撰文：JY｜編輯：JA｜資料來源：Instagram@harrietlwl、香港紅十字會｜圖片來源：Instagram@harrietlwl
香港女排球員劉韵琳確診急性血癌急尋骨髓移植 撰文呼籲大眾登記
劉韵琳曾為香港南華女排效力，於六年前確診患上CML慢性骨髓性白血病，一直以標靶藥控制病情，生活與常人無異，仍可如常參與球隊訓練及與隊友一同健身訓練體能。惟7月尾病情有變，不幸地同時患上兩種白血病。她昨日（9日）在個人IG上發文指出自己近日「突然放低曬（晒）所有工作去打大佬」，情況令人擔心。
我係劉韵琳，最近我突然放低曬所有工作去打大佬，呢個大佬有d棘手，好需要大家幫手打。
6年前既呢幾日，我被診斷患有CML「慢性骨髓性白血病」=血癌，呢幾年每日都食住標靶藥去控制，好慶幸真係控制得好好，好似正常人一樣生活。
劉韵琳7月尾病情出現變化 兩種血癌同時出現
直至今年7月尾，病情突然出現變化，她透露自己因發燒需要入院，最後確診AML「急性骨髓性白血病」。原本以為是由慢性轉為急性，但最後發現是CML及AML同時存在，需要接受一連串急切的治療。
今年7月尾，我突然發燒，由於過去幾次驗血白血球都好低（1.0），安全起見都係去睇急症。發燒留院通常都走唔甩，但真係估唔到今次一留就留到依家都未出……係醫院不停打抗生素、抽血、抽骨髓（呢d都係細佬），最後確診AML「急性骨髓性白血病」。初頭我以為係慢性轉左急性，但原來慢性一直都控制得好好，依家係CML+AML同時出現，醫生解釋係多左某幾組基因突變。
劉韵琳開始接受化療 副作用更添痛苦
劉韵琳隨即開始接受化療，治療期間帶來不少副作用。她坦言每天在考驗意志力，全無胃口，更試過有菌入血，全身不停打冷震，現時只希望不會再受感染。
AML相對需要急切既治療，所以月中我就開始打化療，辛唔辛苦？只可以話一個星期瘦10磅不是夢～長期作嘔，要食嘢先嘔左上一餐既先，真係感覺到個胃底要翻出黎先開心，但重點係根本食唔到嘢，飲既水都嘔曬出黎，根本都唔敢食。第一輪化療7日完成左，休息～第8、9日唔作嘔就開始精神，以為都唔係真係咁難頂。第10日朝早發燒39.2度，然後一直燒左7、8日，中性白血球低到0左，抽血檢查發現係有菌入血，即刻做左個小手術將喉仔拆左（喉仔用黎打藥、輸血同抽血，減少日日比針吉）。頭4日發燒真係好辛苦，全部都係39度以上，打冷震到我全身好攰但係完全停唔到唔震，一震就維持兩三個鐘，真係意志力既考驗！另外，依家只要少少流血都會好緊張，因為根本癒合唔到，隔兩日就輸一次血。今日先稍微好似有上升，中性白血球有0.3。現階段只求唔好感染
劉韵琳急尋骨髓移植 籲有心人登記
為了進一步治療，韵琳現急需社會大眾伸出援手，因暫未覓得合適骨髓作移植，她在IG呼籲大家出一分力，登記成為骨髓捐贈者。她雖知機會不大，但仍希望大家試一試，幫忙她以及其他有需要的人士。
我知道好突然，但阿琳真係好需要大家幫忙，想大家登記成為骨髓捐贈者，因為暫時都未搵到合適骨髓進行移植，所以醫生會嘗試係骨髓庫搵。我知道機會唔大，但都希望大家願意試一試，請大家幫幫我或者其他有需要既人，感激不盡！
登記成為骨髓捐贈者可以睇下香港紅十字會輸血服務中心資料：https://www5.ha.org.hk/rcbts/bm
登記成為骨髓捐贈者詳情及捐贈方法
有關捐贈方法可到香港紅十字會輸血服務中心查詢，有意成為骨髓捐贈者的市民，可親臨紅十字會的固定捐血站辦理登記及驗血手續；登記者需先接受驗血以確認其白血球組織型，倘若登記者的白血球組織型與病人脗合，就是一個合適的捐贈者。
- 登記成為骨髓捐贈者可以睇下香港紅十字會輸血服務中心資料：https://www5.ha.org.hk/rcbts/bm
