日本政府更改入境政策 遊日港人大失預算
日前因為中國疫情逐漸升溫，全國確診病例急增，日本政府於12月27日宣布，由12月30日起，凡是來自中、港、澳3地的直航航班只可使用東京成田、東京羽田、大阪關西及名古屋中部機場升降。雖然在幾日後日本政府再次修改政策，指若來自港澳出發直航航班機上並無過去7日內曾於中國逗留之旅客，可載客入境札幌新千歲、福岡、沖繩那霸機場，但都令大批準備遊日的港人大失預算。
港媽爆seed大鬧日本改入境政策：成個國家都癲癲地！
有港媽就在Baby Kingdom討論區以「未買保險、飛北海道，下個月」為題發文，與其他港媽討論日本新入境政策的影響。其中一名港媽極為激動，大鬧日本政府變更入境政策，「日本真係精神分裂」，更直斥日本「又玩針對」，「成個國家都癲癲地！」同時亦大爆猶如2008年著名「機場怨港中國旅客」的金句：
去（日本）旅行都係送錢俾佢地，依家搞到送錢都好似乞求人地要咁？好心就咪鬼理佢地小日本啦，唔信佢地可以封一世中國！
到時到中國再封佢地關，小日本咪再呱呱叫呀！
其後亦有另一名港媽附和到： 「日本自己一日都十幾萬人中啦！都唔明點解送錢仲要受氣！」
網民齊恥笑：最後咪又係搶住去！
不過港媽們的「日本瘋癲論」不僅沒有收到網民的支持，更引來大批網民一同恥笑，指她們為「口嫌體正直」，「又要嫌又要去」，「我覺得日本歧視中國，真係蘇玉華，你真係唔好去日本等日本人飯都冇得開」！同時亦有人力批港媽的心態極為不當：「最憎呢種恩客心態的港人！？影衰晒港人。人哋國家緊係可以設下任何入境限制。唔鍾意你咪唔去！ 」另外亦有人反諷到港媽的言論：
去人哋地方旅行，講到送錢俾人咁，咁大支嘢好心就有骨氣啲，依家人哋係唔稀罕做你生意，怕咗你哋呀，咪唔好去囉！
