關於機艙護膚,首先想做個普查:你有在機艙內敷過紙面膜嗎?

如果你問我,我會答你:千祈唔好呀!!!

紙面膜會倒抽你塊面的水分

因為飛機環境太乾燥,你敷面膜嘅時候,乾燥空氣會同你塊面鬥快吸乾 mask 嘅水分,一般人塊面幾乾都好,都有大概 30-50%水分,但係機艙空氣濕度就只有 0-20%,所以話,你塊面吸得快定機艙吸得快呢?當塊 mask 被抽乾後,仲會倒抽你塊面嘅水分添!

之但係,喺機艙入面點先可以唔敷mask又keep住皮膚靚靚?咁你就要做好以下準備喇!

01 |  護膚油打底

上飛機前用比較滋潤嘅面霜打底,最好係含有油分嘅,你可能會問:「有油分咪會生粒粒囉?」其實只要係不含礦物油成分嘅油性護膚品都唔會引致毛孔堵塞嘅,油分係可以防止皮膚水分喺機艙蒸發㗎!這絕對比敷面膜更實際啊!

02 | 塗防曬霜、補防曬粉

上一篇文都提及過,喺三萬幾呎上空,紫外線係極高的!即使閂窗都唔能夠抵擋 100% 紫外線。為防止變黑、雀斑黑斑,記得要塗防曬霜啊~

如果想唔化妝但又有淡妝效果,可以考慮塗有色防曬,咁就一舉兩得啦! 如果乘坐長途機,記得要每三小時補防曬,建議用防曬粉,一來容易補,二來可幫助控油,三來方便攜帶上機(非液體)。

03 | 紙巾輕輕印,面油去去走

因為機艙太乾,皮膚缺水就自然會標油。喺呢個時候,可能好多女生都會攞嗰隻藍色面油紙出嚟,NG!千萬不要用面油紙!

面油紙吸油能力太強,連面部應有嘅天然油脂都吸走,後果就係出更多面油!想面油去去走,其實只需要用普通紙巾,輕輕印走多餘油脂即可。

04 | DIY 機艙專用保濕噴霧

我諗好多人都會帶保濕噴霧上飛機,但唔識揀保濕噴霧有可能令肌膚更加乾燥!首先,建議使用不含酒精嘅噴霧,因為酒精係會加快水分流失。

私心建議 DIY 一支上機專用嘅保濕噴霧,做法:準備你平時用開嘅化妝水,倒入一個乾淨嘅噴霧小空瓶入面,再加兩滴護膚油,即成!噴之前先搖勻,咁就又保濕又鎖水㗎喇!

05 | 瘋狂補搽潤唇膏+口罩妙用

女生們,唔好忘記雙唇都係屬於面部皮膚保養一部分!嘴仔甩晒皮,皮膚幾好都唔完美呀(完美主義者出動)~

食完飛機餐就可以不停補搽喇! 如果係長途機,記得瞓覺前搽一層厚厚的,然後戴上口罩(飛機有供應),咁就唔怕起身嘴仔甩皮喇~

以上就係多年經驗告訴我嘅機艙保濕妙法喇!下次有大媽喺你側邊敷面膜時,就唔好陪佢傻喇~ 面膜就留番喺酒店同閨密敷啦~ 各位女生準備好去旅行未呀?

fb: 兼職空姐姥姥

https://m.facebook.com/parttimelolo/

下一頁:記者教路! 搭長途機  7 件必備法寶