喺日本約有1,000間分店嘅Starbucks當中,有13間starbucks迷必去朝聖嘅概念店,佢地各有咩特別?即刻為你介紹!

關東區

1)  賞櫻賞紅葉熱點 上野恩賜公園店

講到上野恩賜公園一定會係東京區內賞櫻同賞紅葉嘅熱門地點之一,而座落喺公園內嘅就喺呢間混合咗藝術嘅分店。附近更有多個美術館同博物館,欣賞得攰攰地不如坐低休息下?

其實Starbucks嘅概念店都好著重當地本身嘅特色架,就好似喺店內擺放左唔少藝術作品,有唔少係出至東京藝術大學等等嘅作品!真係飲咖啡都不能放過吸引文化氣息呀!

詳細資料

【名稱】上野恩賜公園店
【地址】東京都 台東区 上野公園8-22
【交通】上野站公園口出口步行約7分鐘
【營業時間】08:00~21:00

2) 日劇朝聖地 東急PLAZA 表参道原宿店

位於東急PLAZA 屋頂上嘅表参道原宿店,旁邊嘅就係「おもはらの森」(表原之森,即表参道原宿之森林簡稱),好似喺東京呢個繁忙都市中嘅綠洲一樣。呢度仲係人氣日劇《朝5晚9》取景店添!

所以呢間概念店都統一充滿綠色嘅開放感。喺呢個潮人集中地,一邊欣賞表原之森嘅四季一邊嘆返杯咖啡先!

詳細資料

【名稱】東急PLAZA 表参道原宿店
【地址】 渋谷区 神宮前4-30-3 東急プラザ 表参道原宿
【交通】明治神宮前駅EV口出口步行約1分鐘
【營業時間】08:30~23:00

3) 銀座マロニエ通り店

位於東京嘅Starbucks係銀座嘅マロニエ通り店。最特別嘅地方係佢嘅2樓係會不定期有藝術家嘅作品展示,又或者舉辦唔同嘅活動,希望將藝術不經意咁滲入你嘅咖啡生命中~

咖啡狂熱者嘅你可能對咖啡豆都有一番研究,呢度仲有專俾買豆人用嘅counter,絕對可以滿足你嘅要求!

詳細資料

【名稱】銀座マロニエ通り店
【地址】東京都 中央区 銀座3-7-3 銀座オーミビル 1F
【交通】銀座一丁目站/11出口(東京メトロ有楽町線) 步行約3分鐘
【營業時間】07:00~22:30

4) 東京目黑店

喺東京目黑店嘅Starbucks分店樓上就係Starbucks Japan嘅總公司,所以呢間分店亦都貫徹日本大和風格x Starbucks嘅概念,以日本人最引以為傲嘅「おもてなし」(誠心款待)去呈現你嘅眼前~

除左店內每一根一根嘅原木都畫上插圖,而櫃上面嘅圖案都係以古時流傳落嚟嘅傳統工藝去製作,等你感受呢個就係日本嘅用心製作。另外仲有充滿日式禪意嘅坐位等大家親自嚟發掘同感受啦!

值得一提嘅就係呢度仲有目黑店限定嘅炭彩馬克杯,簡直好似藝術品一樣,相信見到「限定」兩個字都為之獨狂嘅你一定唔會放過!

詳細資料

【名稱】目黑店
【地址】品川区 上大崎2-25-2 新目黒東急ビル
【交通】目黒站/西口出口(JR山手線、東急目黒線、東京メトロ南北線、都營地下鐵三田線) 歩行約3分鐘
【營業時間】星期一至五:07:00~22:00;星期六至日:08:00~21:00

5)  表参道B-SIDE店【東京都】

表參道感覺就係象徵住日本時尚潮流嘅尖端。而建築喺人流來去匆匆嘅街道上呢一間Starbucks分店就係由活躍於日本音樂界同製作嘅藤原ヒロシ所創作嘅,令你可以有放鬆自在嘅喘息空間。

以「城市中嘅綠州」做主題,外面用極多嘅玻璃窗令到外面嘅陽光透入室內,一邊感受日光浴一邊品嘗咖啡。

而店舖嘅2樓仲要望出去就係附近嘅樹景,聽落雖然唔係咩絕景,但如果一個喺東京返工嘅上班族嚟講的確係一個心靈上嘅綠州!

