方力申曾經講過:「啲奶假㗎!」勢估唔到呢句嘢可以成為百搭之選。除咗啲奶可能係假嘅之外,中國近期又出現「啲Supreme假㗎」嘅山寨Supreme實體店。一齊跟住記者睇睇,到底有幾假啦喂!

撰文:白仔丨圖片來源:Highsnobiety、無才YouTube、WeChat、微博丨資料來源:Highsnobiety、無才YouTube、WeChat(原文刊於《新Monday》)

山寨Supreme深圳開實體店 中國真係乜都可以係假!

Supreme logo找不同

呢間山寨Supreme實體店係位於深圳嘅市中心地段,所以租金都非常貴。外圍裝修睇上去真係好靚,不知情者都會覺得呢間會唔會真係一間真Supreme呢?原來細看之下,就會發現呢間「Supreme」嘅不同之處。

原本應該係「®」嘅右上角標誌,竟然變咗一個「NYC」重疊嘅logo?雖然話就話Supreme係嚟自紐約,但大佬,你都唔使整個「NYC」疊到疊羅漢咁嘅款㗎!但真係唔細睇都唔會覺眼!

其實呢個「NYC」標誌都唔係第一次出現,喺早前有公司指,自己會同Supreme合作出聯乘商品,又搵嚟一位黑人同胞飾演Supreme嘅創辦人,更加喺記者會上簽訂合約。但記者就記得Supreme嘅創辦人係一位白人嚟,唔通……佢曬黑咗?

吳亦凡同款超Skr衛衣

到底入面係賣緊咩?唔難見到嘅就係一系列炒價超貴衛衣,呢件綠橙鴛鴦衛衣炒價超高,再加上超Skr嘅凡哥吳亦凡著完,炒價又再升一級。但係喺呢間Supreme只需用接近一千嘅人仔就買到喇!你話抵唔抵?

超貴「box logo」衛衣只需一千蚊人仔

講到Supreme最值錢嘅東西,就一定係保值嘅「box logo」衛衣或者tee。而呢間山寨Supreme都早為F/W做好預備,率先復刻白色紅box嘅「box logo」衛衣,呢件「box logo」衛衣只需要880人仔就買到,真係抵到爛!但係,嗰個神秘的「NYC」又會出現喺件衫度,一齊嚟睇睇Highsnobiety買返嚟嘅衛衣啦!

超簡單Supreme授權方法大公開

WeChat公眾號「Supreme情報網」為咗正義而出動,為大家睇下到底呢間「Supreme NYC」係咩料,更加出現咗驚為天人嘅發現,除咗有廣告去話你聽邊度有Supreme授權外,更自稱有「中國大陸地區的Supreme商標授權」。再仔細望一望,人哋係「Supreme NYC」呀!唔係「Supreme」呀!

神奇嘅係,呢個「Supreme NYC」竟然真係通過咗中國嘅商標註冊,所以唔好再話人哋係假嘢喇!明明人哋係合法嘅「Supreme」嚟!

而公眾號更加不惜一切,嘗試去聯絡山寨Supreme嘅客服,更發現對方光明正大咁話自己賣嘅都係正版正貨,仲歡迎唔同方面嘅合作。最誇嘅係,佢哋更加可以將「Supreme」同「NYC」拆開嚟用。實在係太勁喇!

YouTuber無才親自刺探情報

有位專玩波鞋嘅內地YouTuber無才都曾經因聞名而去過呢間山寨Supreme。雖然入面唔畀拍攝,但無才先生都話當中最令人注目嘅,一定係嗰個神秘的「NYC」標誌無處不在,所以話呢間嘢認真巴閉!

呢間山寨Supreme唔知幾時會好似「新百倫」同「喬丹」一樣,去告New Balance同Air Jordan,但相信呢間山寨Supreme一定都可以呃到唔少人去購買。最後記者提提大家,做個精明消費者呀!