撰文：CY｜圖片來源：Facebook群組「Staycation HK Hotel – 留港宅度假 本地酒店住宿優惠」
住香港零負評五星級酒店有怨言！瞓落枕頭飄出恐怖異味
事主於Facebook群組「Staycation HK Hotel – 留港宅度假 本地酒店住宿優惠」分享酒店入住經驗，話自己日前入住一間位於金鐘的一間老牌五星級酒店，明明該酒店在最近風評甚佳——甚至稱得上毫無負評，遺憾今次入住經歷卻讓她有所失望。
最讓事主失望莫過於房間枕頭。作為睡覺使用的貼身物品，事主表示一瞓落枕頭，就飄出陣陣異味，「有陣臭屁味散出來」。好在事主良心猜測「唔知係咪物料有膠」，亦話並非全部枕頭都有這個問題，萬一陣味真係陳年舊屁，就真係相當恐怖喇！
事主亦有話早餐提供的食物味道好普通、缺乏鮮味，又認為今次慶祝結婚周年入住，「其實連手寫賀卡都無張」，另外「（晚餐甜品上）連寫句 Happy anniversary 都欠奉」，讓她頗為不滿。
不過作為老牌酒店，似乎差極有個譜。事主後來對酒店的評價整體還算不過不失，話一班誠懇有禮的員工仍然抵讚，另外房內餐飲食物事主直言「為其他服務配套上嘅不足爭返唔少分數嘅」。
究竟事主經歷是否屬實呢？原來好多曾經入住的網民，都話聞到枕頭有臭屁味，不過就未有聯想到是酒店問題，即刻冤枉男朋友或者老公放屁，如今被事主點醒才恍然大悟。有網民都同意事主猜測，所謂「臭屁味」應該是「臭膠味」，建議搵酒店員工換另外一個枕頭最實際。
亦有網民話「唔係講笑，個粵式早餐堅係好難食，有啲失望」，獲回覆「蝦餃裏面隻蝦係災難」，似乎相當同意事主意見。
不過眾多留言中，唯獨無人鬧酒店職員服務態度差，亦有留言幫口話雖然臭屁枕頭好恐怖，不過酒店有好多位都好吸引，大讚裝修夠豪華夠Vintage，「都係鍾意舊裝修復古啲，靚靚水晶吊燈，個海景套房一流」。
