東張西望｜港媽攜4歲女滯留日本 遊日回程機票突然消失
隨著上月港府宣布「0+3」入境檢疫安排及日本放寬自由行，不少港人都即時買機票訂酒店，搶在第一時間到日本旅行。昨日TVB播出最新一集《東張西望》，一名港媽鄧太於節目中表示，她與4歲女兒於10月18日飛抵日本，本來回程機票是買轉機的機票，不過之後得知有直航機票的他們便即時聯絡航空公司，而航空公司職員當時亦答應更改為直航機票。不過到回程72小時前鄧太想預先辦理登機時，卻發現手續不成功，多次再嘗試都失敗之餘，機位隨後更消失！
滯留大阪逾48小時 《東張》主持聯絡航空公司無果
而鄧太在回程當天在機場發現無法辦理登機手續，於是便再次聯絡航空公司，航空公司則認有同事出錯，導致她無法即時乘搭直航回港，需要回到大阪機場乘搭飛機返香港。但當時鄧太已經無足夠時間趕往大阪機場登機，只好一直等機位，結果滯留大阪逾48小時。而《東張西望》主持梁敏巧亦為鄧太嘗試聯絡航空公司，但等待了20分鐘，依然無人接聽。
鄧太：我從來未去過一次日本係去得咁慘㗎！
鄧太亦在節目上哽咽表示，原本帶4歲女兒到日本開心遊玩，結果卻在當地滯留3日，女兒無衫可換，又無奶粉，同時更被公司催促上班：
其實我嚟7日，轉機轉咗2日，搞呢單嘢搞咗3日，其實我嚟呢度都冇意思囉！依家仲話要唔知點樣可以返到嚟。係，錢可以解決一切，但喺依家呢刻，仲係咪可以解決？我真係唔知道。我都唔知我過嚟做乜嘢，我嚟係為咗你哋航空公司做錯嘢，我從來未去過一次日本係去得咁慘㗎！
終有機票回港 鄧太如釋重負
而最後在《東張西望》節目組調停下，鄧太終於收到航空公司安排，於10月24日晚上搭乘飛機抵達香港。鄧太亦開心向主持人表示可以回到香港十分興奮，更表示她與女兒由早上到下午2點都未食飯、未飲水，聽到可以回港後亦如釋重負。
網民不同情反炮轟：一啲危機感都冇
鄧太滯留大阪3日事件引起網民熱議，不過大部分網民並不賣帳，不同情鄧太的遭遇之餘，反而是指責她毫無危機意識：「一啲危機感都冇，在機位咁亂的時候一定要保住原本機位的常識都冇，活該」、「痴線，咁樣都投訴？ 原本行程定好晒又手多多轉嚟轉去。 仲有，轉唔轉到機位都係email confirm架啦。 好似成個世界圍住佢轉咁」、「明知得佢一個大人，帶住小朋友又handle唔到突發事情，都夠膽咁樣去旅行，佩服佢嘅『勇氣』」。
訂咗機位但又要轉來轉去，自己都要預咗有機會錯，但自己又唔check真啲，出錯咗一味投訴別人唔啱，自己一啲都冇問題？最慘就你個4歲小朋畀佢搬埋出呢搏同情，仲有佢老公都好難受，少少嘢都上電視投訴，阻住晒啲有需要嘅人！啲眼淚好假！