姊妹 A 是一名慳妹,之前去北海道自駕遊,諗過度過發現  旅行租車  比搭火車抵,仲格晒價,搵日本租車公司,被佢搵到一個三天 7,850円 (約HK$556) 的套票, 平其他公司至少4,000円( 約HK$283) ,以為執到寶,點知返來猛呻!

01) 還車指定油站入油?!

原來該公司的條款中列明了還車限制——還車之前,要先到 指定油站 入滿油並出示單據確認,勁煩!A 之前試過幾次在日本租車,都未見過有這樣的規矩,最後就是為了指定油站入油而塞車,結果遲咗 50 分鐘。A 都知衰要罰錢,點知遇上惡女職員索價3,255円(約HK$230), 不斷叫:「You have to pay!」A 見罰錢表上寫明遲一個鐘係「1,050円」(約HK$74) ,要求對方解釋不果,更遭惡女大力撥開A的手!

02) 租車收你 保險費、旺季附加費?

在日本竟然受到如此對待,最後驚動經理出場,得知原來除了有一個鐘罰款以外,還要多付一日「保險費」和「旺季附加費」,經理更主動減少少收 3,000円 (約HK$212)完場!

03) 正常日本租車會點收費?

杜遊珍問過身邊的日本租車達人, 原來「指定油站」這規例近年很常見!至於遲到罰款,如有電話可聯絡,最好先打畀租車公司,告知會遲少少,可能有情講。但理論上 按時還車 和 收取旺季附加費 是必然的,但不是每間租車公司都會收保險費。

再問埋喺大型租車公司 Hertz 做的老死,她說一般還車有 29 分鐘走盞,如超時,一係罰足一日錢,一係按鐘計,但罰款一定貴。所以,如果遲到又唔趕飛機,索性 extent 多一日租金都抵過罰錢!