上機之前去個貴賓室,一程長途之前沖個涼食碗麵,埋去吧枱點杯飲品,攞幾件芝士返去座位,打開私人電腦回個e-mail,將電話充充電,寧靜嘅環境,舒適嘅座椅, 邊個唔想上機前享受一下先呢?我哋一齊睇睇咩人可以有呢個lounge嘅服務啦!

入得貴賓室嘅5種乘客

01|頭等、商務乘客

係,common sense。不過,當然係講緊 真.頭等,真.商務啦!正如上一篇文講過……開心商務係冇嘅。近呢幾年多咗航空公司搞premium economy,客人剩係聽到係 premium,職員剩係聽到係 economy。其實premium economy 都係 economy,即係冇lounge嘅……

02|仲valid嘅會員

係,會員係common sense,不過check validity就唔係 common sense。Tier 呢樣嘢好似基金股票價格咁可升可跌,上年你係金卡銀卡,今年可能甚麼都不是……
有時你攞住張過咗幾年嘅金卡畀我入mileage,攞完登機證又唔願走,等我張lounge invitation,我入落機見到金卡變成普通儲分卡,唔知點樣同你解釋冇貴賓室, 怕你受傷害嗰種氣氛好尷尬嘅。

03|同盟嘅會員

假若你係星星聯盟嘅金卡會員,今日搭星星聯盟嘅航班,可以入番自己聯盟嘅lounge。

04|公司account

有某啲公司同航空公司簽咗約,出差時會有lounge券畀你換個 lounge access。呢樣就要睇下你做嘅公司有冇呢樣嘢喇!

05|Pay lounge

轉機等好耐好辛苦嗎?好想沖個涼先再上機嗎?好想搵個位叉叉電,做下office嘢先嗎?如果真係冇得入自己坐嘅航空公司嘅lounge,機場有啲付費lounge,收費通常以小時計,非常彈性。

仲有,依家好多信用卡都會有lounge嘅服務,睇下你自己嗰張有冇啦!

相關閱讀:【專員實測】升級環亞貴賓室服務!|Plaza Premium First:更舒適環境 | 新增點餐&送餐服務

我個人就覺得轉機嗰下要用lounge嘅機會會大啲,其他大部分時間都係趕頭趕命仆入去閘口,唔好話lounge,雜誌都唔得閒買。

另外,有部分航空公司會有做last minute upgrade discount,情況係出發當日依然有空出嘅business class 剩,你去check-in時,職員可能會問你有冇興趣買個upgrade,通常價錢都會係discount咗,有啲航空公司嘅last minute upgrade係會有full business嘅service,有啲就真係剩係upgrade咗你個座位,呢樣嘢就真係間間都唔一樣,有興趣就check-in時問下職員啦!

相關文章