幾年前航空界有單嘢都幾出名,當時某機師被upgrade,然後提出進入貴賓室嘅要求被拒之後,佢就喺自己嘅Facebook page專頁寫出自己嘅經歷加感想,引起勁多人嘅討論。鑑於身分尷尬,我並冇打算喺呢度去評論事件,而上網亦一直流傳有關可以增加升艙機會嘅所謂攻略與貼士。今次就由我呢個crew嚟同大家睇下,點樣先可以提升到自己upgrade嘅機會啦!

點解會有升艙呢回事?

首先,點解會有升艙呢回事呢?其實都係源於超賣,不過係經濟艙超賣,例如一隻飛機只賣商務與經濟兩個艙,假設商務只有 10 個位,而經濟艙有 200 個位,商務又非全部賣出。基於商業理由,航空公司唔會只賣 200 個經濟艙位,可能會賣夠 210 個,就可能會有免費upgrade的情況。

免費Upgrade 航空公司會因為超賣而有免費upgrade的情況。
航空公司會因為超賣而有免費upgrade的情況。(圖片來源:GOtrip編輯部)

因為會預計有客人no-show,而商務艙賣剩的話可以upgrade,總之務求要全機爆滿達到最大收益。若果真的超出全機可賣座位數。一般來說,開櫃枱前嘅準備工作已經包括了鎖定可以升艙嘅目標乘客,咁有咩人會包括在內呢?又有咩人唔使諗呢?

5類最有機會免費Upgrade商務艙的人

01|於超賣時肯自願放棄機位嘅人

有時超賣了,地勤會問你可唔可以轉乘下一班,或另一目的地嘅航班,最後如果有客人no-show,你可以上番原本航班,有時、有時、有時(很重要,講三次) 係會upgrade你去商務艙嘅。或者以upgrade作為利誘你自願放棄已訂嘅航班機位。( 頭盔:睇航空公司規矩啦! )

免費Upgrade 不過就要遲啲先可以到目的地。
不過就要遲啲先可以到目的地。(圖片來源:GOtrip編輯部)

02|較貴的經濟艙票客人

其實經濟艙票都有分全票,行內叫full fare,同discounted fare。你可能會聽過咩Y class、M class、B class 都係經濟艙嘅sub-class,裡面細分唔同規矩,例如可唔可以改日子、可唔可以改目的地、有效期幾長之類。較貴的,當然自由度較高,而成功被upgrade嘅機會亦較高。

免費Upgrade 一架機有唔同機票價錢嘅客人。
一架機有唔同機票價錢嘅客人。(圖片來源:GOtrip編輯部)

03|航空公司職員

係,入嚟做職員,有啲航空公司甚至會放職員喺某些級別嘅會員之前。職員亦有分公幹,還是一般嘅 leisure travel。

04|自家會員,同盟會員

肥水不流別人田,好嘢梗係益自己人先。當然都會分級別了,鑽石卡、甚麼寶石卡、終身白金卡,就當然排頭了,然後金卡、銀卡。自己會員都全升了,就可能會考慮同盟嘅會員,即係咩星星聯盟、波波一家、天空隊伍嗰啲,佢哋都重有自己嘅級別,系統一開個名單,一目了然。間間航空公司唔同,概念卻大致如此。

免費Upgrade 係會員就一定第一個upgrade你先。
係會員就一定第一個upgrade你先。(圖片來源:國泰航空官網圖片)

05| VIP貴賓

的確,唔係個個大家諗嘅VIP都會買商務,有時佢哋都會買經濟艙,如航空公司嘅貴賓以至政府人員。

免費Upgrade 航空公司嘅貴賓以至政府人員都好大機會免費upgrade商務艙。
航空公司嘅貴賓以至政府人員都好大機會免費upgrade商務艙。(圖片來源:芬蘭航空官網圖片)

5類未必有機會免費Upgrade商務艙的人

01|團體票

旅行團,很簡單、公平,畀得一個畀唔到第二個,又唔可以upgrade晒全團。

免費Upgrade 一團咁多人,又點可能upgrade晒全團!
一團咁多人,又點可能upgrade晒全團!(圖片來源:GOtrip編輯部)

02|幾個人一齊

每嚟一個唔夠位,欠一個經濟位就upgrade一個,條數好計啲,容易處理啲。所以兩個人以上機會較微。

03|一家大細有小朋友

有小朋友都唔得?唔係歧視,不過老實講,小朋友較活潑,比較難避免影響到商務艙嘅客人,一般來說,機會都較微。

04|有訂特別餐

經濟艙與商務艙嘅餐唔一樣,你訂咗個餐,但upgrade咗你,就要再訂一個商務嘅特別餐,基於經濟與處理角度上,機會亦較微。

免費Upgrade 有訂特別餐嘅人都未必有機會upgrade。
有訂特別餐嘅人都未必有機會upgrade。(圖片來源:GOtrip編輯部)

05|衣著……

並非要全身名牌,一身貴氣,不過,倘若你衣著上有潛在可能會冒犯他人嘅字眼、標語、圖案,都為不適合。或者踢拖太過casual,都可能會將你原本upgrade咗嘅座位,安排畀其他更適合嘅人。

免費Upgrade 雖然上機想著得輕便,但踢拖就真的有點......
雖然上機想著得輕便,但踢拖就真的有點……(圖片來源:GOtrip編輯部)

千萬唔好同地勤講你不適!

很重要!千萬不要做!千祈唔好信扮病、有傷博同情。
你講咗唔舒服,我哋有責任要確保你嘅身體狀況可以安然無恙咁乘搭,我哋知道咗,就要彙報畀空中服務員及機長,由於我哋並非專業嘅醫護人員,我哋有指引需要客人出示有效醫生證明,證明身體狀況適宜乘搭,否則你可能會上唔到機。

免費Upgrade 扮病真係有機會令你上唔到機!
扮病真係有機會令你上唔到機!(圖片來源:GOtrip編輯部)

當然了,真係有病,就不要忍瞞病情,有需要可以搵訂位部改期。

Upgrade =/= 享用貴賓室!

By the way,通常免費 Upgrade 咗都唔會有貴賓室邀請,就算有,十居其九都係因為你嘅高階會員身分,而唔係嗰張商務登機證。
兼且,free upgrade 都會喺你個訂位入咗remarks,或者登機證上畫有記號,以作識別。

免費Upgrade 其實免費upgrade已經係一個bonus,唔好得一想二喇!
其實免費upgrade已經係一個bonus,唔好得一想二喇!(圖片來源:GOtrip編輯部)

免費Upgrade 真。商務, 還是開心商務, 一目了然。
真。商務, 還是開心商務, 一目了然。(圖片來源:GOtrip編輯部)

圖片來源:GOtrip編輯部、國泰航空官網圖片、芬蘭航空官網圖片