「敍利亞風」單位被網民彈爆？室內設計師讚有品味　裝修費或50萬貴在呢樣嘢

單位裝修被指「敍利亞風」　網民斥食人血饅頭

最近在Facebook群組「香港裝修中伏、室內設計、傢俬店苦主群」有一帖文，內容提及到「因為啲裝修錢係父母出，裝修完後，父母上咗去睇，差啲斷絕關係」，更附上多張照片供網民評價。從照片可見整個單位都以灰色為主調，配以磚牆設計，水管刻意外露，營造出獨當一面的風格。

網民看到後笑言「終於明點解你啊爸啊媽想同你斷絕關係」，指「你係咪自己袋落袋啊啲錢，咁都叫裝修？」、「騎呢人先會鍾意，呢啲都叫品味？」、「呢到要長期播放子彈炮火聲，配合返主題」、「敍利亞風好貼切，你要唔要炸個洞喺間屋」、「呢啲樣住清水樓咪得，係都要畀裝修佬賺」、「呢啲先安全屋，包無人入屋打劫」、「第時賣返出去先大鑊，要使另一筆去執返好」。

不過亦有網民「睇唔過眼」，指現時戰火仍在持續，「何必咁小事都要掛人哋個名上去」、「你咁樣同食人血饅頭無分別，想拎attention都唔係咁玩」、「唔知佢哋聽到香港人咁講有咩感覺呢，尊重啦」。

設計師大讚有品味：「唯一唔好就係張地氈」

設計師黃森指，當他第一次看到圖中的設計時已忍不住大讚：「好靚！個用家好叻」，他指其實行內並沒有「敍利亞風」的形容詞，通常都以工業風為稱，只不過這種屬於重工業風，一般在Cafe或Party Room多見，家居環境極罕有。「佢幅牆、天花板同水管都好有質感，保留到一種好有歷史痕跡嘅感覺，傢俬都配搭得好好，唯一美中不足嘅係張地氈。」另外，他亦大讚裝修設計完全體現重工業風的重點，「不拘小節、明喉外露、帶點不經意的破損、看似不完美的美、好Causal嘅感覺」，不過長輩一般難以接受，香港家庭亦少見。

裝修費估計最少50萬

另外，最多網民好奇的是這種「裝修」的價錢，有人指「平到唔信，咩都唔使整」，但亦有人指「呢啲先最難搞，無幾廿萬唔使諗住可以整到咁」。對於網民所指「漏水就大劑」、「呢啲唔叫裝修，係爛尾樓」及裝修費的評論，黃亦有另一看法。就裝修費方面，他指很視乎單位的先天條件，「如果本身喺工廈就平好多，因為工廈本身幅牆已經差唔多係咁，就咁睇相，佢拆完個內殻之後無做到批盪、上漆、內藏電線嘅工序，少咗3個步驟已經慳唔少錢。但若然單位是在舊樓或是新樓，則有另一說法，裝修費最少50萬。他續指「舊樓同新樓本身個牆係唔會用磚，要刻意拆爛佢然後再鋪磚，再上漆做呢個水泥牆效果，咁就貴好多，好多修飾要做返。」

而針對另一個網民評論得最多的問題，指「水管外露漏水就麻煩」、「用鐵喉好易生鏽」、「呢啲好易發霉，到時你就後悔」。不過黃指圖中所見應是用上銀喉，「其實有無收入牆內無咩分別，可能仲好，因為有漏水問題可以即刻搞，唔使又要整幅牆」，唯一不方便的只是容易碰撞，有機會「爆喉」。