客人指控迪士尼員工態度差 網民一面倒鬧爆：你先係西客
近日有網民向Facebook專頁「西店Hi客之道 Hispitality Secret」投稿一張圖片，圖片似是其他群組的文章。該名事主表示，早前在香港迪士尼酒店商店購物時「買嘢買到一肚氣」。當時事主選購完商品後就到收銀處付款，便隨即向收銀處員工出示會員卡及表示要用印花折扣券，但事主表示收銀員收錢後卻告知沒有為他儲印花。
他表示，因為已有的士在外等候他上車，時間趕急，因此表示：「咁算啦，由佢啦但係我會投訴你嘅」。之後收銀員就大鬧：「好呀快啲走啦拜拜」，整間店都聽到收銀員的吵鬧聲，後來更失控地衝出收銀台追著事主叫罵。收銀員激動地表示是因為事主一直催促所以才忙中出錯，又說到他不稀罕這份工作。事主稱：「我一開始就遞張卡俾佢話要用印花折扣，佢識幫我用折扣但唔識幫我儲分，事後睇返張單仲要連會員Discount都無，即係收多咁我錢」。
他抱怨到店員做錯事，卻推卸責任到客人身上，還追著客人指罵，對迪士尼的員工十分失望。並在文末加上「既然你唔稀罕份工我實幫你搞大佢」、「好後悔當時無拍片淨係影咗一張相」、「迪士尼燥狂員工」3個hashtag。
投稿文被公開後網民不但沒有同情事主，反而大鬧事主是無理的西客！網民紛紛表示：「個客要幾西，職員先有咁嘅反應？好明顯中間就隱瞞咗好多嘢」、「又話算，但係又投訴人」、「明知Call咗的士仲慢慢買嘢」、「職員可能做漏咗，但點解你自己咁趕時間Call定車，預到時間咁抆水先去畀錢」。
同時也有不少網民質疑事件的可信性：「如果個Staff真係咁嘈，無理由張相後面嗰個人可以咁平靜睇飾物唔食花生㗎喎」、「水份好高吓」、「我唔信如果個職員真係咁講，會無經理出嚟攔住佢」。
