比預約時間早15分鐘到 投訴被廚師冷落兼食材差
吃Omakase主要由廚師挑選刺身等較珍貴的食材入饌，過程中廚師會主動向客人解釋每道料理，包括食材來源及味道，與客人會有較多互動。最近有網民分享Omakase中伏經歷，更指「食到懷疑人生，以後唔敢再食」。事源當事人為朋友慶祝生日而訂了枱吃Omakase，當天比預約時間早到15分鐘，到店後無人招待更被正在搬餐牌的店員要求站出門口。進店後發現「廚師Bar枱高度係令你睇唔到師傅喺度做緊咩，完全冇咩交流，我已經好努力咁同師傅講兩句笑但都無咩反應」。
事主指除了服務差，食物質素更差。他當天與朋友每人點了$980套餐配一枝$880 清酒。「第一個頭盤嘅熟蝦應該煮熟咗兩日，蝦都可以煮到差D要廿秒先咀嚼完，我都係第一次食。 帶子乾到仲差過急涷貨，我返屋企個冰箱攞兩隻出嚟解涷都應該好食過佢。」
他續指手握尋司同樣不能接受！「淡到要蘸豉油，火炙完斷開哂都有。跟住唔知點樣嚟個涷湯三文魚麵。.一塊好似迴轉壽司上面咁薄嘅三文魚，Overcook到一個起哂白泡再涷到喺雪櫃攞出嚟嘅嘢，舊三文魚硬到我食唔到……」
最後事主指甜品沒有上菜，何時上最後一道菜又沒有通知，與朋友結帳時共$3000但「食唔飽」，回家還要再煮飯填飽肚，揚言「大伏到唔知應唔應該再去食Omakase…….」。對於事主分享，有網民指自己有類似經歷，「上年情人節食呢間刺身有魚骨」、「呢間新開嗰時食過一次晏晝，真係好差好差好差」。
但對於事主早到行為，反惹來網民大鬧！有網民指「人哋寫住準備中！你識唔識字呀！對日本料理嚟講，早到係一個唔尊重嘅行為！」、「早到只係大部分香港人自以為嘅尊重，呢樣唔係準時，一樣係唔守時」、「師傅份人工唔包吹水架喎」、「要吹水要交流要豐富要飽飽下次可以試吓onlinekase」。
日本守時觀念不同 最好早到5分鐘
眾所周知，日本人對時間觀念非常看重，不喜歡別人遲到的同時，原來「太早到」也不建議。據講在日本有一個原則是「提前5分鐘行動」，即最好在約定時間提前5分鐘到達，那便是守時的標準了。