詳細資料

【名稱】表参道B-SIDE店
【地址】渋谷区 神宮前5-11-2 B-SIDE
【交通】明治神宮前站EV口(東京メトロ千代田線、東京メトロ副都心線) 步行約5分鐘
【營業時間】08:00~22:00

6)  鎌倉御成町店【神奈川縣】

位於古都鐮倉嘅呢間概念店其實大有來頭。佢前身其實係日本漫畫家横山隆一嘅舊宅改建而成,所以店裡無論內外都保留左舊宅嘅原素!

就好似庭院內嘅櫻花樹,抑或喺紫藤季節就會掛滿紫藤嘅藤架,同小小嘅泳池,都係從以前就一直保存落嚟。坐喺緣側(日本傳統房屋建築中外廊嘅部份)欣賞日式庭院應該就只此呢間!

詳細資料

【名稱】鎌倉御成町店
【地址】神奈川県 鎌倉市 御成町15-11
【交通】鎌倉站出入口(江之島電鐵)步行約4分鐘
【營業時間】08:00~21:00

想帶埋愛狗嘆咖啡?下頁繼續睇!

 

關西區

7.福岡 大濠公園店 【福岡縣】

位於九州福岡嘅大濠公園店starbucks,如其名就係設置於公園入面嘅分店。
呢間分店最大嘅特色就係佢考慮到附近環境而開嘅starbucks。點解咁講?因為佢本身有唔少嘅座位同枱之外,仲特意設置單車嘅泊車位,同專門俾寵物用嘅鉤,等喺公園散步嘅市民可以好relax咁享受環境同咖啡。

Starbucks仲好愛惜環保,不單利用當地有利嘅環境去使用太陽能發電,仲將咖啡豆嘅殘渣俾附近嘅樹木做肥料添!

咖啡豆嘅殘渣除左做肥料,仲有一個用途就係將殘渣連同間伐材混合而成為店內嘅枱,非常特別!

詳細資料

【名稱】福岡大濠公園店
【地址】福岡県 福岡市中央区 大濠公園1-8
【交通】大濠公園站3號出口(福岡市營地下鐵空港線) 歩行6分鐘
【營業時間】08:00~22:00

 

8)  富山環水公園店【富山縣】

富山嘅環水公園店喺2008年嘅時候曾得到過「世上最美星巴克」之一嘅美譽。座落喺富岩運河環水公園之間,以木調同落地玻璃為主嘅設計既自然又時尚。
而最特別嘅係從店內任何一個方向都可以透過落地玻璃欣賞到公園嘅美景,同有公園的象徵嘅「天門橋」,真係幾浪漫!

另外公園晚上仲會有light up,運海反映嘅星空加上公園溫和嘅燈光,絕對係同白天不同嘅感受!

詳細資料

【名稱】富山環水公園店
【地址】富山県 富山市 湊入船町5 富山富岩運河環水公園
【交通】富山站北口步行約15分鐘
【營業時間】08:00~22:30

 

9)  神戶北野異人館店【兵庫縣】

嚟神戶一定會聽過嘅北野異人館,佢係由明治時代就被建造而成嘅西洋風建築物。經歷過阪神大地震嘅破壞,拆卸同重建,最後都得以保存。係別具歷史意義嘅日本文化遺產!

而Starbucks為左保留北野異人館嘅風味,特意訂造左木製嘅招牌,係唯一一間有咋~

室內都係沿用當時嘅裝潢再配置成而家嘅咖啡室。真係唔講以為自己去左外國嘆咖啡呀!

詳細資料

【名稱】神戸北野異人館店
【地址】兵庫県 神戸市中央区 北野町3-1-31 北野物語館
【交通】三宮站東出口8出口(神戸市營地下鐵西神・山手線)步行約11分
【營業時間】08:00~22:00

 

10)  京都三条大橋店【京都府】

講起古式古香嘅京都,一定唔可以少得受京都市民喜愛嘅鴨川河。而京都呢一家築喺鴨川河邊嘅Starbucks當然唔止普通嘅Starbucks咁簡單。

其實喺每年嘅5月1日至9月30日鴨川都會舉辦「鴨川納涼床」,即係指鴨川嘅右岸會架起一長列嘅高台,高台上有各式各樣嘅餐廳同茶屋。每到夜晚高台上嘅商店都會點亮了燈,乘著鴨川河嘅涼風享受用餐同風景,絕對係夏天嚟京都嘅一件盛事。

不過有份參與「鴨川納涼床」嘅商鋪其實價錢都唔平!所以呢間Starbucks絕對係以平民價去享受納涼床呢個京都獨有文化嘅地方!

