【日本便利店】去日本少不了要去便利店買下零食、宵夜甜品,款式多到試唔完!特別係企喺雪糕櫃前,總不由得要沉思幾分鐘,諗下試邊款好。夏日限定新產品都陸續登場喇!即睇今期有咩新搞作,mark低佢試試啦!

撰文:Carmen|圖片來源:相關機構

01|SUIKA FRAPPE西瓜冰

呢款新產品使用咗甜味非常突出嘅「黑美人」種類嘅西瓜果汁製成,而且呢款西瓜冰仲可以「連核食」!扮做西瓜核嘅係有一定咬口嘅朱古力粒,味道同咬口都能同時滿足!包裝仲用上西瓜嘅形象設計而成,夏天感滿滿。

發售日期:2018年6月17日起

出售地點:全國FamilyMart、CircleK・Sunkus(不包括沖繩

價錢:250円(連稅)

02|糖果色馬卡龍雪糕

由7-11發售嘅「糖果色馬卡龍雪糕」共有2款味道,分別為「薄荷朱古力」及「雜莓」味,馬卡龍使用咗喺冷凍情況下都唔會變硬嘅製法,中間再夾厚厚一層雪糕,口感新穎特別。

發售日期:2018年6月12日起

出售地點:全國7-11數量限定發售

價錢:248円(連稅)

03|Häagen-Dazs 白桃紅茶撻味雪糕

雪糕有淡淡嘅白桃味,再加埋鮮甜白桃醬,最後再配合埋味道清爽嘅紅茶雪糕,變成清爽鮮甜嘅白桃紅茶撻風味。

發售日期:2018年6月26日起

出售地點:全國Lawson

價錢:300円(參考價格)

04|Häagen-Dazs 夏日柑橘味雪糕

又有柑橘嘅淡雅甜味,又有牛奶香嘅柑橘味雪糕。活用咗柑橘獨有嘅清爽香味,再加埋帶微苦嘅柑橘醬,味道既濃厚又清新。

發售日期:2018年6月26日起

出售地點:全國Lawson

價錢:272円(參考價格)

 

05|牧場しぼり藏王高原特選新鮮牛奶雪糕

使用榨擠後3日內嘅新鮮牛奶,不添加任何香料或安定劑,令你品嘗到牛奶本來嘅鮮味!為咗保全牛奶嘅鮮度,而故意用包裝袋封好。奶味超濃郁!牛奶雪糕迷必試呀!

發售日期:2018年6月12日起

出售地點:全國7-11數量限定發售

價錢:173円(連稅)

06|不二家牛奶妹x赤城乳業 Milky ice bar

雪糕棒嘅原料同樣用上煉奶,再加上北海道產嘅鮮忌廉,味道更加深厚濃郁。最特別嘅地方係,呢次發售嘅雪糕棒喺冷凍程序中「做咗啲手腳」,再現咗不二家獨有嘅柔滑口感。不二家牛奶糖,fans一定要試啦!

發售日期:2018年6月5日起

出售地點:全國便利店

價錢:140円(連稅)

07|赤城乳業 Purin ice bar

主打「可用單手食嘅布甸」,使用咗北海道產牛奶製作,味道似吉士布甸。而且中間仲填入咗焦糖醬!十足十平時食開嘅布甸!

發售日期:2018年6月18日起

出售地點:全國便利店

價錢:130円(參考價格)

08|LOTTE 桃味雪糕杯

大大隻「爽」字嘅雪糕杯都推出咗桃味版,而且仲要係白桃+黃桃!質感似雪葩,中間混有微細冰粒,有咬口之餘,味道清爽,裡面仲加咗超多量細粒果肉!抵食到爆!

發售日期:2018年6月11日起

出售地點:全國便利店

價錢:130円(參考價格)

09|Häagen-Dazs 咖啡曲奇雪糕雪條

用甜味適中嘅牛奶朱古力包住帶有微苦嘅咖啡雪糕,表層粒粒曲奇非常有咬口!但包裝冇咩特別,望落普普通通,大家記得仔細搵啦!

發售日期:2018年6月5日起

出售地點:全國便利店

價錢:272円(參考價格)

10|Häagen-Dazs Juicy Bar 白桃&莓

用甘甜柔滑嘅白桃果肉同鮮色嘅雜莓果蓉組成嘅2層coatings,包住淡淡香味嘅白桃雪糕。果汁感超濃厚,但味道食起嚟又非常之清爽!日本人都大讚好好味!

發售日期:2018年6月5日起

出售地點:全國便利店

價錢:272円(參考價格)

7-8月超高期待值Häagen-Dazs雪糕

01|雙重紅豆雪糕

發售預定日:2018年7月3日

紅豆雪糕,配混有紅豆粒嘅鹽煉奶冰果子露,用唔同形式品嘗紅豆風味。中間更夾咗層甘香黃豆粉,有興趣試和式創作甜品嘅你就mark實喇!

02|黑蜜黃豆粉雪糕

發售預定日:2018年7月24日

由黑蜜冰果子露及黃豆粉雪糕組成嘅新口味,味道濃厚又帶清涼,食住雪糕過一個和式夏日。

03|濃厚牛奶味雪糕

發售預定日:2018年8月7日

由牧草開始,嚴格並徹底管理一頭頭乳牛,由此生出味道濃厚豐富嘅美味牛奶,再用簡樸嘅食譜製成口感柔滑嘅雪糕。由2002年至2010年發售嘅超人氣商品,再度喺超高呼聲下登場!

最新的日本入境要求詳情?

在入境日本前,建議先用Visit Japan Web完成一部分檢疫手續,便能更快速地入境日本,即睇使用教學,例如註冊步驟及同行家人如何填寫等,以及買定日本電話卡