有需要人士需要座位，只不過車長無權強行要求乘客讓座給有需要人士。