話說我去旅行成日唔記得帶M巾(面膜就一定記得囉),次次都係要用嗰時先買!好驚險!但就因為咁,被我發現咗原來 台灣M巾 好好買! 今次就同大家分享,我每次去台灣都會買嘅女性用品:衛生巾! 台灣M巾 嘅價格可以話平香港一截,而且牌子、種類亦非常多,除咗有香港常見嘅品牌,例如係Whisper「護舒寶」、Laurier「樂而雅」之外,亦有唔少香港不常見但一樣好用嘅品牌!

(編按:早前 GOtrip 出了張圖,指女生去旅行最怕就是M到,唔少讀者都有留言分享,自己因為親戚突然到訪,要即時出去買M巾嘅經驗!唔想去到唔識揀,睇呢篇文就啱喇!)

01 | Sofy 蘇菲

「蘇菲」係日本老品牌,喺台灣非常常見,但香港我就未見過。其實呢個牌子非常好用!(日本嘢?)「蘇菲」嘅「彈力貼身」係最出名的,特別推介佢哋嘅「超薄體貼量少型」!因為比較細塊得嚟又有護翼,非常適合period最後一兩天使用!

02 | Whisper 好自在

「好自在」其實即係香港嘅「護舒寶」。我嘗試喺台灣搜羅近排大hit嘅「液體M巾」,但搵唔到,相信仲未推出台灣市場,如果搵到我會盡快通知大家!Anyway,「護舒寶」各種日用、夜用衛生巾都可以喺台灣搵到,價錢亦都比香港平㗎~

03 | Kotex 靠得住

相信Kotex 「高潔絲」係好多年輕香港女仔鍾意嘅品牌,台灣叫「靠得住」,亦都係非常容易喺各大屈臣氏、藥妝店搵得到,價錢亦相當相宜。

04 | Laurier 蕾妮亞

Laurier(香港的樂而雅)喺台灣好hit!有楊丞琳做代言,非常搶眼而且容易搵到!呢個牌子最出名嘅當然係「零感特薄」系列啦!另外新出嘅「舒護free」系列都值得一試㗎!好啱鍾意貼薄輕盈感覺嘅女生(冇錯,我個人係用開Laurier,所以好熟的)。

其實台灣嘅M巾選擇非常多,不過以上 4 款就係最常見、最容易買得到、價錢最大眾化嘅~

溫馨提示:台灣同香港一樣,都會徵收膠袋稅,所以各位要記得自備環保袋去shopping喇!


fb: 兼職空姐姥姥

Ig: christyylolo