01｜ 方便樸素型——諗著咩好煩，是旦！
所謂「養兵千日，用在一時」，樸素型嘅朋友將中學至大學所著過嘅社團T shirt(又稱頹T)收藏起梨，到去旅行嘅時候就係發揮頹T剩餘價值嘅時候喇。將五顏六色嘅頹T帶去旅行，當睡衣又得，出街又得。而且免卻襯衫嘅煩惱，慳行李空間慳時間，兼且整污糟咗都唔心痛。
常見出沒地點：泰國等東南亞國家
02｜浮誇型——自我解放
同第一類頹頹的人相反，浮誇型嘅朋友一去旅行就實行衣著大解放。抱住去到外國都無人識自己嘅心態，平時係香港唔會著/唔敢著嘅衫就會出動～闊邊太陽帽、浮誇太陽眼鏡、性感連身裙、花碌碌民族風……彷佛好似唔同咗個人咁。
常見出沒地點：馬爾代夫等渡假聖地
03｜呃like型——IG女神
古語有云：「工欲善其事，必先利其器」。對女神而言，去旅行就係要影靚相呃like架喇，咁要影靚想點可以唔化番個靚妝set番個靚頭著番件靚衫配合番呢～所以除咗去執行李時要逐套衫襯過外，即使冒住行李超重嘅風險，佢地都係會堅持帶埋直髮夾、曲髮夾、高踭鞋、耳環、手鏈、戒指……(下删一百樣)，務求去旅行都要靚到盡。
常見出沒地點：歐洲
04｜即買即着型——購物狂
從前有個都市傳說…買咗新衫就要即刻著！如果係去日本、韓國依d地方，十日嘅行程即興型嘅朋友通常只會帶頭幾日要著嘅衫，之後實行俾自己藉口瘋狂買新衫，今日買聽日就可以著得出街lu~
常見出沒地點：日本、韓國
05｜乞衣型? 帶爛衫去旅行 一日掉一件
亦有網民分享自己會帶舊衫、舊內衣去旅行，一日掉一件，每日穿完就掉，不用清洗。所以行李箱總有空間放戰利品，不會超重回港。不過有網民就指，「旅行要影相，所以會帶靚衫 ，但就會掉舊內衣褲」。