受到疫情影響,各行各業大受打擊,不少人加入失業大軍。日前,有位失業港男於討論區發文,稱上個月被公司裁員,但農曆新年將至,其母親要求他額外多給6,000元家用過年。該打工仔認為母親的要求不合理,亦沒有體諒其失業的狀況,因而感到苦惱。

撰文:Katie| 圖片來源:unsplash

有位打工仔於香港討論區以「無工返,老母仲要問我拎6,000蚊過年」為題發文,指自己上月被解僱,幸好有儲蓄,尚能應付日常支出以及家用。不過,近日他卻收到母親的WhatsApp,要求他額外多付6,000元家用過年,但該打工仔卻認為今年新年將受疫情影響「唔會大搞」,指母親的要求不合理,更質疑母親的做法是:「為面?定係為錢?」

「我已經解釋過其實冇工返,今年新年其實都唔會有乜氣氛,返唔到大陸,大陸都唔會有親戚落到嚟,更加冇乜人會上嚟拜年,其實真係唔需要大搞,不如從簡普普通通咁搞……但係佢死都唔肯,咁我搵阿爸傾,其實佢都唔想大搞,但係老母話一定要照搞……其實今年都唔會有新年啦,都唔明大搞做乜,為面?定係為錢?」

樓主後來回覆網民表示,母親的要求實在超出自己的能力範圍之外。

「我根本畀唔到,畀完佢,下個月又要畀家用,我都要食飯㗎。」

母親要求畀多6,000蚊家用過年 打工仔失業一個月 大呻超出能力範圍 網民:畀係人情,唔畀喺道理
該網民表示,母親要求多畀6,000蚊家用過年。(圖片來源:unsplash)

網民斥樓主:6,000蚊都同阿媽計!

樓主帖文一出,引起網民兩極回應。有人認為樓主既然有積蓄,而6,000元屬小數目,不應與母親計較,更不應為錢而反面,當「一次半次當氹下老人家開心」。

  • 「一年都係一次啫,最多咪自己再慳啲囉。」
  • 「你阿媽一年問你攞幾多次?一次半次就氹下老人家開心啦!」
  • 「佢出到聲就畀佢啦,自己阿媽冇計, 快啲搵工實際!」
  • 「就算老母唔問你,自己都自動自覺要畀啦!」
  • 「其實6,000蚊真係好少。雖然冇嘢做,但有儲蓄,畀6,000蚊氹下老人家都冇乜所謂。除非真係冇錢。」
  • 「6,000蚊真係唔係多,又唔係60,000。」

「你咁大個人冇積蓄? 6,000蚊都同阿媽計,你計下阿媽養你咁多年,嗰度幾錢。唔鬧你都唔得㗎!」

「六千,可以畀就畀。為六千反面,唔值。暫時冇工返,唔係一直冇工返。你做好仔咁多年,因為一次六千,之後要做衰仔。就算下年畀六萬都補唔番。」

「如果父母都冇收入,做仔女的就盡能力畀吧,自己用少點食差點都沒所謂,如果能力上的確做唔到就講明畀父母聽,父母都應該會諒解的。」

阿媽做法不近人情?

雖然部分網民認為樓主過分計較,但亦有人指其母親明知兒子失業,卻沒有體諒對方,要求不近人情。

  • 「你阿媽呢啲咪係叫不近人情,做人唔睇環境囉。」
  • 「6,000蚊呢個時期真係好多好有用,換轉係我唔會畀。」
  • 「不過你阿媽又係嘅,明知咁窮㗎啦,仲搞乜嘢?」
  • 「不過你媽咪未必係充大頭鬼嘅,好多人鍾意過節,佢哋覺得有節日感可以為平凡嘅日子帶嚟色彩,不過我諗有呢種諗法嘅人通常好得閒。」
  • 「唔會畀,失業要留多個錢喺身邊,要畀最多畀1,000蚊至2,000蚊。」

母親要求畀多6,000蚊家用過年 打工仔失業一個月 大呻超出能力範圍 網民:畀係人情,唔畀喺道理
有人認為,其母親的做法沒有體諒兒子的處境。(圖片來源:unsplash)

畀多啲係人情 唔畀係道理?

不過,有網民卻指家家有本難唸的經,建議樓主應再向家人解釋現況,畀家用應量力而為,有人直言「畀係人情,唔畀係道理」。

「每個家庭背景都唔同,家家有本難唸的經。盡咗孝心就好,太愚孝有時都唔一定係好事,真心問過得自己過得人。」

  • 「畀係人情,唔畀係道理。但同屋企人講道理係最蠢。如果決定唔畀,試下講感情。同阿媽講,冇錢搵工,叫佢借萬四,加上六千,齊頭欠佢兩萬,有工返每月四千,還半年。佢又有息,你又有錢。」
  • 「一係同佢講錢就係得咁多,而家畀咗之後幾個月喺家用度扣番,叫佢自己決定。」
  • 「如果往年都係咁畀開,唔好理佢點搞。而家仲畀得起咪畀囉!如果你嘅錢唔夠3個月使費(預1個月內搵到工,返1個月先有糧出,1個月應急)。到時冇綜援都要食屋企嘅…… 咪認真咁同佢解釋下。」

母親要求畀多6,000蚊家用過年 打工仔失業一個月 大呻超出能力範圍 網民:畀係人情,唔畀喺道理
有人認為畀家用應量力而為。(圖片來源:unsplash)

Tags :