網民斥Call車平台貴的士3倍　價錢不合理籲勿幫襯：的士海鮮價就可接受？

網民投訴泰國Call車平台「貴到離譜」　直斥「㩒住嚟搶」奉勸罷搭表態

近月來除了柬埔寨詐騙事件牽連到泰國，令港人紛紛表示短期內不敢再踏足外，就連泰國的Grab都備受爭議！有網民分享指近月到泰國旅行，在當地如常地使用Grab來Call車，但價錢卻貴得不敢再乘搭，更指「除非你有大把錢，如果唔係真係唔好搭」。事主指對上一次到泰國旅行是2019年年底，當時已覺得Grab的價錢貴得有點誇張，在旅程最後一天去機場時計程車價格大約300泰銖（港幣約$65），但Grab卻索價逾500銖（港幣約$108）。但由於當時身上現金不夠付路邊攔車，所以寧願揹十幾公斤的背包轉兩次鐵路到機場，「辛苦啲都唔想畀人搶錢咁」。

直至近來疫情下再次踏足泰國，Grab的價錢同樣不跌反升，單時選擇電單車已要200泰銖（約港幣$43），私家車則要250泰銖（約港幣$54）。事主指出發點距離餐廳只11公里，在路邊攔的士最多只需80泰銖（港幣約$17），Grab的價錢比的士多3倍，指「一睇到個價就嬲到想摔爛部電話」。更建議大家日後到泰國旅行，建議搭的士較方便，「如果你有耐性，一定會遇到肯跟咪錶收錢嘅的士司機，就算你上車時佢話跟咪錶計，上車後發現佢根本無跳錶，你可以即時叫佢停車再截過第二架。我覺得咁樣好過畀Grab收咁貴。」

網民撐網上Call車：的士海鮮價劏得勁過Grab啦！

不過網民看到「警世文」後卻大不同意，指Grab和Uber的運作類同，一直都知道價錢會比在路邊隨意截車貴，但卻可免卻被濫收費用或兜路的麻煩，大家都是明碼實價，你情我願才接載上車。「佢又唔係臨時上車先加價，大家一早知個玩法㗎啦」、「Grab就係用錢買方便」、「在Grab出現前不知在曼谷受咗幾多的士佬氣，等咗5-6架車都唔肯跟跳錶收錢」、「泰國Grab確實貴咗好多，但主要係因為汽油價格貴」。亦有網民指由於油價貴了不少，很多司機「近又唔去，遠又唔去」，因而這段時間少了供應，不論價錢是否昂貴，而是「有錢都無得搭，等極都無車」。

泰國的士開天殺價　本地人都懶得搭

不過別以為Grab的供應少了，泰國的士便是另一好選擇。有網民其後表示，即使不乘搭Grab也不會選擇當地的士，因其開天殺價的情況「離晒大譜」。網民表示在疫情期間的士司機的收入都大受打擊，一日可能只有一兩宗生意，所以當時他們接載本地人時也很好態度，「跟足規矩收咪錶價」。惟現時遊客逐漸「歸位」，泰國的士卻變得放肆，「一多遊客就亂咁嚟，試過有次落雨想搭的士，平時都只係60泰銖（約港幣$13），對方竟然開天價要300泰銖（約港幣$65），收得貴都唔好咁過份啊！」、「受氣條數都喺返到」。由於的士會「揀客落手」，所以本地人都懶得截的士，對方亦懶得停車「開價」。