詳細資料

【名稱】京都三条大橋店
【地址】京都府 京都市中京区 三条通河原町東入ル中島町113 近江屋ビル 1F
【交通】三条站7號出口(京阪鴨東線、京阪本線) 步行約2分

【營業時間】08:00~23:00

 

11)  京都烏丸六角店【京都府】

唔好睇呢間同樣位於京都嘅Starbucks外表睇落無咩特別,其實內有乾坤!
原來受到京都市政府嘅要求,必須從烏丸通一眼就要望到呢間Starbucks後面嘅古蹟六角堂(六角堂係京都歷史相常悠久嘅寺廟之一),所以成間店鋪都係以落地玻璃建成架!

而內裡嘅裝潢都同旁邊嘅六角堂互相配合,採用左六角形嘅結構。以下呢個六角形嘅展示柱入面嘅織錦都會隨著四季變化樣式!
如果你路經呢間Starbucks,不妨入去感受下同京都一樣嘅現代同傳統結合而成嘅環境啦!

詳細資料

【名稱】京都烏丸六角店
【地址】京都府 京都市中京区 六角通東洞院西入 堂之前町254
【交通】烏丸御池站5號出口(京都市營地下鐵烏丸線、京都市營地下鐵東西線) 步行約3分
【營業時間】星期一至五:07:00~22:00;星期六至日:08:00~22:00

 

九州都有個烏巣星巴克?!下頁繼續睇!

12)  太宰府天満宮表参道店【福岡縣】

九州福岡嘅太宰府天滿宮相信係每個嚟福岡都會必到嘅景點。而座落喺佢附近嘅Starbucks相信絕對會吸引到每個路經者嘅眼球,因為佢十足一個大形烏巣一樣!

由名建築師隈研吾設計嘅呢間Starbucks,係以自然素材將自然同傳統融合而成。唔好以為講得好簡單,一路由門口以細長木條編織到店內最盡頭,其實係建築師想表達出時間嘅流動,希望有機會喺呢度品嘗咖啡嘅每一人位都享受呢一種獨一無二嘅感覺!咁有格調嘅Starbucks你又去過未?

詳細資料

【名稱】太宰府天満宮表参道店
【地址】福岡県 太宰府市 宰府3-2-43
【交通】太宰府站出入口(西鐵太宰府線)步行約4分鐘
【營業時間】08:00~22:00

 

13) 出雲大社店【島根縣】

島根縣可能對港人嚟講有啲陌生,但位於島根縣嘅出雲大社你絕對要識!喺日本嘅十月又稱為「神無月」,相傳喺神無月中所有神明都會跑去出雲大社開會,其他地方都唔會有神明喺度,所以出雲大社既有神明眾集地神之國嘅美喻,另外仲有好重要嘅「結良緣」而聞名全個日本架!

而喺呢個結良緣咁出名嘅出雲大社附近嘅Starbucks亦都因此而將出雲大社嘅「和」同Starbucks嘅「洋」結緣喺一齊,非常點題㗎!但結緣呢樣野又點會得個名,喺呢間Starbucks內有一張勾玉形狀嘅「結緣枱」,聽講坐低嘆返杯咖啡都會有緣份隨之而來,小編真係恨不得飛過去搶返個靚位呀!

詳細資料

【名稱】出雲大社店
【地址】島根県 出雲市 大社町杵築南841
【交通】出雲大社前站/出入口出口(一畑電車大社線) 步行約6分鐘
【營業時間】08:30~18:30

 

 

相關閱讀:

全城瘋搶!日韓 Starbucks 冬季新杯 (附價錢、銷量)

期間限定!!starbucks迷必去日本純白星巴克