【LOFT必買】LOFT係日本連鎖生活雜貨店,每次去都總會發掘到唔少得意又實用嘅精品。既有可以重複使用嘅環保飲管,亦有今年日本超人氣嘅「臀部專用番梘」!睇睇有咩得意又方便嘅產品,下次去shopping就有晒target啦!

撰文:C|圖片:ロフト

LOFT必買 人氣產品

1|SENTAKU MAGCHAN【連稅 1,944円/約HK$136】

使用99.9%高純度化學元素・鎂,於洗衫時可產生水素及電解水,有效消除霉菌、去污,係首個以鎂作清洗用途嘅洗衫用品。

使用時,只需連同污衣一同放入洗衣機便可,甚至唔使用洗衣液/粉。使用後,同乾淨衣物一同晾乾,以家庭用計算嘅話,可重複使用約1年(約300次)!

2|MARNA Ecocarat 水樽乾燥棒【連稅 1,058円/約HK$74】

之前有吸濕力強而大熱嘅珪藻土,呢款Ecocarat嘅吸、放濕力甚至係珪藻土約5倍強力!平時洗完水樽,倒放後需約7小時先可以完全吹乾,而使用Ecocarat則只需約3小時便能吸乾樽內水氣。使用後,只需放到通風良好嘅地方吹乾,便可重複使用。

3|HORIE Titanium Straler straw & stirring stick【連稅 756円/約HK$53】

隨住「減塑」成為全球熱烈討論嘅議題,環保飲管產品大受歡迎。呢款環保飲管由純鈦製造,不會因離子化而溶到飲品中。飲管輕巧耐用,不會生鏽,而且表層嘅酸化膜有經陽光照射後可分解雜菌嘅「光抗菌作用」。

4|ZEBRA  開封器+油性marker兩用筆【連稅 195円/約HK$14】

筆蓋上設有專門用嚟?開貼於紙箱上嘅紙質或布質封箱膠紙嘅膠製開封器。開封器使用耐用性塑膠製造,唔會切傷手,或者?爛箱內物品。撇除筆蓋後,就係一般油性marker,兩頭分別為6mm粗線筆頭,及2mm幼線筆頭。

 

5|KING JIM 雜學罫線簿【連稅 411円/約HK$29】(LOFT限定)

一打開以為係普通記事簿,仔細睇就會發現,記事簿上嘅橫線寫滿咗文字!例如買咗「國家名」嘅記事簿,就會由無數中、日文對照嘅國家名細密地組成分隔線。一本用以記事嘅筆記簿,唔止隱藏咗無數雜學,更可用作秘密留言紙條!

6|IROHA出版 STUDY PLANNER【連稅 972円/約HK$68】

用以建立溫習習慣嘅專用手帳,可愛設計用以提升學習嘅樂趣,以及帶來方便又清晰嘅使用感。一日一頁,一本可用3個月。

7|PLUS  省力長尾夾【連稅 486円(大)/約HK$34;378円(中)/約HK$26;324円(小)/約HK$23】

新設計再將長尾夾嘅把手部分拉長,比一直以來嘅產品,打開力度慳咗最大約50%。大多數長尾夾都好難開,有時甚至要出動到雙手嘅力先打得開,用呢款長尾夾就慳水慳力啦!

8|Group SNE 「We Didn’t Playtest This at All」桌上遊戲【連稅 1,620円/約HK$113】

美國超人氣「無理取鬧」嘅爆笑桌上遊戲。遊戲目的只係「取勝」。只要滿足卡上寫有嘅取勝條件,就可以取得優勝;相反,亦有做咗某舉動就會落敗嘅遊戲卡。遊戲人數為2~10人,遊戲平均所需時間為1~5分鐘。

9|Dream 腹式呼吸運動 長條「紙捲喇叭」【連稅 1,059円/約HK$74】

90後細個可能都有玩過嘅「紙捲喇叭」,原來仲有訓練腹式呼吸嘅用途!呢款長版紙捲有成約1m長度,只需深呼吸,便能做到腹式呼吸訓練。呢種簡單方便,又令人懷念嘅產品,喺日本非常有人氣!

10|Pelicansoap Hip care soap【連稅 648円/約HK$45】

臀部專用番梘。成分加入咗潔淨同peeling效果。固形番梘、蜜桃香等人氣相乘效果,令產品於2018年下半期熱爆日本!

11|協和工業 5 Seconds Shine足部去角質器【連稅 2,700円/約HK$189】

腳跟專用玻璃製角質去除器,以0.01mm精度加工而成嘅特殊構造玻璃,可避免令肌膚受傷。

12|Wazuku Teeth Shining【連稅 1,944円/約HK$136】

牙齒美白產品,刷牙後只需用LED光照射牙齒便可。唔單止方便、價格便宜,而且易攜。係目前LOFT嘅口腔護理產品中,最高人氣嘅一款!自9月開始發售後,直到現時都依然人氣絕頂!

13|ettusais quick care coat【連稅 1,026円/約HK$72】

想修護指甲時嘅好用品!塗抹後唔需要用洗甲水,能保持指甲健康及打造自然光澤感嘅指甲美容液。有倒刺、斷甲等問題都可以使用。塗抹後會形成一層薄膜。

14|Air kaol吸水力特強毛巾【連稅 864~4,320円/約HK$61~302】

宣傳文案為「並非只是一條普通的毛巾」,於2018年8月30日被人氣電視節目《カンブリア宮殿》介紹,隨即爆紅!纖維根根分明咁於空間中展開,因此綿嘅使用量係一般毛巾嘅一半,對環境非常好。

Air kaol比其他同類型大小份量嘅毛巾重量輕一半。用作浴巾亦非常合適。

15|Lourder 手掌按摩器【連稅 10,800円/約HK$756】

合共15層air pad按摩手掌各部分嘅hand massager,每隻手指都按摩得到。而且附有發熱功能,可有效促進手部血液循環。

下一頁:【日本必買2019】藥妝店銷量Top 3護膚品排名|MINON乳液打入榜首、NIVEA成潤膚霜王者!

常見問題

最新的日本入境及疫苗要求詳情?

日本入境開關最新消息,本厚生勞動省公布了最新入境放寬政策的詳情有打針及沒有打針都有相關的方法入境。而日本回港時,香港政府早前都發表了最新的香港入境檢疫措施。立即看。

去日本有什麼好去處及景點推介?

進入秋季,又是看日本紅葉的好日子,即看最新日本紅葉情報202216大北海道紅葉名所,以及紅葉溫泉鄉岩手縣花卷溫泉。未諗好去東京去邊好,可以看留意東京自由行2022