人愈大,去旅行愈唔想再去追趕景點,反而只係想 hea 下,好好去放鬆自己。

唔知點解最近好鍾意想當年,或者踏入社會做嘢已經一段時間,覺得好多嘢不知不覺間都變得好快、變咗好多,以往嘅價值觀同睇法都隨時間慢慢改變,就連去旅行嘅心態都一樣。

年輕去旅行 行程密集「最短時間去最多景點」

記得中學第一次去旅行,或者好多嘢都係好新鮮、第一次接觸,仲要同好多朋友仔已經一早 plan 定晒去邊度、食啲乜,為了以最短時間去最多景點,每日嘅行程都編排得好密,真係晨咁早就十二隻恐龍去野餐!

不斷影相、不斷post相,真係驚死啲朋友唔會留言叫你買手信一樣~雖然好似好攰好趕,但嗰陣時嘅你又會覺得好值得、好開心,可能呢啲就叫做熱血青春啩,仲有體力精神去追趕每一樣嘢。

人大心態變 不趕checkpoint 悠閒過

但反而依家心態有少少改變,去旅行只係想輕輕鬆鬆、簡簡單單,再唔想晨咁早就起身衝出去趕check- point,行程亦唔想plan得好密,成個改變就連我朋友都覺得怪。

所以前排去澳洲,朋友幫我諗咗好多行程,其實我都好開心,但始終想悠閒啲咁過,到最後都改咗好多好多。

旅行總有遺憾 轉化推動力

雖然咁講,不過有啲「衝動」同「目標」仍然會存在,咁先繼續有動力去旅行!!好似之前應承自己去澳洲一定要潛水跳傘,一樣會對好多事仍然有憧憬:)

雖然當中曾經以為會天氣惡劣玩唔到,朋友亦問我會唔會覺得唔開心,或者嗰刻真係會有啲sad,但同時亦唔會去強求勉強,冇得去咪由佢囉~

但最後慶幸嘅係,都順利完成咗自己想做嘅嘢:)

旅行出走嘅心態,相信每個人都唔同,但我覺得旅行總會存在一絲絲遺憾,無論時地人事邊方面都好,或者正正因為咁,我哋先有藉口同動力再去多一次haha。

個人動態:) ig: hottofuzai
https://www.instagram.com/hottofuzai/

更多文章 fb: 熱豆腐仔
https://www.facebook.com/hothottofu/

下一頁:我懷疑女朋友收埋一塊月亮咁大嘅面,如果唔係點會買咁多化妝護膚品……