有一啲 旅行習慣 ,即使返到香港都唔想改。唔知有冇人同我一樣,每次去完旅行都有一種後遺症。

好想繼續留係嗰度,唔想返嚟面對現實……

.

但奈何現實總係殘酷,就算幾唔想走、幾唔捨得都好,你雙腳總會慢慢步入機場,

轉眼間就返到嚟現實世界。
.

Welcome back~~~
.
.

話就話個人已經返咗嚟,但靈魂仲係有時差未跟得切。
有時返工無聊睇番去旅行嘅相,睇睇下自己都會笑咗出嚟。

吃喝玩樂嘅日子,有啲好似變咗每日嘅習慣咁,一時三刻都唔係咁快適應到。

.

記得之前去澳洲旅行,大大話話都玩咗半個月有多,
嗰時我住墨爾本嘅朋友,佢每朝食早餐都會叫一杯咖啡。
.

「喂~你飲唔飲呀?」

「咖啡?唔喇……我本身好少飲。」

因為平時喺香港真係極少飲,或者自己都興趣不大。

「真係唔試?呢度啲咖啡都幾出名喎!」

「OK!咁加一。」
.

做咩啫……旅行嘛~當然咩都要試下啦~
.

當兩杯咖啡嚟到,或者拉花圖案已經係基本,
加上我唔係陳豪,唔識得品味咖啡,所以都係盲目跟咗朋友介紹。

「點呀?好唔好飲呀?」

「咦~又 OK喎!」
.

如是者日復日,每次去到餐廳,我都有留意佢哋有咩咖啡選擇,
慢慢就變成咗一個習慣,每朝早都會嘆番杯咖啡、食個早餐。
.

雖然天氣好凍,但有一杯汪明荃(熱咖啡),再加上陽光照落嚟嘅感覺,真係幾舒服~~

見住好多本地人為工作忙碌,而自己可以置身事外,都真係幾爽皮。
.

呢一啲回憶同味道,相信一段長時間都仲會記得好清楚。
.
.

時日太快,旅行總有完結嘅一日,
返到嚟香港,就變咗輪到我唔爽皮……

每日每朝都趕頭趕命咁同人哋迫巴士、港鐵,同之前輕輕鬆鬆差好遠。

所以有時朝早返到公司,都會沖一杯喺澳洲買嘅咖啡包嚟飲。
.

我唔知咁樣係繼續呃自己,定已經變成咗生活習慣一部分,

但起碼呢幾分鐘,我品嘗緊熟悉嘅味道,

間接仲可以幻想自己去緊旅行。
.

呢種旅行後遺症,唔知大家又會唔會有呢?~

PS: 不過我相信最難忘都唔係飲咩、食咩,而係你同身邊旅伴一齊嘅經歷回憶:)


個人動態:) Ig: hottofuzai
https://www.instagram.com/hottofuzai/
更多文章 fb: 熱豆腐仔
https://www.facebook.com/hothottofu/