網民分享日本6大伏酒店　有蝨＋住完生風癩未算癲　1間被指超邪

早前有網民於Facebook群組「HK Express 香港快運及旅行資訊關注組」中，就「一人講一間日本住過最差嘅酒店」討論，得出以下6間酒店。

日本伏酒店｜01 大阪LiVEMAX

大阪連鎖LiVEMAX酒店被網民指全館重煙味，廁所設計升高一級，同時又好細，一出廁所門口好易「差錯腳」 。另外，床舖只有一張薄床單，面再蓋一張深藍厚被，而且不知道厚被有沒有換被袋。

日本伏酒店｜02大阪難波ibis

網民就指於難波ibis酒店中，入住的房間有蝨，而且打開張被更見有血，同時有網民於梅田分店亦遇上同樣事情。

日本伏酒店｜03 東京箱根天悠

箱根溫泉旅館天悠就有網民分享曾有差體驗：「我同太太上年住過2晚，住完真係一肚氣。例如第二日發現房務員冇乜點執過房，而且仲有其他房間客人嘅物品喺自己房間。叫個經理過嚟自己睇，佢仲好似覺得理所當然咁，Checkin 排隊咗超過1 小時，仲將我哋啲行李遺漏喺大堂嗰度無送上房。房間雪櫃仲要壞嘅，我哋放咗牛奶入去全部變壞，食物完全唔新鮮，識英文嘅職員態度好差」； 但又有網民指：「天悠我都住過， 乾淨床又舒服好正喎。一泊兩食，兩餐都好好食，大堂飲品任飲。但唯一缺點係渣車好難搵，導航彈嚟彈去」。

日本伏酒店｜04 東京池袋Sunshine City Prince Hotel

這間池袋太陽城王子酒店一直被指「好猛」，ViuTV曾於《入住請敲門》中到採訪。有數位網民住過這間酒店後都表示「好邪」，指：「晚上放低啲行李之後出去食飯，留意到房裏面有一幅古裝傳統和服女士嘅畫像，好似同食飯之前有啲唔同， 跟住就開始感覺到好似畀人拎住喉嚨，透唔到氣。由第一晚開始病，病咗成一個月 」、「聽到操兵聲」、「成日聽到啲聲，但用肉眼搵唔到聲源」、「有電台主持話佢頭1日有留意房門對住有另一間房，試過開門見到對面又咁啱開咗門有個女人梳頭， check out 嗰日發覺原來對面係牆嚟」。

日本伏酒店｜05 東京日暮里、池袋APA酒店

日本連鎖酒店APA中有多間分店都被網民點名：「日暮里APA酒店，叫咗唔好執房，但職員自己入嚟執房，仲整唔見咗女友床上面隻公仔，公仔裏面有好多襟章，去過好多地方。但酒店不負責任指唔關佢哋事，拒絕負責」、「東京藏前APA 間房細都算，不論禁煙或吸煙房都好污糟。床頭櫃封哂塵，鏡唔清潔，有手指模。床彈弓下垂、地毯睇落好多塵。住到第二晚全身痕，然後出風癩」、 「APA出名污糟，房勁細，櫃台態度西」、「鹿兒島APA設施比較舊，有一陣味。小型雙人房太細，冇辦法平放開篋」等。除了衛生問題，網民指出APA的中央暖氣不能調教溫度，晚上十分熱。

日本伏酒店｜06 福岡Forza

有網民這間酒店清潔草草了事：「執房嘅人就係咁樣攞張床單鋪咗就算，夜晚瞓覺揭開張被見到一撻撻以為係乜嘢，結果一睇係M血」。