曾經有條地勤怒掟行李嘅短片喺香港網上瘋傳,好多人睇完都鬧到爆!先唔講地勤個行為對與錯,亦都唔會自己都係地勤,喺機場度做,就要幫返自己人。只係想講呢啲事唔係香港先有,呢啲都係冰山一角,所以今次就教你揀行李篋及寄行李7大注意事項!

Check-in後行李點運上飛機?

老老實實,小編都有試過爆篋爛篋,去完個旅行返嚟又要登記一大輪,又要等人收篋又話修理又話賠,總之搞一大輪!篋呢家嘢仲要唔係個個都有留單,又話要計折舊,乜乜物物,諗起都煩。

揀行李 爆篋爛篋要做嘅手續諗起都煩。
爆篋爛篋要做嘅手續諗起都煩。(圖片來源:GOtrip編輯部)

你可能會見過機場有啲車一條龍咁拖住好多隻銀色大箱,然後有個升降台成隻箱送入飛機,嗰啲機都係啲大飛機,行李一早就喺地牢(行李處理區)砌好晒入隻大箱 ,然後就送出飛機裝上去(所以就算佢點掟,你都唔會有機會睇到)。

揀行李 大飛機的話,行李一早就喺地牢(行李處理區)砌好晒入隻大箱。
大飛機的話,行李一早就喺地牢(行李處理區)砌好晒入隻大箱。(圖片來源:網上圖片)

由瘋傳片段可見,當日航班係隻bulk load機,bulk load 機都係啲細飛機。Bulk load機就好似一架車嘅車尾箱,啲行李係一車出去,然後一件一件經輸送帶送上貨艙,貨艙入面係人手逐件逐件砌積木咁砌到靚靚仔仔,又有高度限制,又要裝得妥當唔會四圍轆;而卸載行李就如片中所見,逐件逐件執落嚟,上車,再返入去客運大樓。小編出過去睇都覺得辛苦,仲要大熱天時,真係命都短幾年。當然啦!保持中肯嚟講……辛苦還辛苦,掟行李還掟行李,兩件事嚟,千祈唔好混淆吖嘛!得,明嘅。

揀行李 細飛機都會用輸送帶送上貨艙,再逐件逐件砌積木咁砌到靚靚仔仔。
細飛機都會用輸送帶送上貨艙,再逐件逐件砌積木咁砌到靚靚仔仔。(圖片來源:網上圖片)

如果係咁嘅話,買行李篋或者寄行李時,有咩要注意呢?

揀行李篋及寄行李7大注意事項

01|視乎出國次數

倘若經常出國,個人建議以較高預算買個質量好啲嘅篋,牌子唔講了,但一個好推好掟、捱得撞嘅篋,動輒都要 4 位數字。不過個人經驗,幾嚿水嘅,真係頂唔到好多次出遊,轆會爛,唔好推,自己辛苦,情願買個貴少少又有番幾年保養嘅好過!小編可能好彩有隻R牌用咗 7-8 年,仲未散,除番開每年都唔使 $1,000,起碼唔使煩。當然啦!一年先去得一次半次,就冇乜所謂啦!

揀行李 個人建議,如果經常出國,買個貴少少又有番幾年保養嘅比較好。
個人建議,如果經常出國,買個貴少少又有番幾年保養嘅比較好。(圖片來源:網上圖片)

02|盡量唔好買黑色

寄艙呢家嘢呢,始終唔喺自己視線範圍,的確令人擔心嘅!最慘係好多意料之外嘅事會發生,寄艙用嘅行李tag甩、人為錯誤冇上到你件行李……好多時候到你發現唔見咗行李,職員問你個篋有咩特徵,好多客都係話黑色袋一個、27 吋黑色硬篋……一個地牢,千千萬萬個黑色篋,真係唔知點幫你搵!就算用黑色,都貼番多啲嘢上去個篋度做啲記認,寄艙前穩陣啲影返張相。仲有最最最無奈嘅就係,個個都黑色篋,落咗飛機去到行李帶被另外一個客攞錯,呢啲case真係日日都有……

