奶奶為慳水費迫新抱用二手水沖涼
最近熱浪襲港，天氣炎熱，不少人回家後就會即時沖涼，去除一身汗臭味。有女網民於香港討論區發文，大呻奶奶的奇特「慳錢」秘方。她指最近炎夏來臨，天氣炎熱，電費都因為長開冷氣，用電量增多導致電費支出增加，奶奶遂要求一家人「慳啲使」。奶奶為了節省電費，更會在半夜進入事主房間閂冷氣，她對閂冷氣的行為並無異議，但對於奶奶的「慳水費」方法就難以接受。
新抱拒用奶奶「環保沖涼水」
上星期四她頂著滿身大汗回到家後打算立即沖涼，卻發現浴室內有一個注滿水的水桶。奶奶見她進入浴室，便指示她使用桶內的水沖涼。她聞言就反問今日是否停水，豈料奶奶的回答令她感到十分驚訝：「唔係呀，我啲沖涼水嚟㗎，我哋啲水都慳啲使，唔係水費都會好貴，你都知你沖涼又耐，一定用咗好多水……」
事主對於奶奶的要求十分驚訝，心中暗自無奈：「但係奶奶呀！慳錢都唔係去到呢個地步呀，你啲沖涼水依家好乾淨呀？要我用你啲沖涼水沖涼咁我寧願唔沖。」後來她在沖涼時亦拒絕使用奶奶的「環保沖涼水」，結果奶奶「畀面色我睇」。
奶奶慳家行為惹網民熱議
帖文引來大批網民熱議，有網民指出不需要「慳到咁盡」，因重用沖涼水有衛生問題：「好難頂，水都省成甘，你哋生活有幾困難？」、「你叫佢用你啲刷牙水嚟刷牙嘛！」、「你奶奶沖完涼啲水煲來飲，對身體有益，百毒不侵」。同時也有網民建議奶奶可以到康文署轄下的體育館沖涼，便可以完全節省水費：「善用社區設施，去游水、打波後都可以沖涼，你可以提議俾奶奶，咁就起碼慳咗佢自己啲水費。」
