Dickson遊日本送「腳皮烏冬」當手信：係免費攞
自從上次送「廚餘式芒果乾」做手信被傳媒廣泛報導加上《愛回家》都抽水之後，余德丞似乎唔介意被標籤「地獄手信王」人設。上星期余德丞遊日賞櫻之後，返香港做開咪節目時，率先掏出一包看似廉價的烏冬，被節目拍檔余迪偉以「腳皮」作形容！
在電台中，Dickson坦言這是一包「Do姐唔會鍾意食嘅手信」，隨後揭曉手信的真身是手打烏冬：「呢包嘢係放係收銀隔離，每人可以免費攞，因為啲烏冬嘅頭頭尾尾佢用唔晒，所以就整成一包包」Dickson就澄清這包「碎麵」並非真正手信：「我講係笑咋，唔係手信！」
隨後，《口水多過浪花》亦都在Facebook發佈分享這則爆笑事件，而帖文中寫到：「有人再挑戰手信底線⋯⋯先買咗包咁嘅唔知乜嘢俾我哋⋯⋯」照片中的手信看似平平無奇，透過成分標籤僅見到「乾麵」、「國內製造小麥」的字眼，不少網民見到真身後都震驚表示：「第一眼以為係腳皮！」、「一包嘢3個人Share？」、「一陣間《愛回家》又抽水啦！」、「完全唔畀面！仲要免費！」、「底線沒有最低，只有更低」、「咪埋眼喺donkin買一盒手信都好過呢包嘢，唉」
Dickson搣甩「地獄手信王」身份 Do姐讚：頭一次啱心頭
實際上，今次Dickson相當識做，知道Do姐有用手巾仔的習慣，特意送了一條金治毛巾，用心介紹道：「今治毛巾有個好處就係，5秒內一定索到水，一定會沉底，證明佢一披身就會索乾所有水」令Do姐忍不住說到「實不相瞞，你買咁多次手信，頭一次啱心水。」
至於余迪偉的手信就是衣物除污筆1枝，Dickson透露知道對方喜愛盆栽植物，可惜沒有見到相關的手信，因為退而求其次：「之前有聽眾特別推介！佢話從來未試過咁乾淨，香港冇得買，係日本Amazon到訂1 pat，咁就分枝畀你」Do姐都忍不住講了句：「終於啱返次！」除此之外，更見到Dickson東京必買手信之一的Press Butter Sand。
因此事後《口水多過浪花》亦都有再度出Facebook文寫道：「好彩之後識得補鑊，送咗呢條靚手巾仔俾Do姐，送咗呢支洗污漬筆比余迪偉。」看來Dickson終於搣甩「地獄手信王」的身份，而網民都讚：「有心思！余公子好波」、「依條手巾源自日本四國，質素極高」、「其實余公子特登買啲唔知咩嘅返嚟，係想搞笑等大家玩下，佢開心下啫！」、「已經變節目gimmick」、「買啱手信進步了」。
余德丞曾派廿塊芒果乾做手信 網民嘲：好有誠意！
其實，Dickson被封「地獄手信王」源於去年去泰國旅行後，所派發的芒果乾手信遭大家嫌棄！當時DO姐直言：「好差啊啲手信！唔係一包完整嘅，好似係屋企食剩咁嘅，一陣真係要影相畀大家睇！得個幾廿塊芒果乾以為好矜貴啦，我就率先食啦，甜到漏啊！難食啊！」
於是Dickson馬上為自己平反，他先是表示要先好好品嚐味道，隨後就解釋自己在機場買手信，當中有著各式各樣的手信，就連芒果乾都有3款，其中一款牌子更是被大家公認最好吃，不過Dickson就沒有購買該產品：「首先，佢個包裝好大包，你當係家庭裝，真係好大包！」不過DO姐反駁道：「宜家你唔係每人都有手信，而係一人一pat！」又抱怨表示：「我去日本排隊幫你哋買啤酒，拎返嚟原封不動！」
余德丞用心良苦原來背後有原因 網民： 見到實物先知少得誇張
隨後，Dickson再次解釋，原來背後用心良苦：「佢真係好大包，第二！佢每一塊都好大塊，我拎返嚟你哋好難食到。同埋我知道大家下午茶未必會食太飽『梅下梅下』，所以我就揀咗個容易食嘅，細細條嘅芒果乾。」之後他在補充表示自己買了豬肉乾等的其他手信，不過忘記帶回來，澄清說到：「我唔係咁樣嘅人」
𤓓爆手信事情遭《愛回家》抽水！
當時除了遭到網民恥笑更被《愛回家》影射，當時早前《愛回家》一集「交換手信的惡夢」，描寫三太嫌棄的公司手信Top1， 就直接抽擊，用余德丞與Do姐在商台節目《口水多過浪花》的衝突借題發揮！這集講到「接龍集團」的三太樊亦敏好想收到同事的旅行手信，但卻被翻舊帳指她「要求高」，收到土產手信後大表嫌棄：
重現「密實袋分派手信」事件 余德丞躺著中槍！
劇情講到「接龍員工」俊華由菲律賓回港後，以密實袋將芒果乾分成多個小包，逐一派給同事，三太收到卻嫌包裝不夠高貴，甚至狠批為 「廚餘」，如此另類的手信包裝方法，與去年余德丞泰國回港後的手信派送方式「撞橋」！