揀行李 顏色鮮艷嘅行李箱,那遠處都可以在行李轉盤上看到。
顏色鮮艷嘅行李箱,那遠處都可以在行李轉盤上看到。(圖片來源:GOtrip編輯部)

03|唔好用行李套

寄得艙就真係預咗佢一定會污糟,我都明個靚篋污糟咗會好心痛,不過搵個行李套包住隻篋,連個handle都見唔到,啲職員都唔知點幫你搬,好自然會用其他手段去處理。仲有就係,你件行李落咗輸送帶之後,係會經過好長好長嘅輸送帶之旅,先上到飛機,好多時候就係因為啲布料攝實咗啲輸送帶子間嘅罅,輕則爛套,嚴重者一路jam住冇人知上唔到機。

揀行李 真係最好唔好用行李套喇!
真係最好唔好用行李套喇!(圖片來源:YouTube@Parco影片截圖)

04|唔好掛太多嘢喺啲handle上面

有見過有人掛公仔,係好得意,但同上面講嘅一樣,成日會jam住。同埋篋以外嘅外部物件唔見咗,係唔會賠的。

揀行李 行李tag最好揀簡單嘅款式。
行李tag最好揀簡單嘅款式。(圖片來源:網上圖片)

05|舊行李tag要撕走

好多人都鍾意留,好似戰績好多咁巧威威,當年有歌手就係咁而搞到唔見咗隻篋。其實點解要撕走呢?通常呢,你會見到地勤用一條長嘅baggage tag綁落你隻篋個handle度,再搣一張細細張嘅黐落篋身,我哋經常會出現嘅case係,長嗰條,喺輸送帶運送途中甩咗,隻篋會去咗個問題行李區,職員會發現點解有隻篋應該要上呢班機但係又冇出現到呢?好多時候就去嗰個問題行李區度搵,見到你篋身仲有一個黐住喺度,起碼都知呢隻係邊個隻篋。點知你個篋上面有千千萬萬個,人哋都唔知點同你對。最後隻篋冇上到飛機,搞一大輪先搵得番。

揀行李 舊行李tag最好就撕走佢啦!
舊行李tag最好就撕走佢啦!(圖片來源:網上圖片)

06|TSA鎖

TSA – Travel Sentry Approved。若果你去美國,基於保安理由,職員好有可能會抽樣要喺你未同意之下打開嚟睇,如果你用TSA鎖,佢哋有專用匙,打得開,鎖得番。但如果冇TSA鎖,佢哋會照破壞你個鎖,打開檢查,你隻篋爛咗,唔會賠,所以要記得留意一下。

揀行李 揀篋最好揀有TSA鎖嘅鎖。
揀篋最好揀有TSA鎖嘅鎖。(圖片來源:網上圖片)

07|唔好亂貼貼紙

危險品貼紙,一見到就會好大陣仗,唔好亂貼,唔好亂重用裝過危險品嘅紙箱。

揀行李 喺機場真係唔可以講笑!
喺機場真係唔可以講笑!(圖片來源:網上圖片)

唔好亂寫字,寫都要寫得人哋睇得明,有試過台灣機場收到件行李寫住全部炸藥,搞到嚇死寶寶,然後發現全部係榨菜……虛驚一場。

揀行李 記住!字都唔好亂寫,要寫得清楚!!
記住!字都唔好亂寫,要寫得清楚!!(圖片來源:網上圖片)

其實搬運工人都有阿媽生,都會辛苦,當然啦,搵食係咁,我都明。不過行李唔好執咁重,人哋好搬啲,對你件行李都會好啲。冇記錯嘅話,其實某啲國家係有工業安全嘅規例保障工人唔可以搬重過 32kg 嘅嘢,試過見過啲客pack到 50kg 一件,真係搬死人。

揀行李 真係帶啲自己會用嘅嘢,唔好增加行李重量。
真係帶啲自己會用嘅嘢,唔好增加行李重量。(圖片來源:GOtrip編輯部)

圖片來源:YouTube@Parco影片截圖、GOtrip編輯部、網上圖片