撰文：JY｜編輯：JA｜資料來源及圖片來源：[email protected]
中年紋身漢「撻朵」搭霸王車被拒 反要求站長上繳千元最終被捕！
事發地點位於青衣寮肚路長宏邨小巴總站，大約早上8時許，當時一名姓盧的中年大漢，年齡約40歲，自稱「阿峯」。他打扮邋遢、身穿穿窿及帶污漬的白色短袖T恤，踢着拖鞋、手握電話，走進站長室，自稱是新義安「顏成嘅細佬」，向站長投訴小巴司機不應向他收取車費，堅持拒付車資。
阿峯不停「撻朵」！細數與各話事人的關係
片段中可見「阿峯」大條道理的說：「我係成哥啲細佬，司機都唔會收錢，大家都識我，我成日喺度同成哥傾計」，他表示自己「響得成哥個朵」，就可以任搭「霸王車」，向姓王站長挑釁，要小巴司機給他們面子。而站長馬上反駁：「俾乜面？你上車就要俾錢」站長堅持要收費，任何人乘搭公共交通工具都要付車資。
站長堅持要求付車費 其後更要站長上繳一千元！
站長見對方仍然死纏爛打，便機警地假扮就範，但暗中盤算蒐證及報警，讓對方以為自己屈服。「阿峯」以為自己得逞，便開始變本加厲，其後直接要求站長付上一千元，直言「大家攞個意頭」，同時不斷重覆吹捧由「細超」帶領的「屯門新義安」及他的「大佬顏成」是幫中地位舉足輕重，「你唔係淨係侮辱緊我，仲侮辱我大佬，侮辱緊我嘅單位」。
醒目站長拍下罪證 警方到場將其拘捕
站長拍下足夠證據後便報警求助，警方到場後跟進並將其拘捕，由葵青警區反三合會行動組調查，事件中站長沒有任何損失。據悉，有反黑組警官透露，以往未有聽過案中男子提及的「顏成」人馬，而「細超」應該年過七旬，退隱江湖逾30年。
