目擊者拍照舉報：老伯手放女童胸前疑有不當動作
該名目擊乘客在社交平台threads上傳一張照片，顯示港鐵車廂內的老伯攜同女童搭乘港鐵，指出當時車廂內仍有空位，並非擠迫狀態，兩人站近車門邊位置。照片可見身穿小學校服的女童背脊挨靠老伯，而老伯則將手放在她胸前， 並環繞著女童，目擊者更表示「走嗰陣仲見到個老人家隻手喺度揉個胸咁」，認為情況實在奇怪，故拍照詢問網民「係我多慮咗定係咩」。
網民狠批老伯：睇到張圖都覺得好唔舒服
大量網民批評老伯不懂避忌，紛紛留言「君子不立危牆之下」、「男女授受不親」、「我話知你係佢阿爺定係佢老豆，個女仔已經高到你心口即係有咁上下大，你都無邊界感」；有網民表示看到相片不安，要抱有敏感的觸覺，「對於呢啲事敏感啲好 睇到張圖都覺得好唔舒服」、「有時呢啲嘢寧願八婆啲敏感啲好 就算個長輩無心無意圖 起碼俾佢知道有咩地方唔可以摸 依家啲小學生好細個已經開始發育 佢隻手咁樣擺到更加唔恰當啦 扶住小朋友心口唔跌唔係藉口大把方法令小朋友唔跌啦」。
帖文也引來媽媽網民及家長關注，她們直言「阿伯做咗咁多年人，唔係唔識分嗰個係敏感位置呀」、「我係女人都唔會掂小朋友個胸」、「我係媽媽，除咗細時要幫佢沖涼嗰陣，都無咁放過隻手喺我囡嘅呢個位置」，認為即使是家人亦應避免觸碰敏感部位。
部分網民認為外界反應過敏：伯伯驚人撞到佢保護佢啫
然而有部分留言認為網民反應過敏，「伯伯呢個高度攬住妹妹都係驚人撞到佢保護佢啫」、「唔好成日帶有色眼鏡去做人」、「如果佢有心搞個𡃁妹，就唔會大庭廣眾摸啦」、「求其影張相就人格謀殺個阿伯」、「我覺得係你地太敏感⋯講真伯伯呢個高度攬住妹妹 都係驚人撞到佢保護佢姐，當你咁有咁既高度 個妹妹又未發育 其實你摸緊邊都未必知 不如你話佢用X妹妹背脊⋯ 」
此外，也有人質疑「呢個動作keep咗幾耐？一下定幾分鐘？定係不停重覆呢個動作都會有好大分別」，認為需要更多資訊才能判斷。
支持舉報的網民則反駁「對於呢啲事敏感啲好」、「好多兒童被性侵都係熟人所為」，強調即使擔心女童被撞，亦有其他保護方法「其實可以捉膊頭或者叫佢自己緊握扶手」、「其實一齊捉扶手咪得，順便教佢搭車扶實 用下體貼住，又用手摸住胸，出街都咁樣 其實小學已經要開始教女仔，咩係唔啱，幾時要反抗」。
網民認出女童就讀學校 促即時舉報保護兒童
有眼利網民從相中看出女童所穿著的校服及學生證套頸繩，認出她就讀沙田大圍某所小學，紛紛敦促目擊者應該「見疑即報」。網民留言指「樓主可以email張相去小學，至少畀女童親人或師長一個awareness」，更有人擔心女童父母未必知情，「如果並非誤會就保護咗女童；如果係誤會，正常屋企人只會感激有人保護囡囡」，不少人詢問樓主有否拍片作證據，「你有無影到佢搓個胸嘅影片？我覺得要保護女童，因為佢嘅父母未必會知，以為交俾信任嘅人」。
